ဘိၪ့လ့ၩဖၭအဆၧၫ့အထီ မုအီၪပွံၭနံၩ(၂)

အဲၪကွံၩဘၪထၧၫ့ဖုဝဲဎြံၬဖိၪၥံၪဧ့ႇ 
(၁) လၧဆၧၥၭထိၬပရၧၫ့လနံၩယီၩအဖၧၩ့ႇ ပနါဂၧၫ့ဘၪယ့ၫၡုၬဒုၭနဲၪဖျီၪထၪ့ၥၭလၧအထံၩအဖျဲၥံၪအမ့ၬယၫႇ စံၭအဝ့ၫၥံၪႇ မွဲဆၧအမုၬအီၪလၧနၥံၪအလီၩ့ဆံၭ. ယ့ၫၡူုၬအဆၧချဲၩ့ႇ မွဲဆၧအမုၬအီၪလၧနၥံၪအလီၩ့ဆံၭနီၪ လၧဆၧၥၭထိၬပရၧၫ့လနံၩယီၩအဖၧၩ့ ပနါဂၧၫ့ဘၪ (၃) ဘျၩ့လီၫႉ  ဘၪနီၪလဲၪစွါဘိၩ အထံၩအဖျဲၥံၪလဖၪ ယ့ၫၡုၬမွဲအဝ့ၫၥံၪအဆရၫႇ အကဆါႇ လအီၪလၧၩ့ဘၪအဝ့ၫၥံၪအၥိၭတၭႇ ၥၭမဲၪၥၭဖျဲၩ့ဆၧႇ အၥုၪ့အုၭၥၭအုၭ ဒဲလကၭဒံၭဘၪႇ ယ့ၫၡုၬမၧၫ့ထၪ့ထဲၩ့လၧဆၧၥံၫအဂဲးနီၪ အဝ့ၫၥံၪနါဂၧၫ့ဘၪလါနၫ့ဂ့ၩႇ လဒၪဒံၭဘၪယ့ၫၡုၬလၧအဝ့ၫၥံၪအမ့ၬၥၪအကၠီၩ့ႇ အၥၭဂံၩ့ဂၩ့ဝ့ၫဒိၪဒိၪလ့ၬလီၫႉ 
မွဲဆၧဘနီၪအကၠီၩ့ႇ ဘဲၫၥိၭအထံၩအဖျဲၥံၪအၥၭကလၧၫ့ထၪ့ဎွ့ၩထၪ့ထဲၩ့လၧဆၧမုၬဆၧၡူၪႇဒဲ လၧဆၧဆူနဲၩအဂး ယ့ၫၡူၬဒုၭနဲၪဖျီၪထၪ့ၥၭႇ အဆိၫထုၬႇ ဖ့ၪလၫ့အထံၩအဖျဲၥံၪ ဆၧမုၪဆၧၡူၪႇ ဒဲဆၧၥုၪ့ထိၬၥၭထိၬလီၫႉ 
(၂) နံၫထံၫလထံၫယီၩႇ ယ့ၫၡုၬစံၭအထံၩအဖျဲႇ ဘဲၫယဖါအၪ့မၧၫ့လၩ့န့ယၧၩအၥိၭနီၪႇ ယမိအၪ့မၧၫ့လၩ့န့နၥံၪဘဲၫနီၪၥိၭလီၫႉ ယ့ၫၡုၬဖ့ၪလၫ့အထံၩအဖျဲၥံၪ ၥၭမုဆံၫ့ဎံၪတၭႇ ကကွဲၪဖျါခွံၬၦၡၩအဆၧမၩမွဲဂ့ၩႇ ကဖီၪ့ထၬႇကစၧၩ့ထၬဝ့ၫမွဲဂ့ၩ ဆၧအစီၩ့အမၩ့နီၪ ဖ့ၪလၫ့အဝ့ၫၥံၪလီၫႉ ယ့ၫၡုၬလၧအလထိးၥံၫဒံၭဘၪအိၩႇ အနၫ့ဆါဒၪလီၩလၩ့လၬလၩ့ဆၧၥၭထိၬအပရၧၫ့ႇ မၩဘျၪထဲၩ့ၦစူၭၦဆၫႇ နၫ့ထၪ့ခွံၬဆၧနၪလဖၪႇ ကွဲၪဖျါခွံၬၦဆၧဒဲၩဖိၪအဆၧမၪႇ ဒဲ မၩမၧၫ့ထၪ့ထဲၩ့ၦၥံၫလဖၪဆ့လီၫႉ 
