ဘိၪ့လ့ၩဖၭမုအီၪပွံၭနံၩ

ဘိၪ့လ့ၩဖၭမုနံၩယီၩႇ ပကဘၪအၪ့န့ထၪ့ ဒီၩ့ဂ့ၩထ့ၬဘၪလဖၪ ယ့ၫၡုၬအထံၩအဖျဲ ၥၧၫ့ဂၩအအီၪနီၪလီၫႉ စစဲမၧၫ့ပံတၧၫႇ စယီဟၫ့ႇ ဒဲနးမၫရံၫယၩမၫဒလ့ၫနၩၥံၪ အဆူနဲၩႇ အဆၧအဲၪႇ အဆၧၥၧၫ့ဒူၩၥၭဒူၩလဖၪနီၪလီၫႉ 
နးမၫရံၫယၩမၫဒလ့ၫနၩယီၩႇ လမွဲဘၪ ဆၧအၪ့မၧၫ့ဖိၪၥံၪ ၁၂ဂၩအကျၩလါနၫ့ႇ အဝ့ၫနီၪ မွဲဝ့ၫဆၧဒဲၩဘၭဖိၪ လၧအနီၫ့ယါလၩ့ထဲၩ့ၥၭတၭႇ ယ့ၫၡုနၫ့ထၪ့ခွံၬ ဆၧနၪနွ့ၫဒုၩလအလီၩ့လီၫႉ ခီၫလၧအဝ့ၫစၭဒၪခီၩလိၬလၧကဆါဎြံၬနီၪ အဝ့ၫအၪ့လဲၩအၥၭမၧၫ့ႇ ကဲၪယ့ၫၡုၬအထံၩအဖျဲလဂၩႇ ကၠၧၫ့ကၠၧၫ့လၧၦမုၪၥံၪအဂူၫဂၩ လုအၪ့လုအီၩ ယ့ၫၡုဒဲအထံၩအဖျဲၥံၪ လၧအဝ့ၫၥံၪအဆၧဖိၪဆၧလံၩလီၫႉ 
Jn 19;25 နးမၫရံၫမၫဒလ့ၫနၩယီၩ ဖိၬထၪ့ယ့ၫၡုၬအခဲၫ့ႇ ထီၩ့စိၩ လၧထုၪ့စူၪယၫအခၪ့ထံၭႇ လၧကၭလၧၩ့ႇ လၧၥွၪခိၪႇ ဒဲလၧဆၧဂဲးထုၪ့ထဲၩ့အလးနီၪလီၫႉ 
ၦလၧအလ့ၩ လၧၥွၪခိၪႇ ဒၪဘၪဆၧၥွၪခိၪအအီၪပျီၩဖျ့ၭအဆိၫထုၬနီၪ မွဲနးမၫရံၫမၫဒလ့ၫနၩႇ ယ့ၫၡုၬဒုၭနဲၪဖျီၪထၪ့ၥၭအဆိၫထုၬႇ အၪ့မၧၫ့အဝ့ၫ လ့ၩလီၩဘၪအထံၩဖျဲၥံၪ လၧအဆၧဂဲထုၪ့မၧၫ့ထၪ့ထဲၩ့အဂဲးနီၪလီၫႉ 
အဲၪကွံၩဘၪထၧၫ့ဖုဝဲၥံၪဧ့ႇ 
ယ့ၫၡုၬဎြံၬနီၪ မွဲဝ့ၫယွၩလဂၩဎး လၧအမၩနၧၩ့မၩစၪဆၧၥံၫဒိၪလီၫႉ

ယ့ၫၡုၬနီၪ မွဲဝ့ၫဆၧဂဲထၪ့ထဲၩ့ ဒဲဆၧၥၭမၧၫ့လီၫႉ 
လံၬစပီလူၫကွ့ၩန့ ၦကလီၫစံၫဖိၪၥံၪအဂး
 ၃:၁-၄ႇ နၥံၪအ့ၪဂဲထုၪ့ဎုၬလၧဎြံၬနီၪႇ အၪ့ဎၬန့ဆၧလၧထၭႇ ထီးအလးလၧဎြံၬအီၪဆၧၫ့နၩ့ လၧယွၩအစူၪထွ့ၪနီၪဆံၭႉ 
