နမွဲဎရံၬလီၫ

ယ့ၫၡုၬဒဲအထံၩအဖျဲၥံၪ စဲၪ့ထၪ့ဝ့ၫထဲၩ့လၧစ့ၭစရံအၫဖံလံၭအတဝၫ့လဖၪတၭ, အီၪလၧဖၧၩ့ၥၭအဘိၩ့ ဘၭနီၪ, ချဲၩ့ဒုၪ့အထံၩအဖျဲၥံၪတၭ,အၪ့စၪ့ဝ့ၫ, ၦၡၩလဖၪနီၪ, မွဲအစံၭလၧယမွဲပလၫလဂၩလဲၪ.- အဝ့ၫၥံၪချဲၩ့ဆၧၫ့ဝ့ၫ, ၦလနၩ့နၩ့စံၭဝ့ၫ, ၦဘၭတံၫဇၫ့ဆၧ စယီဟၫ့တၭ, အဂူၫဂၩစံၭဝ့ၫ, စအံၫလဲယၫတၭ, အဂူၫဂၩစံၭဝ့ၫမီၪလဂၩဂၩလီၫ.-

အဝ့ၫဒၪအၪ့စၪ့ဝ့ၫ, အ့ၪမွဲနၥံၪဝ့ၫဒၪယီၩ, မွဲနၥံၪစံၭယၧၩ, လၧယမွဲပလၫလဂၩလဲၪ. စပံတၧၫချဲၩ့ဆၧၫ့ဆၧတၭ, စံၭဝ့ၫဒၪ, နမွဲဎရံၬလီၫ. အဝ့ၫဒၪမၪလူၬဝ့ၫ ဘဲၫၥိၭအထီးလီၩဘၪအဂဲးအကၠီၪ့ လၧၦနးဂၩလဂ့ၩ.

အဝ့ၫဒၪၥီၪ့ထဲၩ့ၥၫ့ထဲၩ့ဆိၫဝ့ၫ လၧၦၡၩအဖိၪခွၫမိဘၪထိးဆၧအၪမံၩ့တၭ, မိဘၪဆၧခွံၬၡိၭ လၧၦၥုၪ့က့ၭၥၭၡါၥံၪ, ဒဲၦလုဆၧအဒိၪၥံၪ, ဒဲၦကွ့ၭလံၬၥံၪတၭ, မိဘၪဆၧမၩၥံၫဝ့ၫတၭ, ထီးအဘၪၥၧၫ့နံၩလနံၩနီၪ, မိဂဲထုၪ့ထဲၩ့ဝ့ၫလီၫ.- ချဲၩ့ဖျီၪထၪ့ဆၧချဲၩ့လထံၪနီၪ, စပံတၧၫမၩန့ဝ့ၫဒၪတၭ, အၪ့လၬၥၫ့ဝ့ၫလီၫ.- အဝ့ၫဒၪကၠၪစိၩအၥၭဒၪဘၪအထံၩအဖျဲၥံၪနီၪ,အၪ့လၬစပံတၧၫ တၭ,စံၭဝ့ၫဒၪ,ဒုၪဒၩဧ့, ထဲၩ့ကဒၩထဲၩ့နဝ့ၫလၧယလးခဲၫ့ဆံၭ. အဂဲးဘဲၫယီၩ နၥၭအီၪယွၩအဆၧအ့ၬ. မွဲ နၥၭအီၪလၧၦၡၩ အဆၧလခီၫလီၫ.

ထီးအကိၭန့ၦခမျၧး ဒဲအထံၩအဖျဲၥံၪ လၧအအီၪတၭ, စံၭအဝ့ၫၥံၪ, ထီးဒၪၦလၧဆၧမိဖိၬဘၪအၥၭ လၧယခဲၫ့လဂၩဂၩနီၪ, မွဲအခွံၬၡိၭခွံၬအၥၭဒၪဝ့ၫ, မၩန့အထုၪ့စူၪယၫတၭ, ဖိၬယခဲၫ့ဆံၭ.- အဂဲးဘဲၫယီၩ ထီးဒၪၦလၧအမိထိးထဲၩ့ဘၪအၥၭ လၧအၥၭမၧၫ့လဂၩဂၩနီၪ, အၥၭမၧၫ့မိလၩ့မါဝ့ၫဒၪလီၫ. ထီးဒၪၦလၧအၥၭမၧၫ့လၩ့မါခွံၬဝ့ၫလၧယကၠီၩ့, ဒဲလၧဆၧၥၭထိၬအပရၧၫ့အကၠီၩ့လဂၩဂၩနီၪ, မွဲအမိထိးထဲၩ့တၩ့ထဲၩ့ဝ့ၫလခီၫလီၫ.