ဆၧလီၩလၩ့လၬလၩ့ ဆၧၥၭထိၬပရၧၫ့ႇ မုအီၪပွံၭနံၩ မုနွ့ၫ (၃၃)

ယွၩဖ့ၪလၫ့ထၬၦၡၩ အခံၫ့ႇ အခွးအယါႇ အခိးအတၩလဖၪနီၪႇ မွဲၦၡၩကဘၧၩ့လၩ့ထၬႇ ကအီၪက့ၪၥူၫထၬအဂးမွဲအ့ၬႉ မွဲန့ၫၦၡၩအနၫ့ဆါဒၪဝ့ၫအဂးမွဲအ့ၬႉ ၦၡၩကဘၪၥိၩ့ဆၧလဖၪနီၪ ၦၡၩအဂူၫဂၩအခိးအတၩႇ အဆၧထိးထဲၩ့တၩ့ထဲၩ့အဂးလီၫႉ 
  ကဆါယွၩအီၪက့ၪထး ဂၪ့ခိၪအဆၧဖိၪဆၧလံၩႇ လၧၦၡၩအစူၪဖၧၩ့လီၫႉ ဆၧဖိၪဆၧလံၩႇ ဒဲကယဲယွၩအဆၧတဲၩ့လၩ့ထီးလူၬႇ ပနးၥၭႇ ပဂံၪ့ဒီၪ့ႇ ပခရၧၫ့ႇ ဆၧနီၪလဖၪ ယွၩအီၪက့ၪထးလၧ ပစူၪဖၧၩ့လီၫႉ ဆၧလဖၪနီၪ မွဲဝ့ၫဒၪ ယွၩအဆၧတဲၩ့လၩ့ႇ ယွၩအဆၧတၭႇ မွဲၦၡၩအဆၧအ့ၬႉ ၦၡၩအမူၩဒၩအီၪလၧကဘၪႇ ယိထဲၩ့ခွါထဲၩ့ႇ မၩဎံၫထၪ့လၩထၪ့အဂးနီၪလီၫႉ ဆၧနီၪအကၠီၩ့ႇ ဘဲၫၦၡၩအၥၭအီၪအၥိၭႇ ၦၡၩဘၪၥၭအၥိၭႇ ၦၡၩမၩန့အ့ၬႉ ဘဲၫယွၩဘၪၥၭအၥိၭႇ ယွၩမၪလူၬထၬအၥိၭႇ ၦၡၩကဘၪမၩနီၪလီၫႉ
ယွၩအဖိၪခွၫ ကဆါယ့ၫၡူၬဂဲၫလၩ့လၧဂၪ့ခိၪချိၫ့ႇ ထိးထဲၩ့တၩ့ထဲၩ့ၦဆၧဒဲၩဘၭဖိၪၥံၪ လၧအထိးၥံၫၥၭ လၧထုၪ့စူၪယၫဂီၩ့ႇ အဝ့ၫမၧၫ့ထၪ့ထဲၩ့ႇ အဝ့ၫလထဲၩ့ထၪ့ထဲၩ့ဒံၭဘၪႇ လၧအဖါယွၩအအီၪႇ အဝ့ၫဖ့ၪလၫ့ထး ၦၡၩႇ အခိးအတၩႇ အစီၩ့အမၩ့ႇ အလူအထၫႇ အမိၡါႇ အယၫအၥွံၪႇ ဒဲစဲကရၫမဲၩတူၩလဖၪလီၫႉ 
လၧဂၪ့ခိၪချိၫ့ဖၧၩ့ယီၩႇ ၦၡၩကဂၩဒဲကဂၩႇ န့ဘၪအခိးအတၩႇ ဆၧၥ့ၪဆၧဘၪႇ ဆၧၥ့ၪယၫနၪၥ့ၪႇ စူၪလးခၪ့ခိၪႇ ကျိၪစ့ၩႇ အအၪအၡၩႇ အဖုၫအထီၫႇ အဎိၩအဆံၭမီၪ့ဎီၩ့အ့ၬႉ လါနၫ့ဂ့ၩႇ ၦကိၭဂၩန့ဘၪအခိးအတၩကိၩဂၩဒ့ၭလီၫႉ ဆၧနီၪအကၠီၩ့ ဆၧလၧယွၩဖ့ၪလၫ့ထၬပၧၩႇ အခံၫ့ႇ အခိးအတၩႇ အဂဲးအဘၩႇ ဆၧအလူဒိၪဎွ့ၩဒိၪလဖၪနီၪ ပကြၨၭမၩလူၬဂီၩ့အ့ၬႉ 
ဘဲၫၦၡၩန့ထၬဘၪအခိးအတၩအၥိၭႇ အအၪမွဲဂ့ၩႇ အၡၩမွဲဂ့ၩႇ ၦလၧအန့ထၬဘၪအခိးအတၩ အၪအၪလဖၪနီၪႇ အမူၩဒၩအီၪဝ့ၫအၪအၪ လၧကဘၪမၩခိးမၩတၩၦၡၩအဂူၫဂၩအၪအၪအၥိၭႇ ၦလၧအန့အခိးအတၩၡၩလဖၪနီၪဆ့ႇ ဘဲၫအဂဲးအဘၭႇ အခိးအတၩန့ဘၪအၥိၭႇ ကဘၪမၩဆၧၩ့ႇ မၩခိးမၩတၩၦၡၩအဂူၫဂၩလီၫႉ