ကဆါယ့ၫၡုၬမၧၫ့ထၪ့ထဲၩ့ဂီၩ့ႇ လချုၭထဲၩ့ထၪ့ဒံၭဘၪလၧမူၭခိၪနီၪႇ ဖ့ၪလၫ့ထၬအထံၩအဖျဲၥံၪ ၥၭမုဆံၫ့ဎံၪအစီၩ့အမၩ့လၧၫ့လၧၫ့ဎွ့ၩဎွ့ၩႇ ဘဲၫၥိၭကဆုးမၩဆၧမၩလၧယ့ၫၡုၬမၩထၬဝ့ၫႇ မွဲဝ့ၫႇ လီၩလၩ့လၬလၩ့အဆၧႇ ကဆုးၦဘျၪထဲၩ့ဆၧႇ ဆၧကွဲၪဖျါခွံၬဆၧမၪႇ ဒဲဆၧမၩမၧၫ့ထၪ့ထဲၩ့ၦၥံၫနီၪလီၫႉ 
(၃) ၥၧၫ့ထံၫလထံၫယီၩႇ ယ့ၫၡုၬမၩဂုးထၪ့ခၧၫ့ထၪ့အထံၩအဖျဲၥံၪအဆူနဲၩ လၧဆၧအွဲၪၥၭဆၧၫ့ဒိၪဒိၪလ့ၬအဖၧၩ့လီၫႉ အထံၩအဖျဲစထီမၭလဂၩႇ မီၪ့ဎီၩ့ၦၡၩအထံၩအဖျဲၥံၪအဂူၫဂၩအ့ၬႇ အဝ့ၫမိဒၪဘၪအၥၭလၧယ့ၫၡုၬအနၫ့ဆါလကၭလၧၫ့ႇ မိဒၪဘၪထၭအလးလၧအစူၪယၫၥၭအဖၧၩ့, မိအီၩ့ဘၪအဖၧၩ့လး လၧယစူၪနိၩ့ႇ မိဘူၭဘၪအဂုၬဖၩအဖၧၩ့လးလၧအစူၪနီၪလီၫႉ 
ယ့ၫၡူၬလၧအၥ့ၪယၫစထီမၭအၥၭနီၪႇ လၧအွံၪၥၭဆၧၫ့ဖၧၩ့ႇ ဒုၭနဲၪအ့ၪစထီမၭ အစူၪယၫၥၭ, ဒုၭဘူၭဝ့ၫအဂုၬဖၩအဖၧၩ့လးတၭႇ စံၭစထီမၭႇ
ၥၭနီၪမွဲအထီးဂံၩ့ဂၩ့လဂ့ၩ, နဲၩဆၧဆံၭ.
စထီမၭချဲၩ့ဆၧၫ့ဆၧတၭ, စံၭအဝ့ၫ, ယကဆါ,ဒဲယယွၩမၬကၨ.- 
ယ့ၫၡုၬစံၭအဝ့ၫ, မွဲနဒၪဘၪယၧၩအကၠီၩ့တၭနနဲၩနဝ့ၫ, ၦလၧအလဒၪဘၪဝ့ၫလါနၫ့ဘိၩ နဲၩ ဝ့ၫလဖၪဘၪဆိၪဂ့ၩဝ့ၫဒၪလီၫ.
ယ့ၫၡူၬအထံၩအဖျဲၥံၪလဖၪႇ နါဂၧၫ့ဘၪယ့ၫၡူၬ အဆၧၥီၪ့ဆၧၥၫ့ႇ ဒၪဘၪၡုၬအနၫ့ဆါဒၪဝ့ၫႇ မၩဆၧလၩ့လၭတၭႇ ဆူနဲၩယ့ၫၡုၬလီၫႉ