ဂီအဆၧၫ့အထီ မုအီၪပွံၭနံၩ (၅)

အဲၪကွံၩဘၪထၧၫ့ဝဲၦဆူနဲၩဖိၪၥံၪဧႇ 
ၦယုဒၫဖိၪၥံၪအၪဒၪဆၧႇ ၦဖၫရစံၫၥံၪႇ ၦလုဆၧအဒိၪၥံၪႇ နါဂၧၫ့ဘၪ ယ့ၫၡုၬအဆၧၥီၪ့ဆၧၥၫ့ႇ ဒၪဘၪယ့ၫၡုၬအဆၧမၩနဲၪ့လဖၪလါနၫ့ဂ့ၩႇ လဆူနဲၩဘၪယ့ၫၡုၬလကၭလၧၩ့ႇ အဝ့ၫၥံၪ အၪဎၬမၩၥံၫၡုၬလီၫႉ ၦလၧအဒၪဘၪယ့ၫၡုၬအဆၧမၩနဲၪ့လဖၪအကၠီၩ့ ဆူနဲၩယ့ၫၡုၬအီၪဝ့ၫလီၫႉ ယ့ၫၡုၬအထံၩအဖျဲလဖၪႇ ၦစူၭၦဆၫလၧ အဒိၭန့ဘၪ ယ့ၫၡုၬအဆၧမၩဘျၪထဲၩ့ႇ  ဒဲၦယုဒၫဖိၪၥံၪအၪဂၩ ဆူနဲၩဝ့ၫလီၫႉ 
ၦလနၩ့နၩ့ လဒၪယံၩယါဘၪ ယ့ၫၡုၬအဆၧမၩနဲၪ့လဖၪလါနၫ့ဂ့ၩႇ လၧအနါဂၧၫ့ဘၪယ့ၫၡုၬ အအလူအထၫအကၠီၩ့ ႇ ၦထိးအၥၭလၧယ့ၫၡုၬအဂဲးအကၠီၩ့ႇ ဆူနဲၩယ့ၫၡုၬလီၫႉ ၦစမ့ရအၫဖိၪလဖၪႇ ဒဲစလၭဇရၧၩ့အဝဲမုၪႇ နးမၫၥၫႇ လခဲၫ့ထဲၩ့ႇ ၦဆူနဲၩဖိၪလဖၪနီၪလီၫႉ 
ယ့ၫၡုၬစံၭ စထီမၭႇ မွဲနဒၪဘၪယၧၩအကၠီၩ့တၭႇ နနဲၩနဝ့ၫႇ ၦလၧအလဒၪဘၪဝ့ၫလါနၫ့ဘိၩ့ နဲၩဝ့ၫလဖၪနီၪ ဘၪဆိၪဂ့ၩဝ့ၫဒၪလီၫႉ (၂၀:၂၉) 
အဲၪကွံၩဘၪထၧၫ့ဖုဝဲမုၪခွၫၥံၪဧ့ႇ 
ပဝ့ၫဒၪလဖၪယီၩ ပဒၪယံၩယါကဆါယ့ၫၡုၬလၧပမ့ၬၥၪလါနၫ့ဂ့ၩ နဂါဂၧၫ့ဘၪ ယ့ၫၡုၬအဆၧၥီၪ့ဆၧၥၫ့ႇ ယ့ၫၡုၬအဂဲး လၧလံၬဆံၫ့ဎံၪဖၧၩ့ႇ ဒဲလၧဆၧအီၪကီၪ့ အဆၧၥီၪ့ဆၧၥၫ့ဖၧၩ့တၭႇ ခၫ့ဖျီၫ့လၧယွၩအခိးအတၭအကၠီၩ့ ပကဲၪထၪ့ၦဆူနဲၩဖိၪလဖၪလီၫႉ 
ၦၡၩကဒိၭန့ဘၪ ဆၧၥၭမၧၫ့ဆိၩကၠၪအဂး ဆၧဆူနဲၩကဆါယွၩနီၪ အကၧၩ့ဒိၪနၭမၬအကၠီၩ့ ပနါဂၧၫ့ဘၪ လၧမုနံၩယီၩ လံၬဆံၫ့ဎံၪအဖၧၩ့နီၪလီၫႉ 
