ဂီအဆၧၫ့အထီ မုအီၪပွံၭနံၩ (၃)

အဲၪကွံၩဘၪထၧၫ့ဖုဝဲမုၪခွၫၥံၪဧ့ႇ 
ယ့ၫၡုၬစၭထၪ့ ချဲၩ့ဒုၪ့ၦစမ့ရအၫမုၪႇ အၪ့ကံၩ့အီၩထံၫအလၧအဝ့ၫနီၪလါနၫ့ဂ့ၩႇ  အၡါမၬနီၪႇ ယ့ၫၡုမိဖ့ၪလၫ့ ဆၧၥၭအထံၫလၧၦမုၪနီၪလီၫႉ ဆၧလၧယ့ၫၡုၬၥၭဝံအၥၭနီၪ မွဲဆၧဒဲၩဘၭဖိၪၥံၪအနးအၥၭအဆၧထိးထဲၩ့တၩ့နီၪလီၫႉ  ယ့ၫၡုၬအၥၭအီၪလၧအမိဖ့ၪလၫ့ ထံၫမၧၫ့လၧၦဆၧဒဲၩဘၭဖိၪလဖၪနီၪလီၫႉ  
လၧဆၧၥၭမၧၫ့အဂး ထံၫနီၪ လအီၪဘၪန့အ့ၬႉ ၦၡၩႇ ဆၧဖိၪဆၧဎါႇ ဆၧထံၭဆၧဘိၩ အၥၭကမၧၫ့အဂး ထံၫနီၪအကၧၩ့ဒိၪဝ့ၫနၬမၬလီၫႉ ဘဲၫနီၪၥိၭႇ 
လၧနးအဆၧၥၭမၧၫ့အဂး ယွၩအထံၫမၧၫ့ႇ ယွၩအခိးအတၩႇ ယွၩအလူအထၫႇ  လပၫဘၪႇလအီၪဘၪန့အ့ၬႉ 
ယ့ၫၡုနီၪ မွဲဝ့ၫထံၫမၧၫ့ လၧအဖ့ၪလၫ့ ၦၡၩဆၧၥၭမၧၫ့အဆိၩအကၠၪနီၪလီၫႉ 

