နီၫ့ယါလၩ့ထဲၩ့နၥံၪအၥၭဒဲနဲၩထဲၩ့ ဆၧၥၭထိၬပရၧၫ့

“အဆၧၫ့အထီ ဎွ့ၩထၪ့ယူၭတၭႇ ယွၩအဘၩ့အမုးနီၪ ဘူၭထၪ့ယူၭႇ နီၫ့ယါလၩ့ထဲၩ့နၥံၪအၥၭဒဲနဲၩထဲၩ့ ဆၧၥၭထိၬပရၧၫ့နီၪဆံၭ” ဆၧချဲၩ့ၥံၪလဖၪယီၩ လမွဲဘၪဆၧၥၭမဲၪၥၭဖျဲၩ့နီၪလီၫႉ အီၪလခီၫဒၪ ဆၧနီၪၥံၪလဖၪနီၪ မွဲဝ့ၫဒၪ ဆၧဒုၭဂၧၫ့ထၪ့ၥၩလၩ့ဆၧပရၧၫ့အမုၬႇ ၥၭထိၭ ဆၧပရၧၫ့ကမံၩ့နီၪလီၫႉ ဆၧကိၭဖံၭၥိၭ ပၧၩကိၭဂၩဒ့ၭနီၪ မွဲပကဘၪဆူနဲၩ့ ဆၧၥၭထိၬပရၧၫ့နီၪလီၫႉ ယွၩအစီၩ့အမၩ့နီၪ အီၪလၧပၧၩကၠၧၫ့ကၠၧၫ့ လၧ အဖိၪအလံၩၥံၪလဖၪအၥိၭနီၪလီၫႉ

အယီၩနီၪ မွဲဝ့ၫ ဆၧၥၭထိၬပရၧၫ့လီၫႉ လၧကၭဒ့ၭဘၪ ကဆါယ့ၫရူၬ ဘိၭဘၪၥ့ၪယၫ ဆၧမၩလၩ့လၭ ဆၧယီၩႇ အခိးအတၩယီၩႉ ဖါကဆါယွၩ အဲၪပၧၩနီၪ အီၪလၧပနဲၩ့ထံၭ ဒဲ ၥီၪ့ထဲၩ့ၥၫ့ထဲၩ့ပၧၩ ပကဘၪဂၭဖၭ လၧဆၧဆံၫ့ဎံၪ ဖၧၩ့ၥၭအဖၫ့အဖၧၩ့လီၫႉ

ယွၩအဘၩ့အမုးနီၪ အဂဲးဆီၫ့ဘၭဆီၫ့ တၡါႇ အဎိၩဒိၪထုၬနီၪလီၫႇ မွဲလါနၫ့ဘိၩ မွဲကဒိၭ ဂၪ့ခိၪချိၫ့အဆၧနီၪအ့ၬႉ မွဲဆၧဘဲၫနီၪၥိၭ ဆၧနီၪ အီၪဖျီၪလၧ အအၪထုၬ နးကၠၪအ့ၬလီၫႉ ဆၧနီၪ လၩ့ဂၬဝ့ၫဒၪလၧ  ဘံၭဆၧကိၪမံၪ လၧကိၪမုၬနီၪလီၫႉ ဆၧနီၪ လၩ့မါပံၭဝ့ၫ လါနၫ့ဘိၩ ဆၧနီၪ မၩဂဲထုၪ့ ကိၪၥံၫ့ဆ့ၬနီၪလီၫႉ

အဝ့ၫဒၪနီၪ ဒုၭနဲၪဖျီၪထၪ့ၥၭကဒိၭ ဘုၪကၠိၩ့ၥၪအဖျိၪ့လဖၪ ၥံၫဝ့ၫဒၪလၧဖံၬအဖၧၩ့ လါနၫ့ဘိၩ ၥၪထၪ့အၥၪလၧ ဖၧၩ့ၥၭအဖၧၩ့ယီၩနီၪလီၫႉ