ဆၧလီၩလၩ့လၬလၩ့ ဆၧၥၭထိၬပရၧၫ့ႇ ဝီအဆၧၫ့အထီ မုနွ့ၫ (၁)

ၦအံစရ့ၩလၭဖိၪစဲၪထၪ့ လၧခးအံၫကၠ့ၭအဖၧၩ့ဂီၩ့ႇ အဝ့ၫၥံၪလ့ၩဂၭဝံၩ့ဝၩ့ လၧမံၩ့လၬကျၩဖၧၩ့ အနံၪ့ ၄၀ ဂီၩ့မၬဆံၭႇ လ့ၩနုၬဘၪလၧယွၩအလူအီၪဝဲၩကဖ့ၪလၫ့အဝ့ၫၥံၪအလးနီၪလီၫႉ 
ဆၧဝံဆၧနၭ ၄၀ ယီၩႇ မွဲဝ့ၫဒၪဆၧတဲၩ့ဝဲၩၥၭအခံၫ့လီၫႉ ယွၩတဲၩ့ဝဲၩအၡၩခမျၧး အနံၪ့ ၄၀ႇ ၥီၪ့ထဲၩ့ၥၫ့ထဲၩ့ဝ့ၫႇ လုအၪ့လုအီၩႇ ယိထဲၩ့ခွါထဲၩ့ႇ ပဒၩ့ထၬအဝ့ၫၥံၪ လၧပယဲဆၧနိၫ့ဆၧနၭႇ ဆၧလၩ့အၪ့ယိၫလဖၪလီၫႉ 
ပအီၪၥၭမၧၫ့လၧဂၪ့ခိၪချိၫ့ဖၧၩ့ယီၩ မီၪ့ဎီၩ့ဒၪ ပလ့ၩဆၧလၧမံၩ့လၬကျၩအဖၧၩ့လီၫႉ ၦလၧအမိလ့ၩလၧယွၩအီၪအလးကိၭဂၩဒ့ၭနီၪ ပဘၪခၪ့ဂၭဖျီၫ့ႇခၪ့ထ့ၬ ဆၧအလးယီၩလီၫႉ ဆၧခိဆၧဂီၩႇ ဆၧၡၪ့ဆၧနၭႇ ဆၧၥၭဝံၥၭဆၧအၪ့ဆၧအီၩႇ မုခီၩလဲးအဆၧအၪ့လီၫႇ ဆၧကျဲၩ့ဖစီၩ့ႇ ဆၧလၩ့ၥၭမဲၪလဖၪအီၪဝ့ၫအၪမၬလီၫႉ လါနၫ့ဂ့ၩႇ ယွၩအီၪလၧအၡၩခမျၧးအၥိၭႇ ယွၩလ့ၩဆၧကၠၧၫ့ကၠၧၫ့ႇ လၧမံၩ့လၬကျၩအဖၧၩ့လီၫႉ 
ပကဘၪလ့ၩႇ မၩ ဘဲၫယွၩနဲၪအ့ၪပၧၩႇ ဘဲၫယွၩအၪ့မၧၫ့ပၧၩအၥိၭနီၪလီၫႉ ဘဲၫယွၩအၥၭမု အီၪလၧယ့ၫၡူၬအၥိၭႇ ဖ့ၪဂဲးဖ့ၪဘၭအၥိၭႇ ဘဲၫအၥီၪ့လဖၪ လုအၪ့လုအီၩယ့ၫၡူၬအၥိၭႇ အ့ၪပခိၭနၪယွၩအလူၪႇ အ့ၪပမၩဘဲၫယွၩအၥၭအီၪဝ့ၫၥိၭစွါဘိၩႇ ယွၩအၥၭမုဆံၫ့ဎံၪ ကနဲၪအ့ၪပၧၩဖၧၩ့ၥၭႇ ပဖ့ၪဂဲးဖ့ၪဘၭပၧၩႇ ဒဲ ယွၩအၥီၪ့ဒဲအၡၩဆံၫ့ဎံၪလဖၪႇ ကမၩဆၧၩ့ပၧၩႇ ပဝၩ့ဖီၩ့ထၬပၧၩႇ ပဒၩ့ထၬပၧၩ ခၫ့ဖျီၫ့လၧအဝ့ၫၥံၪအဆၧဘၭဆိၪလီၫႉ 
ဝီအဆၧၫ့အထီ အၥၫ့ ၄၀ ဆၧတဲၩ့ဝဲၩအထီ ခၫ့ဖျီၫ့ ဆၧဘၩဆိၪႇ ဆၧဒုၪဆၧအၪ့ဆၧအီၩႇ ဒုၭဆၧၫ့ထဲၩ့ ဒုၪဒၩလဖၪႇ 
ယ့ၫၡူၬမၩနၧၩ့ထဲၩ့မုခီၩလဲးအဆၧလံၭအၪ့လီၫႇ လၧယွၩအလူအထၫႇ အဆၧတီၩဆၧလီၩ့လီၫႉ 
ခၫ့ဖျီၫ့လၧဆၧၥူၫဝၭဆံၫ့ဎံၪႇ ဆၧဖ့ၪအၪ့ထၪ့နးၥၭဂဲးဘၭစၫကြၫမဲၩတူၩလဖၪတၭႇ ပဒိၭန့ဘၪ ၥၭမုဆံၫ့ဎံၪအခိးအတၩလဖၪလီၫႉ 
ဆၧနီၪ့ယါ
၁ စပံတၧၫ့ ၅:၈-၉ ထီးလၩ့နၥံၪအၥၭဆံၭႉ အီၪခိၭဆၧဆံၭႉ အဂဲးဘဲၫယီၩ ဘဲၫဆၬလၥၧၫ့ယုၩ့ဆၧအၥိၭနီၪ နၥံၪအဒုၪအဒၩ မုၪခီၩလဲးစဲၪ့ဝံၩ့ဝၩ့ႇ အၪ့ဎၬၦၡၩလၧအမိအၪ့ယုလၩ့ဝ့ၫလီၫႉ အီၪဂုးအီၪခၧၫ့လၧဆၧနဲၩအဖၧၩ့တၭႇ ပဒၩ့အဝ့ၫဆံၭႉ