ဆၧလီၩလၩ့လၬလၩ့ ဆၧၥၭထိၬပရၧၫ့ႇ မုအီၪပွံၭနံၩ မုနွ့ၫ (၃၂)

ကဆါယွၩမၪလူၬပၧၩႇ ပကဘၪအီၪခိၪဆၧႇ အီၪတဲၩ့ဝဲၩပၥၭႇ လၧဆၧၥုၪ့ဆၧၩ့ၥၭဆၧၩ့ႇ ဆၧထုၪ့ၥုၪ့ထုၪ့ၥၭဒိၪဒိၪလ့ၬအဖၧၩ့လီၫႉ ပအီၪလၧဂၪ့ခိၪချိၫ့ယီၩအထီႇ အ့ၪပခိၭနၪကဆါယွၩအလူၬအထၫမၬႇ အ့ၪပမၩလၧၫ့ထၪ့ဎွ့ၩထၪ့ယွၩအၥၭမၬႇ အ့ၪပဆၧအဲၪဆၧကွံၩအီၪမၬႇ ပကလၩ့ဂၬယွၩအဖိၪအလံၩလီၫႉ  
ပကိၭထၪ့ယွၩအမံၩ့ႇ ပစံၭလၩ့ပၥၭ ဎြံၬဖိၪၥံၪႇ လၧအယွၩအဖိၪအလံၩလါနၫ့ဂ့ၩ ဘဲၫယွၩအၪ့မၧၫ့ပၧၩႇ မၪလူၬပၧၩအၥိၭႇ အ့ၪပလခိၭနၪႇ ပလမၩဘၪစွါဘိၩႇ မီၪဎီၩ့ဒၪ ပမီၪ့ဘံၭယွၩတၭႇ အလးခဲၫ့ထုၬမုနံၩကကၠၪႇ ယွၩကမီၪ့ဘံၭထဲၩ့ပၧၩႇ ကစံၭပၧၩႇ ပၥ့ၪယၫနၥံၪအ့ၬႉ 
ဆၧနီၪအကၠီၩ့ ယ့ၫၡူၬစံၭပၧၩႇ 
 အီၪခိၭဆံၭ. အဂဲးဘဲၫယီၩ (ၦၡၩအဖိၪခွၫမိဂဲၫဝ့ၫ) အနံၩအၥၫ့နီၫလဲၪ, အနၩရံၩနီၫလဲၪနီၪ, နၥံၪၥ့ၪယၫအ့ၬ. 
ထၧၫ့ဖုဝဲမုခွၫၥံၪဧ့ႇ လၧမုနံၩယီၩလံၬဆံၫ့ဎံၪအဖၧၩ့ႇ ပနါဂၧၫ့ဘၪ မ့ၪဒိၩဒဲၥိၪအဂဲးလီၫႉ 
ဆၧလၧမ့ၪဒိၩ့နီၪ ၥိၪအ့ၪလပၫဘၪ န့ကၩဆၧနးမံၩ့အ့ၬႉ ပၥိၩ့ၥ့ၪအ့ၬႉ ဘဲၫနီၪအၥိၭႇ လၧၦၡၩအဖၧၩ့ ယွၩအ့ၪလအီၪဘၪႇ ယွၩအခိးအတၩအ့ၪလပၫဘၪႇ ၦၡၩအၥၭမၧၫ့န့အ့ၬႉ 
အၪ့အူၭ ၁၁၉:၁၀၅ စံၭထၬဝ့ၫႇ နလူနထၫနီၪ မွဲမ့ၪဒိၩ့လဖျိၪ့ လၧယခၪ့အဂးႇ ဒဲဆၧဖၧၩ့လဖျိၪ့ လၧယဖၧၩ့ၥၭအဂးလီၫႉ 
ယွၩအလူအထၫနီၪ မွဲဝ့ၫဒၪ မ့ၪဒိၩ့ဒဲၥိၪ လၧၦဆူၩနဲၩဖိၪၥံၪအဂးလီၫႉ ယွၩအလူအထၫနီၪ လၧဎွ့ၩလၧအစီၩ့အမၩ့ႇ တဲၩ့လၩ့ဆၧထီးလူၬႇ မၩဆံၫ့ထၪ့ဎံၪထၪ့ၦၡၩႇ ဒဲမွဲဝ့ၫ ဆၧဖၩ့လၧအနဲၪအ့ၪၦၡၩဆၧၥၭမၧၫ့ဆိၩကၠၪအဖၧၩ့ၥၭနီၪလီၫႉ   
ၦၡၩကဂၩအဆၧဂ့ၩဆၧဘွၩႇ အပၩရမံၫလဖၪနီၪ ပယိဒီၩ့န့လါနၫ့ဂ့ၩႇ ဘဲၫကျိၪစ့ၩႇ စပိၭစလၫ့အၥိၭႇ ပအၪ့လီးႇ ပလ့ၩအၪ့ကံၩ့ လၧၦၡၩအဂူၫဂၩအအီၪန့အ့ၬႉ ပဖ့ၪလၫ့အ့ၪၦၡၩအဂူၫဂၩန့နးဆ့အ့ၬႉ 
ပဆၧဂ့ၩဆၧဘွၩႇ ပၩရမံၫလဖၪ ကအၪထၪ့အဂး ပကဘၪကၠ့ၭစၨၭႇ ခိးဂဲးခိးဘၭဒၪပၧၩလီၫႉ 
ၦအဂီၩ့လဖၪ ဂဲၫထဲၩ့ဒိၪထိၬတရၫ့လါနၫ့ဂ့ၩႇ ဆၧဝဲထၪ့န့အဂးလၧၩ့အ့ၬႉ အဝ့ၫဂဲၫထဲၩ့ဒိၪထိၬတရၫ့နီၪ အခံၫ့အခၫဘၪလၧၩ့အ့ၬႉ အဝ့ၫၥံၪ ဆၧထုၪ့ၥုၪ့ထုၪ့ၥၭႇ ဆၧတဲၩ့ဝဲၩၥၭလအီၪအကၠီၩ့လီၫႉ 
ယွၩဖ့ၪလၫ့ထၬပၧၩႇ အခံၫ့ဒဲအခိးအတၩလၧၫ့လၧၫ့ဎွ့ၩဎွ့ၩလီၫႉ ပၥၭမၧၫ့အခံၫ့ယီၩႇ မွဲဝ့ၫဒၪ ဆၧအီၪခိၭယိလါယွၩအခံၫ့လီၫႉ ပကဘၪအီၪတဲၩ့ဝဲၩပၥၭႇ လၧဆၧဆူနဲၩႇ ဆၧယိလါဒဲ ဆၧအဲၪဆၧကွံၩအမ့ၪဒိၩ့ခဲၩဖၩ့ထၪ့အဖၧၩ့တၭႇ လၧဆၧဂ့ၩဆၧဘွၩႇ ဆၧတီၩဆၧလီၩ့အဂး ပကဘၪဝဲထၪ့ထၬပၥုၪ့ပၥၭလဖၪလီၫႉ ပဆၧဆူနဲၩအမ့ၪဒိၩ့ ကခဲၩထၪ့အဂးႇ ပကဘၪအီၪခိၭယွၩ လၧဆၧမၩဂ့ၩမၩဘွၩႇ ဆၧမၩဘိၪ့မၩထးဆၧအဖၧၩ့ႇ လၧအၪ့ကံၩ့ဘၩဆိၪဖၪဆၧအၪအၪလ့ၬအဖၧၩ့ ဒဲဆၧဒိၭန့ စဲကရၫမဲၩတူၩလဖၪအဖၧၩ့နီၪလီၫႉ