ဆၧလီၩလၩ့လၬလၩ့ ဆၧၥၭထိၬပရၧၫ့ႇ ဝီအဆၧၫ့အထီ မုနွ့ၫ (၅)

ၦၡၩကိၭဂၩဒ့ၭ ကထီၩ့လၧဆၧၥၭမၧၫ့အလးႇ ကဘၪခၪ့ထ့ၭဖျီၫ့ ဆၧၥံၫကိၭဂၩဒ့ၭလီၫႉ ဘုၪချံၫကဖျိၪ အ့ၪအီၪဒၪ လၧဆၧလၭဒုၩႇ လၧထိၪ့ဖၧၩ့ႇ ဖၫ့ဖၧၩ့ႇ အ့ၪလလၩ့ထၬလၧဂၪ့ခိၪအဂ့ၩဖၧၩ့ႇ အ့ၪလအုၪၥံၫဘၪတၭႇ မဲၪထၪ့န့အ့ၬႇ ၥၪထၪ့န့အ့ၬႉ ဂုထၪ့အၪထၪ့န့အ့ၬႉ ဘဲၫနီၪအၥိၭ ၦလဂၩဂၩႇ အၪ့လဆၪ့လၩ့ဘၪၥၭႇ အ့ၪလဒိၭန့ဘၪ ယွၩအခိးအတၩနီၪႇ အ့ၪလဖ့ၪလၫ့လၩ့ဘၪၥၭ လၧယွၩအဂးႇ ဒဲၦဂူၫဂၩၥံၪအဂးနီၪ န့ဘၪဆၧၥၭမၧၫ့ လၧမူၭခိၪဘၩ့မုးအဖၧၩ့ အလးအီၪအ့ၬႉ

လၧမုကံၩယီၩ ဆၧၥၭထိၬပရၧၫ့ဖၧၩ့ႇ ပနါဂၧၫ့ဘၪ ယ့ၫၡုၬအဆၧၥီၪ့ဆၧၥၫ့ဖၧၩ့ႇ ပနါဂၧၫ့ဘၪ ယ့ၫၡူၬစံၭဝ့ၫႇ  ၦလၧအအဲၪအၥၭမၧၫ့ဒၪဝ့ၫနီၪႇ အၥၭမၧၫ့မိလၩ့မါခွံၬဝ့ၫလီၫ. ၦလၧအမ့ၬလဲၩ အၥၭမၧၫ့ဒၪဝ့ၫ လၧဂၪ့ခိၪချိၫ့ယီၩႇ မိန့ဘၪထဲၩ့အၥၭမၧၫ့အဆိၩဆိၩအကၠၪကၠၪလီၫ.

ၦလၧအအဲၪအၥၭမၧၫ့တၭ အၥၭမၧၫ့မိလၩ့မၬခွံၬလဖၪနီၪ မပၫလဲၪႉ ၦလၧဖၪနီၪ လၩ့ဂၬလၧဘုၪချံၫ လၧအလလၩ့ထ့ၭဘၪ လၧခိၪဖၧၩ့ႇ ဘုၪချံၫလၧ လအုၪၥံၫဘၪႇ လမဲၪထၪ့ႇ လဂုထၪ့အၪဘၪအၥိၭနီၪလီၫႉ

ပအီၪလၧဂၪ့ချိၪချိၫ့ဖၧၩ့ယီၩ အ့ၪပၥၭထၪ့ထီၫ့ႇ ပစီၪဎိၩလၩ့ပၥၭႇ အ့ၪပၥ့ၪယၫအဲၪကွံၩလၩ့န့ၫပနၫ့ဆါႇ ပၥ့ၪယၫလၩ့န့ၫပဂးႇ  အ့ၪပၥ့ၪယၫအၪ့ဎၬန့ၫ ဂၪ့ခိၪဆၧမုၬဆၧလၩႇ ဂၪ့ခိၪအစူၪလးခၪ့ခိၪလၧၫ့စွါဘိၩႇ ပၥၭမၧၫ့ကလၩ့မါဝ့ၫဒၪလီၫႉ

ၦလၧအမ့ၬလဲၩအၥၭမၧၫ့တၭႇ မိန့ဘၪထဲၩ့အၥၭမၧၫ့ဆိၪကၠၪလဖၪနီၪ မွဲပလၫလဖၪလဲၪႉ ၦလဖၪနီၪ လၩ့ဂၬလၧဘုၪချံၫလၧ အလၩ့ထ့ၭ လၧဂၪ့ဂ့ၩအဖၧၩ့တၭႇ မဲၪထၪ့ႇ ဖီၫထၪ့ၥၭထၪ့အၪအၪလ့ၬအၥိၭနီၪလီၫႉ ၦလၧအဆၪ့လၩ့အၥၭႇ ၦလၧအဆူနဲၩကဆါယွၩႇ ၦလၧအခိၭနၪယွၩအလူအထၫႇ အဒိၭနဲၩ့ၥၭလၧယွၩႇ အဖ့ၪလၫ့လၩ့ၥၭ(အဆၧၥၭမၧၫ့) ႇ အထိးၡၪ့ထိနၭၥၭ လၧကဆါယွၩအဘၩ့အမုးအဂး ဒဲၦဂူၫဂၫအဂးလဖၪနီၪ မွဲန့ဘၪထဲၩ့ ဆၧၥၭမၧၫ့ဆိၩကၠၪ လၧမူၭခိၪဘၩ့မုးအဖၧၩ့လီၫႉ