အီၪက့ၪနၥံၪအၥၭ လၧဆၧလၧအအီၪလၧထၭနီၪဆံၭႇ မွဲဆၧအီၪလၧဂၪ့ခိၪချိၫ့ယီၩလဂ့ၩႉ 
ယ့ၫၡုၬနီၪ မွဲယွၩလၧအအီၪလၧထၭႇ လၧအၥၫ့လၧအခၪ့ထံၭႇ ဂဲၫလၩ့လၧဂၪ့ခိၪချိၫ့ဖၧၩ့ႇ ဂဲၫလၩ့လၧလၭႇ အီၪပၥိၭကၠၧၫ့ကၠၧၫ့ႇ ၥီၪ့လိၪနဲၪလိၪအ့ၪ ဆၧလၧအအီၪလၧထၬအဂဲးႇ ဒဲၥၭမုဆံၫ့ဎံၪအဂဲးနီၪလီၫႉ 
ပဝ့ၫဒၪ ၦဂၪ့ခိၪဖိၪလဖၪယီၩ အၪဒၪဆၧႇ ပအဲၪဒိၭႇ ပအၪ့ဎၬ ဆၧအီၪလၧလၭလဖၪနီၪလီၫႉ စံၭမၫခလါႇ ဂၪ့ခိၪအဆၧမုၬဆၧလၩႇ ကျိၪစ့ၩႇ စူၪလးခၪ့ခိၪလဖၪလီၫႉ လါနၫ့ဂ့ၩ ဆၧအီၪလၧလၭလဖၪယီၩ အီၪဂုးန့ယံၬအ့ၬႉ ဂၪ့အဎံၪအလၩႇ ဆၧမုၬဆၧလၩႇ ဆၧလ့ၩထၪ့လ့ၩထီၫလဖၪနီၪ အထုၬအီၪဝ့ၫလီၫႉ အ့ၪပအဲၪန့ၫ ဆၧအီၪလၧလၭနီၪ ႇ ပထီးလၧထၭအလးႇ မူၭခိၪအဘၩ့အမုးဖၧၩ့ၥ့ၪအ့ၬႉ 
ဆၧနီၪအကၠီၩ့ ဘဲၫစပီလူၫမၪလူၬပၧၩအၥိၭ  လၧပကဘၪမၩၥံၫခွံၬႇ ပကဘၪခွံၬၡိၭခွံၬ ဆၧဒဲၩဘၭ ဒဲဆၧအၧၩ့ဆၧၥၫ့လဖၪအကၠီၩ့ႇ စံၭထၬဝ့ၫႇ 
ဆၧမၩမၪမုၪမၩမၪခွၫႇ ဆၧအဲၪလဲးအဲၪဘျၪႇ ဆၧၥၭခတၧၩႇ ဆၧၥၭကွံၩဆၧအအၧၩ့ႇ ဆၧလီၫ့ကီၩ့ၥၭကွံၩစူၪလးခၪ့ခိၪလဖၪနီၪ မၩၥံၫခွံၬဆံၭႉ 
ဆၧၥုၪ့ထၪ့ၥၭထၪ့ႇ ဆၧၥုၪ့ထၪ့ၥၭဂဲၫ့ႇ ဆၧဆိၪအၧၩ့ႇ ဆၧဒုၪဒွ့ၪႇ ချဲၩ့ဆၧမ့ၬမဲဂဲၫထၪ့ လၧနၥံၪအနိၭဖၧၩ့လဖၪနီၪ ခွံၬၡိၭခွံၬအဝ့ၫၥံၪဆံၭ
အဲၪကွံၩဘၪထၧၫ့ဖုဝဲၥံၪဧ့ႇ ပအီၪလၧဂၪ့ခိၪချိၫ့ယီၩအထီ ပအီၪၥၭမၧၫ့ဒံၭ လၧလၭယီၩအထီႇ ပကဘၪအၪ့ဎၬထၪ့ဆၧလၧထၭလဖၪလီၫႉ ပကဘၪအီၪၥၭမၧၫ့လၧ ဆၧဆူနဲၩႇ ဆၧအဲၪဆၧကွံၩႇ  ဆၧခိၭနၪယွၩအလူအထၫႇ လၧဆၧယၫ့ၥၭႇ ဆၧမၩဂ့ၩႇ ဆၧဆၪ့လၩ့အၥၭႇ ဆၧၥုၪ့ဆၧၩ့ၥၭဆၧၩ့ႇ ဒဲဆၧအွံၪၥၭဆၧၩ့အဖၧၩ့နီၪလီၫႉ