ဘိၪ့လ့ၩဖၭအဆၧၫ့အထီ မုအီၪပွံၭနံၩ(၅)

အဲၪကွံၩဘၪထၧၫ့ဖုဝဲၦ ဆူနဲၩဖိၪထီးလူၬၥံၪဧ့ႇ မုကနံၩယီၩ မွဲဝ့ၫဒၪ ဘိၪ့လ့ၩဖၭအဆၧၫ့အထီ မုနွ့ၫ (၅) နွ့ၫလနွ့ၫႇ မုအီၪအီၪပွံၭနံၩလီၫႉ 
လၧဂၪ့ခိၪချိၫ့ဖၧၩ့ယီၩ ပဆၧဘိၪ့ဆၧဘၩလမီၪ့ဎီၩ့ဘၪလါနၫ့ႇ ပဆၧဆူနဲၩလဘၪလၩ့ဎိၭဘၪလါနၫ့ႇ အ့ၪမွဲပကယူၭယၪ့လိၬၥၭႇ ပကအီၪလၧဆၧနၪၥ့ၪအ့ၪလိၬၥၭအဖၧၩ့စွါဘိၩႇ ပအီၪလၩ့ဎိၭလိၬၥၭမွဲကန့ဝ့ၫဒၪနီၪလီၫႉ 
ကဆါယ့ၫၡုၬဎြံၬအီၪလၧဂၪ့ခိၪချိဲၫ့အဖၧၩ့ယီၩ လၧအဖီၩ့နံၪ့ထီၫ့ဘျဲၪအထီအိၭ လကၭဘၪ ဒဲထီၩ့မုဆၫကနံၩယီၩကကၠၪႇ အီၪမၧၫ့ဝ့ၫလၧပၥိၭကကျၩ ခၫ့ဖျီၫ့လၧကိၪဘိၪ့ဆံၫ့ဎံၪစၭကရၫမဲတူၩအဖၧၩ့နီၪလီၫႉ 
မုကနံၩယီၩလံၬဆံၫ့ဎံၪဆၧၥၭထိၬပရၧၫ့ဖၧၩ့နီၪ ၥီၪ့ၥၫ့ထၬပၧၩ ကဆါယွၩဖျါလၩ့ဘၪ အဖိၪခွၫလဂၩဎး လၧဂၪ့ခိၪချိၫ့အဖၧၩ့ယီၩတၭ ၥီၪ့ထဲၩ့ၥၫ့ထဲၩ့ပၧၩ မူၭခိၪဂၪ့ခိၪႇ ဖါကဆါယွၩလဂၩအဂဲးနီၪလီၫႉ ကဆါယ့ၫၡူၬဒိၭန့ၦၡၩအဆၧကဲၪ ဘဲၫပၧၩပၧၩယၧၩယၧၩအၥိၭဂီၩ့ အီၪမၧၫ့ဝ့ၫဒၪလၧဂၪ့ခိၪချိၫ့အဖၧၩ့ ဘဲၫၦၡၩကဂၩအၥိၭလီၫႉ လကၭဒ့ၭဘၪ ထီးမုဆၫကနံၩယီၩ လၧကိၪဘိၪ့ဆံၫ့ဎံၪအဖၧၩ့ ကဆါဎြံၬအီၪမၧၫ့ဝ့ၫဒၪ လၧယွၩအဆၧကဲၪအဖၧၩ့နီၪလီၫႉ 
ပဘိၪ့ထၪ့ဘၩကဆါနီၪ ကဆါလၧအမၩနၧၩ့ဆၧၥံၫဒိၪ ဒဲ မၩမၧၫ့ထၪ့ထဲၩ့ ၦလၧဆၧၥံၫဒိၪအကျၩ မွဲန့ဝ့ၫဒၪအကၠီၩ့ႇ ဖီၩ့မၬလၧကဆါယွၩနီၪ ပကဘၪဘိၪ့ထၪ့ဘၩထၪ့ ကဆါအဂူၫဂၩအလး မွဲလအီၪဘၪနီၪလီၫႉ ဆၧနီၪအကၠီၩ့ အ့ၪမွဲပဆၧၥၭမၧၫ့ဖၧၩ့ ပဘၪဒၪဆၧၫ့ယၫ လၧဆၧကၪဆၧဂဲၩႇ ဆၧၥုၪ့ခိၥၭဂီၩႇ မုၪခီၩလဲးအဆၧကျဲၩ့ဖစီၩ့လဖၪအထီ ပကဘၪအီၪဒိၭနဲၩ့ထၪ့ပၥၭ လၧကဆါယွၩအအီၪနီၪလီၫႉ