လၧစယီဟၫ့အဆၧၥၭထိၬပရၧၫ့ဖၧၩ့ႇ ပဖီဘၪ ၦလနၩ့နၩ့အဂဲးႇ လါနၫ့အဝ့ၫၥံၪအမံၩ့လဖၪနီၪ စယီဟၫ့လီၩဖျီၪထၬဝ့ၫအ့ၬႉ စံၭမၫခလါႇ ယ့ၫၡုအမိႇ ယ့ၫၡုၬအဖျဲလၧယ့ၫၡုၬအဲၪဝ့ၫႇ ၦစမ့ရအၫမုၪလဂၩႇ နီၪလီၫႉ အဝ့ၫအဆၧထိစိၩနီၪ မွဲဝ့ၫ ၦဆူနဲၩဖိၪကိၭဂၩဒ့ၭ ကဘၪအီၪက့ၪၥၭ လၧအဝ့ၫအလးကန့အဂးအကၠီၩ့နီၪလီၫႉ 
ယ့ၫၡုၬအဲၪၦၡၩကိၭဂၩဒ့ၭအကၠီၩ့ႇ ပဝ့ၫဒၪယီၩ မွဲဝ့ၫယ့ၫၡုၬအထံၩအဖျဲလၧအဝ့ၫအဲၪကွံၩဝ့ၫလဖၪလီၫႉ ၦၡၩကိၭဂၩဒ့ၭနီၪ ဘဲၫၦစမ့ရအၫမုၬအၥိၭႇ အဆၧဒဲၪဘၭအီၪႇ ပကဘၪအဲၪကွံၩႇ ပကဘၪဒိၭနဲၩ့ၥၭ လၧယွၩလဂၩဎးအအီၪ ပကဘၪဘိၪ့ထၪ့ဘၩထၪ့ ယွၩကဂၩဎးလၧၫ့လါနၫ့ဂ့ၩႇ ပနဲၩမၪဆၧႇ ပဒိၭနဲၩလၧဆၧအဂူၫဂၩၥံၪအအီၪတၭႇ စံၭမၫခလါႇ ပစူၪလးခၪ့ခိၪႇ ကျိၭစ့ၩႇ ဂၪ့ခိၪအဆၧမၩဆၧလၩတၭႇ ပယဲၩထၪ့လၧကဆါယွၩနီၪလီၫႉ 
ဘဲၫၦစမ့ရအၪမုၬ ခိၭနၪယ့ၫၡုၬအဆၧချဲၩ့တၭႇ ဆူနဲၩဝ့ၫဂီၩႇ အၪ့လဲၩထၪ့ၥၭႇ မၩဂ့ၩထၪ့ထဲၩ့အတခ့ၭဖဝၭႇ  ကဲၪထၪ့ယ့ၫၡုၬအထံၩအဖျဲႇ ထဲၩ့ကိၭအဝံးဖိၪၥံၪႇ ထိးအၥၭလၧယ့ၫၡုၬအဂဲးအၥိၭႇ ပဝ့ၫဒၪကိၭဂၩဒ့ၭယီၩ ဘဲၫၥိၭပကကြၨၭဒိၭန့ယွၩအခိးအတၭႇ ယွၩထံၫမၧၫ့လၧဖ့ၪလၫ့ပၧၩ့ဆၧၥၭမၧၫ့ဆိၩကၠၪအဂးႇ ပကဘၪခိၭနၪယ့ၫၡုၬအလူအထၫတၭႇ လၧပဆၧဒဲၩဘၭႇ ဆၧဘၪမၪအဂး ႇ ပကဘၪနီၫ့ယါလၩ့ထဲၩ့ၥၭဂီၩႇ ပကဘၪအၪ့လဲၩထၪ့ပၥၭလီၫႉ 
ၦစမ့ရအၫမုၪယီၩ အဝၩအီၪယဲဆၫ့ယူၭကၠီၩ့ ယ့ၫၡုၥ့ၪယၫဝ့ၫလီၫႉ အၡါမၬနီၪ အဝၩအီၪယဲဆၫ့ဧၪႇ အီၪအ့ၬဂၩနီၪ ပၥ့ၪယၫထံၪထံၪဆၭဆၭနးဂၩအ့ၬႉ လၧလံၬဆံၫ့ဎံၪဖၧၩ့ႇ ဆၧချဲၩ့လံၬဖျိၪ့လနၩ့နၩ့ႇ အခီၫပယီၫအဂူၫဂၩအီၪဝ့ၫဆ့လီၫႉ ၦစမ့ရအၫဖိၪလဖၪနီၪ လၧအခၪ့ထံၭအိၩ မွဲဝ့ၫၦယုဒၫဖိၪလဖၪလီၫႉ လါနၫ့ဂ့ၩ အဝ့ၫၥံၪထၪ့အီၪဎုၬလၧဆၨၩအဂူၫဂၩၥံၪတၭႇ လၧကဆါယွၩလဂၩဎးအဖၫ့ခိၪ လတီၩတီၩလီၩ့လၧၩ့ဘၪလကၭလၧၩ့ႇ အဝ့ၫၥံၪဘိၪ့ထၪ့ဘၩထၪ့ဆၧ ဆၨၩအဂူၫဂၩၥံၪႇ အဆၧဂၩ့ဆၧဖၪ့ႇ အဆၧဘိၪ့ဆၧဘၩလဖၪနီၪဆ့လီၫႉ ဆၧနီၪအကၠီၩ့အဝ့ၫၥံၪလၩ့ဂၬ ဘဲၫၦအဲၪဘိၩ့ဝၩအၥိၭနီၪလီၫႉ 
လၧလံၬဆံၫ့ဎံၪအလးလံၩ ဒဲအလးအၥၫ့ဖၧၩ့ဆ့ႇ ဆၧဖံၭထံၩဖံၭၥိၭႇ ဆၧအဲၪလိၬကွံၩလိၬ လၧယွၩဒဲအၡၩခမျၧးအကျၩႇ ကွ့ၩထၪ့ဖျီၪထၬဝ့ၫႇ ဘဲၫတလၭမူၭခွၫဒဲတလၭမူၭမုၪအဆၧအီၪဎုၬအၥိၭနီၪလီၫႉ 
လၧစယီဟၫ့အဆၧၥၭထိၬပရၧၫ့ႇ ယ့ၫၡုၬစၭထၪ့ နဲၪဖျီၪထၪ့ အဆၧလၩ့လၭ လၧတလၭမူၭအဖၧၩ့ လၧကၫနၫအဖၧၩ့နီၪလီၫႉ 
ယ့ၫၡုၬနီၪ မွဲဝ့ၫတလၭမူၭအခွၫလၩ့ထံးလၩ့ဆ့ၭတၭႇ ဆၧအီၪကီၪ့ဆံၫ့ဎံၪႇ ၦဆူနဲၩဖိၪၥံၪထီးအလူၬႇ အထံၩအဖျဲၥံၪထီးလူၬနီၪ မွဲဝ့ၫတလၭမူၭမုၪလီၫႉ 
 

Add new comment

8 + 1 =