ဆၧလီၩလၩ့လၬလၩ့ ဆၧၥၭထိၬပရၧၫ့ႇ မုအီၪပွံၭနံၩ မုနွ့ၫ (၅)

စလုကၭ ၄:၁၈ အဖၧၩ့နီၪ  စံၭထၬဝ့ၫႇ

ယွၩအၥၭအီၪလၧယလီၩ့ႇ ယွၩဂုၪယၧၩလၧၥိၪႇ ဘဲၫၥိၭပမိလီၩလၩ့လၬလၩ့ ဆၧၥၭထိၬအပရၧၫ့ လၧၦၡၪ့ဖိၪယၬဖိၪႇ -မၩဘျၪထဲၩ့ ၦအၥုၪ့ခါအၥၭလၩ့ႇ -ယမိကိၭထၪ့ ဆၧဖီၩ့ဖျ့ၭ လၧၦဘၪဆၧအၪ့မၧၫ့ဎီးဝ့ၫအဂးႇ -ဒုၭဒၪထၪ့ထဲၩ့ ၦအမ့ၬဘျီၪႇ -မၩဖီၩ့ခွံၬ ၦဘၪဆၧမၩအၧၩ့မၩနၭလဖၪလီၫႉ

ပဒၪဘၪ ယ့ၫၡူၬဆၧလီၩလၩ့လၬလၩ့ဆၧႇ မၩဘျၪထဲၩ့ၦစူၭၦဆၫႇ မွဲန့ၫ လၧကၫပနအၧၫ့အဖၧၩ့ႇ မွဲန့ၫဆၨၩကဆၨၩအဂးလၧၫ့မွဲအ့ၬႉ ဘၪနီၪလဲၪႇ ကဆါယွၩႇ ဒဲအဝ့ၫအခိးအတၩႇ ႇ အဆၧယၫ့ၥုၪ့ယၫ့ၥၭႇ အဆၧထိးထဲၩ့တၩ့ထဲၩ့နီၪ မွဲၦၡၩကိၭဒ့ၭႇ ၦဆၨၩကိၭဆၨၩႇ မွဲဂၪ့ခိၪထၧၫ့ဖျိၫ့ယၫအဂးအကၠီၩ့လီၫႉ

ဆၧနီၪအကၠီၩ့ႇ ယ့ၫၡူၬမၪလူၬထွ့ၫအထံၩအဖျဲႇ  ဘဲၫၥိၭအဝ့ၫၥံၪ ကလ့ၩလီၩလၩ့လၬလၩ့ဆၧၥၭထိၬအပရၧၫ့ လၧဂၪ့ခိၪထၧၫ့ဘံၪ့ယၫအဖၧၩ့နီၪလီၫႉ

လၧဆၧဒဲၩဘၭအကၠီၩ့ႇ ၦဂၪ့ခိၪဖိၪကိၭဂၩဒ့ၭႇ ဘၪထိးဆၧစူၭဆၧဆၫႇ ဆၧၡၪ့ဆၧယၬႇ ဆၧၥံၫဆၧဆၫလဖၪလီၫႉ ကဆါယ့ၫၡူၬဂဲၫလၩ့လၧဂၪ့ခိၪချိၫ့ဖၧၩ့ယီၩႇ ၥီၪ့လိၪနဲၪလိၪအ့ၪၦၡၩ ယွၩအဂဲးႇ ယွၩအဆၧအဲၪႇ အဆၧယၫ့ၥုၪ့ယၫ့ၥၭႇ မၩဘျၪထဲၩ့ၦစူၭၦဆၫႇ ကွဲၪဖျါခွံၬၦဆၧဒဲၩဘၭဖိၪလဖၪလီၫႉ

