ဆၧလီၩလၩ့လၬလၩ့ ဆၧၥၭထိၬပရၧၫ့ႇ မုအီၪပွံၭနံၩ မုနွ့ၫ (၁၇)

ၦၡၩအီၪလၧဂၪ့ခိၪချိၫ့ယီၩအထီႇ အဆၧထိစိၩႇ အဆၧဆိၫ့မုလါကမံၩ့မံၩ့ႇ ကလၧၫ့ထၪ့ဎွ့ၩထၪ့အဂး ဘၪထိးၡၪ့ထိးနၭၥၭႇ ဘၪဖ့ၪလၫ့လၩ့ၥၭႇ ဒဲဘၪခိးဂဲးခိးဘၭဝ့ၫနၭမၬလီၫႉ 
အ့ၪပယိထၪ့ထံၫၥံၪခးၥံၪအဖးဖီၩ့စွါဘိၩႇ ၦၡၩခမျးၥံၪ အဆၧထိစိၩႇ အဆၧဆိၫ့မုလါလဖၪႇ ကလၧၫ့ထၪ့ဎွ့ၩထၪ့အဂးႇ ထံၫခးအဆၧဖီၩ့ဖျ့ၭကန့အဂးႇ ဆၧဎူၫဆၧဎၩ့ႇ ဆၧလ့ၩထၪ့လ့ၩထီၫကအီၪထၪ့ဝ့ၫအဂးႇ အဝ့ၫၥံၪဘၪခိးဂဲးခိးဘၭႇ ထိးၡၪ့ထိးယၬၥၭႇ ဘၪထိးစ့ၩရၫ့လၧထီၫ့ဖၧၩ့ႇ ဒဲလနၩ့နၩ့ ဘၪဖ့ၪလၫ့ခွံၬအဆၧၥၭမၧၫ့ဆ့လီၫႉ 
အ့ၪပယိထၪ့ လၧကၭၥလ့ၬဆၧအီၪကီၪ့အဖးဖီၩ့ဖၧၩ့စွါဘိၩႇ ပဒၪဘၪယ့ၫၡုၬအဆၧအၪ့မၧၫ့ဖိၪႇ အထံၩအဖျဲလဖၪႇ စဲၪဒၪခွံၬ အမိအဖါႇ အဂံၪ့အဎၫ့ႇ အဆၧဖံၭဆၧမၩ ထီးလူၬဂီၩ့ႇ ဖိၬထၪ့ကဆါယ့ၫၡူၬအခဲၫ့လီၫႉ လကၭဒ့ၭဘၪ ၦထိအၥၭႇ ၦဆံၫ့ဎံၪလဖၪႇ ၦမၫတူၩရၫလဖၪ အဝ့ၫၥံၪစဲၪဒၪခွံၬႇ ဖ့ၪလၫ့ခွံၬ ဂၪ့ခိၪအစူၪလးခၪ့ခိၪႇ အဆၧမုၬဆၧလၩထီးလူၬဂီၩ့ႇ ဖိၬထၬကဆါယ့ၫၡူၬအခဲၫ့လီၫႉ 
ၦၡၩကန့ဘၪမူၭခိၪဘၩ့မုးအဂးႇ ကဘၪဖ့ၪလၫ့ခွံၬႇ အၪ့ဆၫခွံၬအဆၧႇ အစူၪလးခၪ့ခိၪထီးလူၬအကၠီၩ့ ပနါဂၧၫ့  ဘၪလံၬဆံၫ့ဎံၪအဖၧၩ့နီၪလီၫႉ  
လၧဆၧၥၭထိၬပရၧၫ့ စမၭၥုၫ(၁၉:၁၆-၂၂ )  ပဖီဘၪၦၥထံၫလဂၩႇ ဂဲၫအၪ့စၪ့ကဆါယ့ၫၡုၬႇ ယကန့ဆၧၥၭမၧၫ့ဆိၩကၠၪအဂးႇ ယကဘၪမၩမန့လဲၪႇ ယ့ၫၡုၬစံၭဆၧၫ့အဝ့ၫႇ ထီးန့ဖံၭထၬ ဆၧမၪလူၬ(၁၀) ထုၪနီၪဆံၭႉ အဝ့ၫစံၭဝ့ၫႇ ယထီးဖံၭထၬယူၭဆၧနီၪလဖၪယူၭႇ ပကဘၪဆၧအဂူၫကမံၩ့မံၩ့ဒံၭဧၪႇ ယ့ၫၡူၬစံၭအဝ့ၫႇ အၪ့ဆၫခွံၬနစူၪလးခၪ့ခိၪလဖၪႇ ဖ့ၪလၫ့ၦၡၪ့ဖိၪယၬဖိၪဂီၩ့ႇ ဖိၬယခဲၫ့ဆံၭႉ နမိန့ဘၪဆၧလူဒိၪဎွ့ၩဒိၪလၧမူၭခိၪဘၩ့မုးအဖၧၩ့လီၫႉ 
ၦၡၩအီၪလၧဂၪ့ခိၪချိၫ့ယီၩအထီ ၦၡၩပကဘၪအၪ့ဎၬ ယွၩအဘၩ့အမုးအဆၧလူဒိၪဎွ့ၩဒိၪလဖၪနီၪလီၫႉ ယ့ၫၡူၬစံၭထၬဝ့ၫႇ အၪ့ဎၬဆိၫ ယွၩအဘၩ့အမုး ဒဲဆၧတီၩဆၧလီၩ့နီၪဆံၭႉ 
ယ့ၫၡူၬအဆၧချဲၩ့ဒီၩ့လၩ့ ၥၧၫ့ထုၪလထုၪယီၩ မွဲဝ့ၫၦခွံၬၡၬအဂဲးလီၫႉ ဘဲၫၦမၩယၪႇ ရွံန့ယၪအဂ့ၩႇ ယၫအအွံၪလဖၪ တၭႇ ဒုၭနုၬလၩ့ဝ့ၫ(ရီ) နဲၩဖၧၩ့တၭႇ ယၪလကြၨၭအၪ့ဘၪလဖၪႇ ဆၧဘံၪၥိၭဘံၪဂၪ့ႇ ဆၧလၧပအၪ့လၥ့ၪဘၪလဖၪနီၪ ကခွံၬၡိၭခွံၬဝ့ၫလၧခီၫ့အၥိၭႇ  
မုနံၩအလးခဲၫ့ထုၬႇ ဆၧစ့ၩရၫ့မုနံၩကကၠၪႇ ယွၩကအၪ့ဎၬထဲၩ့အဆၧဒိၪဎွ့ၩဒိၪႇ  ယွၩကရွံအၪ့ထုၪ့န့ထဲၩ့ အဆၧလူဒိၪဎွ့ၩဒိၪ မွဲဝ့ၫဒၪ ၦအတီၩအလီၩ့လဖၪတၭႇ  ၦအအၧၩ့အၥၫ့ႇ ၦလၧအလၥ့ၪယၫနီၫ့ယါလၩ့ထဲၩ့ဘၪအၥၭလဖၪနီၪ ကဘၪဆၧခွံၬၡိၭခွံၬဝ့ၫလၧခီၫ့လီၫႉ 
ၦအတီၩအလီၩ့ႇ ၦလၧအဖ့ၪလၫ့ခွံၬ အဆၧထီးလူၬႇ အဆၧၥၭမၧၫ့ဒၪလ့ၬႇ လၧယွၩအဘၩ့အမုးအကၠီၩ့နီၪ ကလ့ၩနုၬဘၪ လၧမူၭခိၪအဘၩ့အမုးဖၧၩ့တၭႇ ၦလၧအလထီးန့ဖံၭထၬဘၪယွၩအဆၧမၪလူၬႇ ၦလၧအလၨၪခၪ့ဖၭဆၧမၪလူၬႇ ၦလၧအလနီၫ့ယါလၩ့ထဲၩ့ဘၪအၥၭလဖၪနီၪ ကဘၪဆၧခွံၬၡိၭလၧခီၫ့လီၫႉ 
ပကန့ဘၪ ယွၩအဘၩ့အမုးအဆၧလူၬဒိၪဎွ့ၩဒိၪအဂး ၦၡၩပကဘၪအၪဆၫခွံၬႇ ဖ့ၪလၫ့ခွံၬကယဲပဆၧအီၪထီလူၬလီၫႉ