ဂီအဆၧၫ့အထီ မုအီၪပွံၭနံၩ (၁)

ဘဲၫကဆါဎြံၬ ဘၪဆၧထိးဒုၪဒွ့ၪၥၭအၥိၭ ပဝ့ၫၥံၪလဖၪဆ့ လၧမုကိၭနံၩဒ့ၭ ပဆၧၥၭမၧၫ့အဖၧၩ့ ပဘၪဒၪဆၧၫ့ယၫဝ့ၫဒၪ ဆၧဒုၪဒွ့ၪ ဒဲဆၧကျဲၩ့ဖစီၩ့လဖၪနီၪလီၫႉ မုကနံၩယီၩ ၦၡၩလဖၪအဆၧဖံၭဆၧမၩ ဘိၪ့လၫ့ဘဲၩ့လၫ့ဒၪ လၧကဘၪအၪ့ဘၪအီၩအဂးတၭႇ ၥၭနၪ့ခွံၬကဆါယယွၩ ဒဲကဆါယွၩအဂး ဖ့ၪလၫ့အခံၫ့ မွဲလန့ဘၪနီၪလီၫႉ 
ၦလနၩ့နၩ့စီၪ့ဎိၩလၩ့အၥၭႇ အီၪက့ၪထၬအၥၭ အ့ၪမွဲပမၩမၬ ပကအၪ့ဘၪႇ ပဘိၪ့ထၪ့ဘၩထၪ့ယွၩ မွဲလလိၫဘၪတၭႇ ဆီၫ့မီၪ့လၩ့ၥၭ ဘဲၫၦအစီၩ့အမၩ့အီၪဝ့ၫလဖၪအၥိၭနီၪလီၫႉ ၦၡၩလနၩ့နၩ့ဒီၭ လၧအၥၭခံဖၧၩ့ အီၪက့ၪထၬ ဆၧၥၭထၪ့ထီၫလဖၪ ဒဲလၧအဝ့ၫၥံၪ အဆၧၥၭမၧၫ့ဖၧၩ့ မွဲလလိၫဘၪကဆါယွၩအခိးအတၩနီၪလီၫႉ ၦၡၩကနၩ့နၩ့ အီၪက့ၪထၬအၥၭ ပအီၪလၧဂၪ့ခိၪချိၫ့ဖၧၩ့ယီၩအထီ ဘၪဆီၩ့ပအၪ့ဘၪအီၩဘၪႇ ပကီၩ့ဘၪၥိၭဘၪ ဂ့ၩဂ့ၩဘၪဘၪဘိၩ့ ဂီၩ့လၧၫ့ႇ လၧပဆၧၥၭမၧၫ့ဖၧၩ့ ကအီၪယွၩအ့ၪမွဲလအီၪဘၪဆ့ ဘၪဆၧနၩ့မံၩ့အ့ၬႉ အီၪက့ၪထၬအၥၭဘဲၫယီၩၥိၭဂီၩ့တၭ ၥၭနၪ့ခွံၬကဆါယွၩ ဒဲမုၬလၩဝ့ၫဒၪ လၧဂၪ့ခိၪချိၫ့အဆၧမုၬဆၧလၩအဖၧၩ့နီၪလီၫႉ 
လၧပဂံၪ့ဒီၪ့ႇ ပခရၧၫ့ႇ ပတဝၫ့ႇ ပထံၫခး အလးဎံၩ့လးဒ့ၭနီၪ အ့ၪမွဲပကအီၪလူဒိၪဎွ့ၩဒိၪ ကဆါယွၩစွါဘိၩႇ အဝ့ၫၥံၪအလးနီၪ ကလၧၫ့ထၪ့ဎွ့ၩထၪ့ဒၪ လၧဆၧဎူၫဆၧဎၩ့ႇ ဆၧမုၬဆၧလၩ ဒဲဆၧယံၩဆၧၡီၩ့လဖၪနီၪလီၫႉ 
အ့ၪမွဲပၥၭနၪ့ခွံၬကဆါယွၩႇ ပခွံၬၡိၭခွံၬကဆါယွၩစွါဘိၩ ဂၪ့ခိၪချိၫ့ယီၩ ပဎွ့ၩလၩ့ဝ့ၫဒၪ လၧဆၧမ့ၬလဲၩၥၭဂဲၫ့လဖၪတၭ ဆၧအၧၩ့ဆၧၥၫ့လဖၪ ကဂဲၫဂုထၪ့အၪ့ထၪ့ဝ့ၫဒၪတၡါနီၪလီၫႉ 
ဆၧအၪ့ဎၬလီၩ့ဎွါ ဂၪ့ခိၪအဆၧမုၬဆၧလၩ ဒဲဆၧၥၭနၪ့ခွံၬကဆါယွၩနီၪ မွဲဝ့ၫဒၪ မုၪခီၩ့လဲးအဆၧဒုၪဒွ့ၪလဖၪတၭ ပကဘၪအီၪက့ၪထုၪ့ၥုၪ့ထုၪ့ၥၭ ဒိၪဒိၪလ့ၬနီၪလီၫႉ ဂၪ့ခိၪချိၫ့ယီၩ မွဲဝ့ၫဒၪလၧအလး ပကအီၪအဆိၩအကၠၪအလး လမွဲဘၪတၭႇ ပဝ့ၫၥံၪ ပကဘၪအီၪဆၧအလးဆိၩကၠၪနီၪ မွဲဝ့ၫဒၪကဆါယွၩအမူၭခိၪဘၩ့မုးနီၪလီၫႉ 
ၦလၧအဖ့ၪလၫ့ဆၧၥၭမၧၫ့ဆိၩကၠၪန့ဝ့ၫနီၪ အီၪဒၪကဆါယွၩလဂၩဎးနီၪတၭႇ ဘဲၫၥိၭပကဒိၭန့ဘၪ ဆၧၥၭမၧၫ့အဆိၩဆိၩအကၠၪကၠၪအဂး ပကဘၪမၩလၧၫ့ဎွ့ၩထၪ့ ကယဲကဆါယွၩၥၭအဆၧဆိၫ့လဖၪ ဒဲပကဘၪလီၩ့ဖိၬဝ့ၫဒၪ ကဆါယွၩအဆၧမၪလူၬလဖၪနီၪလီၫႉ