ယ့ၫၡုၬလချုၬမၩမၧၫ့ထၪ့ထဲၩ့ဒံၭဘၪ စလၭဇရၧၭလၧဆၧၥံၫအထီနီၪႇ ပနါဂၧၫ့ဘၪ နးမၫၥၫဒဲနးမၫရံၫထၧၫ့ဖုဝဲမုၪနံၫ လီၩ့ဖျီၪထၪ့ အဆူနဲၩလၧယ့ၫၡုနီၪလီၫႉ 
နးမၫၥၫစံၭဝ့ၫႇ ကဆါဧ့ႇ အ့ၪနအီၪထီးယီၩ ယထၧၫ့ဖုဝဲခွၫၥံၫဝ့ၫအ့ၬႉ မွဲလါနၫ့ဘိၩ့နဲၪ့ယီၩဒၪလ့ၬႇ ယၥ့ၪယၫထီးဒၪနအၪ့ကံၩ့ဆၧ လၧယွၩလမံၩ့မံၩ့နီၪႉ ယွၩမိဖ့ၪလၫ့နၧၩလီၫႉ 
ယ့ၫၡုၬစံၭဆၧၫ့ဝ့ၫႇ 
ယဝ့ၫဒၪယီၩ ယမွဲဆၧဂဲထုၪ့ထဲၩ့ ဒဲဆၧမၧၫ့လီၫႉ ၦလၧအနဲၩထဲၩ့ယၧၩယီၩႇ အ့ၪၥံၫလါနၫ့နီၪ မိမၧၫ့ဝ့ၫဒၪလီၫႉ
ကယဲၦလၧအမၧၫ့ဝ့ၫႇ ဒဲနဲၩထဲၩ့ယၧၩလဂၩဂၩနီၪ အဆိၩဆိၩအကၠၪကၠၪ ၥံၫလၧၩ့နးဆိၭအ့ၬႉ အယီၩလမံၩ့မွဲနနဲၩဆ့ဧၪႉ 
နးမၫၥၫစံၭဆၧၫ့ဝ့ၫႇ 
ကဆါဧ့ႇ ယနဲၩလၧနမွဲၦလၧအဂဲၫလၩ့ လၧဂၪ့ခိၪချိၫ့ယီၩႇ ယွၩအဖိၪခွၫဎြံၬနီၪလီၫႉ 
ယ့ၫၡုၬနီၪ မွဲဆၧဂဲထုၪ့မၧၫ့ထၪ့ထဲၩ့ႇ ဒဲဆၧၥၭမၧၫ့လီၫႉ 
ဆၧဆူနဲၩနီၪ အ့ၪပလီၩ့ဖျီၪထၪ့လၧပနိၭႇ ပဆၧချဲၩ့လၧၫ့စွါဘိၩ လၧၫ့ဎွ့ၩဒံၭအ့ၬႉ ပဆၧဆူနဲၩနီၪ ကဘၪဖျီၪထၪ့ ပဆၧမၩအဂ့ၩဖၧၩ့နီၪလီၫႉ ယ့ၫၡုၬစံၭထၬဝ့ၫႇ ၦလၧအစံၭယၧၩႇ ကဆါဧ့ႇ ကဆါဧ့ နီၪ မွဲအမိလ့ၩနုၬဘၪလၧမူၭခိၪဘၩ့မုးအဖၧၩ့ကိၭဂၩဒ့ၭအ့ၬႉ မွဲၦလၧအမၩဝ့ၫထီးဒၪယဖါအီၪလၧမူၭခိၪအၥၭနီၪလီၫႉ (မၭ ၇:၂၁)  

ၦလၧအဆူနဲၩယွၩႇ ၦလၧအဒိၭနဲၩ့ၥၭလၧယွၩႇ ၦလၧအအီၪလၧယွၩကၠၧၫ့ကၠၧၫ့ႇ ၦလၧအအီၪၥၭမၧၫ့လၧ ယွၩအၥၭဆံၫ့ဎံၪအဆၧပၧၩ့အဖၫ့လၬလဖၪနီၪ လၧမုနံၩအလးခဲၫ့ထုၬကကၠၪ ယွၩကမၩမၧၫ့ထၪ့ထဲၩ့လၧဆၧၥံၫတၭႇ ယွၩကဖ့ၪလၫ့အဝ့ၫ ဆၧၥၭမၧၫ့အဆိၩဆိၩအကၠၪကၠၪလီၫႉ 
 

Add new comment

5 + 1 =