နၫ့ဆါၥၧၫ့ဂၩယွၩလဂၩအဘိၪ့မုနံၩ

ယွၩလဂၩဎးနီၪ နၫ့ဆါအီၪဝ့ၫဒၪၥၧၫ့ဂၩအဂဲးယီၩ မွဲဝ့ၫဆၧလၩ့ဆၫ့လၩ့မဲၩလၧ ပကဘၪဆူနဲၩထိဆၧၫ့ဝ့ၫဒၪ ဂုးဂုးခၧၫ့ခၧၫ့နီၪလီၫႉ ပဝ့ၫၥံၪလဖၪ ပမွဲဝ့ၫဒၪ ဆၧဂဲးဆါဘၭဆါလဖၪတၭ ဘၪဆဲၫ့လၧကဆါယွၩအဂဲးအဖၭနီၪ ဆၧလၩ့ဆၫ့လၩ့မဲၩအီၪဝ့ၫဒၪဒိၪဒိၪအၪအၪလ့ၬအကၠီၩ့ ဘဲၫၥိၭပၥ့ၪယၫနၪၥ့ၪကဆါယွၩအဂဲးဂ့ၩဂ့ၩဘၪဘၪႇ လၧၫ့လၧၫ့ဎွ့ၩဎွ့ၩအဂး ကကၪဂဲၩဝ့ၫဒၪတၡါဒ့ၭနီၪလီၫႉ

အ့ၪမွဲပကအီၪပဲၩ့ခွံၬ ဖါကဆါႇ ဖိၪကဆါဒဲ ၥၭမုဆံၫ့ဎံၪကဆါလၧလံၬဆံၫ့ဎံၪဖၧၩ့စွါဘိၩ လံၬဆံၫ့ဎံၪယီၩအခီၫပယီၫအီၪလန့လၧၩ့ဘၪနီၪလီၫႉ

ဆၧၥီၪ့ဆၧၥၫ့လၧအမွဲဝ့ၫနၫ့ဆါၥၧၫ့ဂၩယွၩဂလၩဎးနီၪ ပကၭၥလံၬဎြံၬဖိၪၥံၪအဂး မွဲဝ့ၫဒၪဆၧၥီၪ့ဆၧၥၫ့ အဆိၫထုၬဒဲဆၧၥီၪ့ဆၧၥၫ့အကၧၩ့ဒိၪထုၬနီၪလီၫႉ

ပဆူပနဲၩနၫ့ဆါၥၧၫ့ဂၩယွၩလဂၩအဆၧနဲၪ့နီၪ မွဲဝ့ၫဒၪလၧပဆ့ၭလၩ့ထုၪ့စူၪယၫအဆၧနဲၪ့လၧပမိၡါဖၫ့ခိၪနီၪလီၫႉ ၦလၧအကဲၪပကၭၥလံၬဎြံၬဖိၪကိၭဂၩဒ့ၭနီၪ ကဖီၪ့ထၪ့ဖံၭထၪ့ဆၧမၩကမံၩ့မံၩ့အထီ ပအီၪစၭထၪ့ဝ့ၫဒၪလၧ ထုၪ့စူၪယၫအဆၧနဲၪ့လကၭဒံၭဘၪ ပအီၪပထုၬထဲၩ့ဝ့ၫဒၪလၧထုၪ့စူၪယၫအဆၪနဲၪ့ဒံၭနီၪလီၫႉ

ပဆ့ၭလၩ့ထုၪ့စူၪယၫလၧပမိၡါအဖၫ့ခိၪနီၪ လမွဲဘၪဆၧမၩအဘီၪဒဲဆၧမၩဘျိၪတၭႇ မွဲဝ့ၫဒၪပဒုၭနဲၪဖျီၪထၪ့ဝ့ၫဒၪ ပဆူၩနဲၩလၧၦဂူၫဂၩၥံၪအမ့ၬယၫနီၪလီၫႉ

ပဆ့ၭလၩ့ထုၪ့စူၪယၫအဆၧနဲၪ့လၧပမိၡါအဖၫ့ခိၪနီၪ ဖ့ၪနဲၪဖျီၪထၪ့အ့ၪပၧၩ ခၫ့ဖျီၫ့လၧထုၪ့စူၪယၫအကၠီၩ့ ပဒိၭန့ဘၪဆၧထိးထဲၩ့တၩ့ထဲၩ့ ဒဲလကၭဒံၭဘၪ မွဲဝ့ၫလၧပဖ့ၪနဲၪဖျီၪထၪ့ ပဆၧဆူနဲၪနၫ့ဆါၥၧၫ့ဂၩယွၩလဂၩ လၧဆူနဲၩအဒိၪအယိၬဖၧၩ့အဂဲးနီၪလီၫႉႉႉ

ပဝ့ၫၥံၪဘဲၫၥိၭပကဒိၭန့ဘၪ ဖါကဆါဒဲဖိၪကဆါဒဲၥၭမုဆံၫ့ဎံၪကဆါအဆိၪဂ့ၩဆိၪဘွၩအခိးအတၩအဆိၩအကၠၪအဂး ပကဘၪဆ့ၭလၩ့ဝ့ၫဒၪထုၪ့စူၪယၫအဆၧနဲၪ့လၧဆၧယူၭယၪ့အဖၧၩ့နီၪလီၫႉ