ဘိၪ့ထၪ့ဘၩထၪ့ပျီၩပျီၩယၧၩလီၫ

ၦဖၫရစံၫၥံၪ, ဒဲၦကွ့ၭလံၬလနၩ့နၩ့လၧအဂဲၫဝ့ၫလၧယရုစလံၫ့နီၪ, အီၪကိၩ့အီၪကီၪ့လၧအအီၪတၭ,- ထီး အဒၪဘၪအထံၩအဖျဲလနၩ့နၩ့ အၪ့ကိၪလၧအစူၪလဆံၫ့ဘၪ, ဘဲၫၦစံၭဆၧအၥိၭ,အစူၪလၧအလၥူၫဝၭခွံၬ ဘၪဝ့ၫနီၪ,မွဲအအီၪက့ၪဆၧမၪလၧအလီၩ့လီၫ.- အဂဲးဘဲၫယီၩၦဖၫရစံၫၥံၪး ဒဲၦယုဒၫဖိၪထီးအလူၬနီၪ, မွဲအ ထီးန့ၦမွံၩၦၡါလီၩဆိၩလၬဆိၩဆၧတၭ, အ့ၪလၥူၫဝၭခွံၬဘၪအစူၪဂ့ၩဘၪစဲၪနီၪ, အၪ့ဆၧအ့ၬ.- အဝ့ၫၥံၪ ဂဲၫထဲၩ့လၧဖၠၫဖၧၩ့နီၪ, အ့ၪလဘၧၩ့လၩ့ဘၪအၥၭတၭ, အၪ့ဘၪဆၧအ့ၬ. လၧနီၪအမ့ၬယၫ, အဆၧဂူၫ ဂၩလၧအထီးန့ဝ့ၫအီၪအၪမံၩ့ဘဲၫယီၩ, မွဲအဘၧၩ့လၩ့လိၫ့ၥံၪ, ဒဲဖၧၩ့ၥံၪ,ဒဲလိၫ့ထီးဘၩ့ဒဲခၬၥံၪလီၫ.-

ထီးနီၪ လဖၧၫ့ၦဖၫရစံၫ, ဒဲၦကွ့ၭလံၬၥံၪအၪ့စၪ့အဝ့ၫ, နထံၩ နဖျဲလဖၪနီၪ,မွဲဘၪနီၫလၧအလလ့ၩဘၪဝ့ၫ ဘဲၫၦမွံၩ ၦၡါလီၩဆိၩလၬဆိၩဆၧအၥိၭတၭ, အစူၪလၥူၫဝၭခွံၬဘၪဝ့ၫတၭ, အၪ့ဆၧမၬကၨ.- အဝ့ၫဒၪစံၭအဝ့ၫၥံၪ,မီၪ စအဲၫစ့ယၫစံၭဝ့ၫလၧမီၪအချိၬ လၧၦအၪ့လီၫဆၧလၧ နၥံၪဝ့ၫလဖၪအဂဲးနီၪ ဂ့ၩမၬလီၫ. ဆၧကွ့ၭအၥၭဘဲၫယီၩ, ၦလဆၨၩယီၩ ယူၭယၪ့ယၧၩလၧအနိၭဖျံၩ, အ့ၪမွဲအၥၭနီၪယဲၩ့မၬဝ့ၫလၧယၧၩလီၫ. အဝ့ၫၥံၪၥီၪ့လိၪဆၧလၧၦၡၩအဆၧမၪလူၬ, လၧဆၧၥီၪ့ဆၧၥၫ့အလးတၭ, ဘိၪ့ထၪ့ဘၩထၪ့ပျီၩပျီၩယၧၩလီၫ. အဂဲးဘဲၫယီၩနၥံၪခွံၬၡိၭခွံၬယွၩ အဆၧမၪလူၬနီၪ, နၥံၪထီးန့ၦၡၩလီၩဆိၩလၬဆိၩဆၧတၭ, နၥံၪဘၧၩ့ လၩ့ဖၧၩ့ၥံၪ, လိၫ့ၥံၪ, ဒဲဆၧဂူၫဆၧဂၩဘဲၫနီၪအၥိၭ နၥံၪမၩအၪမံၩ့လီၫ.-

အဝ့ၫဒၪကိၭန့ ၦခမျၧးထီးအလူၬလၧအအီၪတၭ, စံၭအဝ့ၫၥံၪ, ခိၭနၪယလူတၭ,နၪၥ့ၪနၥံၪဝ့ၫကိၭဂၩဒ့ၭဆံၭ.- ဆၧအီၪလၧခီၫ့တၭ,လ့ၩနုၬဝ့ၫလၧၦၡၩအဖၧၩ့နီၪ, မၩစံၪစၪဝ့ၫၥ့ၪနးမံၩ့အ့ၬ. အ့ၪမွဲဆၧလၧအဂဲၫထၪ့ လၧအဖၧၩ့နီၪ,မၩစံၪစၪၦၡၩလီၫ.-

 အဂဲးဘဲၫယီၩဆၧကိၪ့ဆၧဖၭ လၧအအၧၩ့, ဆၧအဲၪဘိၩ့အဲၪဖၬ,ဆၧမၩမၪမုၪမၩမၪခွၫ, ဆၧမၩၥံၫၦၡၩ,- ဒဲဆၧအၪ့ဂူၪဆၧ, ဆၧလီၫ့ကီၩ့ၥၭကွံၩဆၧ,ဆၧအၧၩ့ဆၧၥၫ့ ဆၧအၪ့လံၬအၪ့လီၫ, ဆၧလၨၪဖၬ,ဆၧအမ့ၬအၧၩ့, ဆၧဒုၪဒွ့ၪ, ဆၧအီၪက့ၪထၪ့ထီၫအၥၭ,ဆၧကိၪ့လၥ့ၪဘၪလဖၪနီၪ, ဂဲၫထၪ့ဝ့ၫလၧၦၡၩအၥၭခံဖၧၩ့လီၫ.- ကယဲဆၧအအၧၩ့လဖၪထီး အလူၬယီၩ, ဂဲၫထၪ့လၧအၥၭခံဖၧၩ့တၭ, မၩစံၪစၪ ၦၡၩလီၫ.