ဂီအဆၧၫ့အထီ မုအီၪပွံၭနံၩ (၂)

ပဝ့ၫၥံၪကိၭဂၩဒ့ၭ လၧဂီအဆၧၫ့အထီယီၩအဖၧၩ့ ပကဘၪဆီၫ့မီၪ့အၪ့ဎၬလၩ့ထဲၩ့ ကယဲပဆၧဒဲၭဘၭဆၧဘၪမၪလဖၪ ဒဲပကဘၪအီၪဝ့ၫဒၪ လၧဆၧနီၫ့ယါလၩ့ထဲၩ့ၥၭအဖၧၩ့နီၪလီၫ ႉ လကၭဒံၭဘၪ ပကဘၪခၫ့ဂၬခွံၬဂီအဆၧၫ့အထီယီၩ လၧဆၧဒုၪအၪ့ဒုၪအီၩႇ ဆၧအၪ့ကံၩ့ဘၩဆိၪဖၪအဖၧၩ့နီၪလီၫ ႉ အနီၪမၬႇ ပကဒိၭန့ဘၪ ကဆၧယွၩအဆၧကွဲၪဖျါခွံၬ ဒဲပကအီၪလၧကဆါယွၩဘူၭဘူၭထံးထံး ဒဲ ပကဒိၭန့ဘၪ ကဆါယွၩအဆိၪဂ့ၩဆိၪဘွၩလဖၪနီၪလီၫ ႉႉႉ
ဂၪ့ခိၪအဆၧမုၬဆၧလၩနီၪ ဂုးခၧၫ့မွဲလန့ဘၪ ဒဲကဆါယွၩဖ့ၪန့အ့ၪပၧၩ ဆၧမုၬဆၧလၩနီၪမၬ ဂုးခၧၫ့ကန့ဝ့ၫဒၪ အဆိၩအကၠၪနီၪလီၫ ႉ ဘဲၫၥိၭပကထိးဆၧၫ့ဒိၭန့ဘၪ ကဆါယွၩအခိၪဖၭဆၧမုၬဆၧလၩလဖၪအဂး ပကဘၪခိၭနၪလီၩဖိၬ အဝ့ၫအဆၧမၪလူၬလဖၪနီၪလီၫ ႉ ပကဘၪအၪ့န့ထၪ့အဒီၩ့အထ့ၬ လၧၦဆံၫ့ဎံၪစအၫဘြဟၫ့ဂီၩ့ လၧပဘၪဒၪဆၧၫ့ယၫ ဆၧကၪဆၧဂဲၩႇ ဆၧၡၪ့ဆၧနၭလဖၪအကျၩ ပကဘၪခိၭနၪလီၩ့ဖိၬဝ့ၫဒၪ ကဆၧယွၩအဆၧမၪလူၬလဖၪနီၪလီၫ ႉ
လၧကဆါယ့ၫၡုၬအခံးအဂၩ့အၪ့လဲၩထၪ့ၥၭအထီအိၩ ကဆါယွၩစံၭဝ့ၫ အယီၩလဂၩ မွဲယဖိၪခွၫၥၭဘီၩ့ မုၬယၥၭလၧအဝ့ၫနီၪ ခိၭနၪအလူဆံၭႉ ဘဲၫၥိၭပကဒိၭန့ဘၪ ကဆါယွၩအခိၪဖၭအဂး ပကဘၪကျ့ၭစၨၭအီၪမၧၫ့ဎုၬဝ့ၫဒၪ လၧကဆါဎြံၬကၠၧၫ့ကၠၧၫ့လီၫ ႉ ကယဲအဝ့ၫအဆၧၥီၪ့ဆၧၥၫ့လဖၪ ပကဘၪခိၭနၪလီၩ့ဖိၬဝ့ၫနီၪလီၫ ႉ ကဆါယ့ၫၡုၬမၪလူၬထၬပၧၩ ပကဘၪအဲၪကွံၩၦဂူၫဂၩ ဒဲပကဘၪနီၫ့ယါလၩ့ထဲၩ့ပဆၧဒဲၩဘၭလဖၪနီၪလီၫႉ  ဆၧနီၪလဖၪ ပခိၭနၪလီၩ့ဖိၬကန့အဂး ပကဘၪဒိၭနဲၩ့ပၥၭ လၧအဝ့ၫဂီၩ့ ပကဘၪအၪ့ကံၩ့ထၪ့ အခိးအတၩလၧအဝ့ၫအအီၪနီၪလီၫႉ မွဲဆၧဘဲၫနီၪ ဂီအဆၧၫ့အထီဖၧၩ့ယီၩ ပကဘၪနီၫ့ယါလၩ့ထဲၩ့ပဆၧဒဲၩဘၭလဖၪ ဒဲ ပကဘၪကျ့စၨၭအီၪမၧၫ့ဝ့ၫဒၪ လၧဆၧဒုၪအၪ့အီၩႇ ဆၧအၪ့ကံၩ့ဘၩဆိၪဖၪဒိၪဒိၪလ့ၬအဖၧၩ့ဂီၩ့ ပကဘၪမၩလၧၫ့ဎွ့ၩထၪ့ ကဆါယွၩၥၭအဆၧဆိၫ့လဖၪနီၪလီၫ ႉ ပခိၭနၪလီၩ့ဖိၬကဆါယွၩအဆၧမၪလူၬလဖၪ ဒဲ ပမၩလၧၫ့ဎွ့ၩထၪ့ ယွၩၥၭအဆၧဆိၫ့လဖၪအထီ ပကဘၪဒၪဆၧၫ့ယၫ လၧဆၧၡၪ့ဆၧယၬႇ ဆၧကၪဆၧဂဲၩႇ ဆၧနိၫ့ဆၧနၭႇ ဆၧၥုၪ့ခိၥၭဝီၩလါနၫ့ လၧဆၧလဖၪယီၩအကျၩ ကဆါယွၩကဖ့ၪဂဲးဖ့ၪဘၭပၧၩ ဒဲ ကဆါယွၩကဖ့ၪလၫ့ပၧၩခိၪဖၭလဖၪတၡါဒ့ၭနီၪလီၫ ႉ ႉ ႉ
 

Add new comment

9 + 1 =