လၧမုကနံၩယီၩလံၬဆံၫ့ဎံၪအဖၧၩ့ႇ ပဒၪဘၪ

ယ့ၫၡူၬလ့ၩအၪ့ကံၩ့ဘၩဆိၪဖၪဆၧ လဂီၩနၪခုၬႇ လ့ၩကၧၩ့ဖျိၪ့ၥၭ လၧအဖါကဆါယွၩလီၫႉ ယ့ၫၡူၬစၭထၪ့အမုနံၩႇ လၧဆၧအၪ့ကံၩ့ဘၩဆိၪဖၪလီၫႉ လၧလံၬဆံၫ့ဎံၪဆၧၥၭထိၬပရၧၫ့ႇ ယ့ၫၡူၬလ့ၩအၪ့ကံၩ့ဘၩဆိၪဖၪဆၧကိၫမၬကိၫမၬအဂဲးနီၪ ပဖီဘၪလီၫႉ ယ့ၫၡူၬနီၪ ဘဲၫယွၩအဖိၪအၥိၭႇ လၧၫ့ဎွ့ၩဝ့ၫလၧအစီၩ့အမၩ့လါနၫ့ဂ့ၩႇ  မုကိၭနံၩႇ ကိၭအဆၧၫ့အထီဒ့ၭႇ အဝ့ၫအၪ့န့အခံၫ့ႇ ကၧၩ့ဖျိၪ့ၥၭအဖါယွၩႇဒဲၥၭမုဆံၫ့ဎံၪကၠၧၫ့ကၠၧၫ့လီၫႉ

ဘဲၫၦၡၩကဂၩအၥိၭႇ အဝ့ၫဘၪကၧၩ့ဖျိၪ့ၥၭလၧကဆါယွၩႇ အၪ့န့အဂဲးအဘၭလၧယွၩအအီၪလီၫႉ

ထၧၫ့ဖုဝဲမုၪခွၫပဆူနဲၩဖိၪၥံၪဧ့ႇ

ခၫ့ဖျီၫ့လၧ ဆၧၥူၫဝၭဆံၫ့ဎံၪစဲကကြၫမဲၩတူၩအကၠီၩ့ႇ ပကဲၪထၪ့ဎြံၬဖိၪလဖၪႇ ယ့ၫၡူၬအထံၩအဖျဲလဖၪယီၩႇ ပကဘၪယိဒီၩ့ ကဆါယ့ၫၡူၬလီၫႉ

ဘဲၫယ့ၫၡူၬစၭထၪ့အမုနံၩ လၧဆၧအၪ့ကံၩ့ဘၩဆိၪဖၪႇ ကၧၩ့ဖျိၪ့ထၪ့ၥၭလၧယွၩအၥိၭႇ ပကဘၪစၭထၪ့ ပဆၧၥၭမၧၫ့မုကိၭ လၧဆၧဘၩဆိၪႇ ဆၧဘိၪ့ထၪ့ဘၩထၪ့ယွၩႇ ဆၧစံၭထၪ့အၪ့အူၭယွၩအဖၧၩ့လီၫႉ လၧမုကနံၩအထးအဖၧၩ့ႇ ဆၧကၪဆၧဂဲၩႇ ဆၧၡၪ့ဆၧယၬႇ ဆၧကျဲၩ့ဖစီၩ့လဖၪႇ ပခၫ့ဂၬဖျီၫ့ကန့အဂးႇ ပကဘၪအၪ့ကံၩ့ထၪ့ယွၩအခိးအတၩလဖၪလီၫႉ

ဆၧလီၩလၩ့လၬလၩ့ ဆၧၥၭထိၬအပရၧၫ့ႇ ဆၧမၩဘျၪထဲၩ့ ၦစူၭၦဆၫႇ ဒဲဆၧအၪ့ကံၩ့ဘၪဆိၪႇ ဆၧမၩလဖၪနီၪ ကဆါယ့ၫၡူၬအီၪက့ၪလၩ့ထး လၧအထံၩအဖျဲၥံၪအစူၪဖၧၩ့ႇ လၩ့ဆၫ့ဒၪဆၧႇ လၧအဆၧအီၪကီၪ့အစူၪလီၫႉ ဆၧနီၪအကၠီၩ့ႇ ပဝ့ၫဎြံၬဖိၪၥံၪကိၭဂၩဒ့ၭယီၩႇ ပမူၩအီၪဝ့ၫလၧ ပကဘၪ ပကဘၪထိးပၥၭ လၧဆၧၥၭထိၬအပရၧၫ့အဂးႇ ပကဘၪမၩဘျၪထဲၩ့လိၬၥၭ အဆၧစူၭဆၧဆၫႇ ခၫ့ဖျီၫ့လၧဆၧကွဲၪဖျါခွံၬလိၬၥၭအဆၧဒဲၩဘၭႇ ဒဲဆၧဖ့ၪဂဲးဖ့ၪဘၭလိၬၥၭႇ ဒဲဆၧအၪ့ကံၩ့ဘၩဆိၪန့လိၬၥၭအဂးလီၫႉ