ကိၪ့ဘိၪ့ဆံၫ့ဎံၪအဘိၪ့မုနံၩ

ကိၪ့ဘိၪ့ဆံၫ့ဎံၪအဘိၪ့မုနံၩ

အဲၪကွံၩဘၪထၧၫ့ဖုဝဲၦ ဆူနဲၩဖိၪထီးလူၬၥံၪဧ့ႇ ကနံၩယီၩနီၪ မွဲဝ့ၫဒၪ လၧ ကဆါယ့ၫၡူၬဎြံၬအၥွံၪအယၫ အဘိၪ့မုနံၩလီၫႉ   ပကိၭဝ့ၫလၧ Corpus Christi Sunday လီၫႉ 
ပကဆါပယွၩနီၪ မွဲဝ့ၫဒၪယွၩလၧအအဲၪကွံၩပၧၩႇ ဒဲဂဲၫအီၪကၠၧၫ့ကၠၧၫ့လၧပၧၩလီၫႉ ဎြံၬအီၪဖျဲၪမုနံၩထီၩ့ ကနံၪ့ကဘျၩ့ကနံၪ့ကဘျၩ့အခၫႇ ကနါဂၧၫ့ဘၪ လၧလံၬဆံၫ့ဎံၪဖၧၩ့ႇ ကွ့ၭထၬဝ့ၫလၧႇ ယွၩလၧအဂဲၫကဲၪထၪ့ၦၡၩကဂၩယီၩနီၪ ယွၩလၧအအီၪလၧပဆူၭပကျၩ ဒဲယွၩလၧအအီၪကၠၧၫ့ကၠၧၫ့လၧပၧၩလီၫႉ အ့ၫမၫနူအ့လၩ့ ဟံဘြူၫဆၧချဲၩ့နီၪ အခီၫပယီၫအီၪဝ့ၫလၧ God with us: ယွၩအီၪကၠၧၫ့ကၠၧၫ့လၧပၧၩလီၫႉ ပကဆါပယွၩယီၩ မွဲယွၩလၧအီၪယဲၩ့ယဲၩ့လၧပၧၩအ့ၬႉ အဝ့ၫနီၪအီၪဘူၭဘူၭလၧပၧၩ ဒဲအီၪကၠၧၫ့ကၠၧၫ့လၧပၧၩနီၪလီၫႉ လၧဆၧကဲၪဆၧဂဲၩဖၧၩ့ႇ လၧဆၧၡၪ့ဆၧနၭအဖၧၩ့ႇ ဘၪန့ကကၠၪကၠၪပဆီၫ့မီၪ့ဘၪ ပကဆါပယွၩယီၩ အီၪခီၫလဲၪႇလ့ၩမခလဲၫႇ အီၪယဲၩ့ယဲၩ့လၧပၧၩယူၭဧၪႉ ခွံၬၡိၭထးပၧၩယူၭဧၪႉ ပၥုၪ့လၩ့ဆါၥၭလၩ့ဆါဂီၩ့ႇ ပအီၪလၧၥုၪ့လၩ့ဆံၭၥၭလၩ့ဆံၭနီၪလီၫႉ အၡါမၬနီၪ ယွၩနီၪ အီၪယဲၩ့ယဲၩ့လၧပၧၩအ့ၬႉ ပဆီၫ့မီၪ့ဘၪလၧအဝ့ၫအီၪယဲၩ့ယဲၩ့ လၧပၧၩလီၫႉ အၡါမၬနီၪ ယွၩအီၪဘူၭဘူၭလၧပၧၩဒဲအီၪကၠၧၫ့ကၠၧၫ့ လၧပၧၩလီၫႉ 
အဲၪကွံၩဘၪပခိၭနၪဆၧဖိၪၥံၪဧ့ႇ လၧလံၬဆံၫ့ဎံၪဖၧၩ့ပဖီဘၪႇ ကဆါယ့ၫၡုၬဎြံၬလီၩဝ့ၫႇ ၦနံၫဂၩၥၧၫ့ဂၩ အီၪကီၪ့လၧယမံၩ့နီၪႇ ယကအီၪလၧအဝ့ၫၥံၪအဆူၭအကျၩလီၫႉ ဘဲၫနီၪအကၠီၩ့ ပကဘၪအီၪလၧ ဆၧဆူနဲၩဒိၪဒိၪအဖၧၩ့ႇ ဒဲပကဘၪဒၪ ပကဆါယီၩ အီၪလၧပဆူၭပကျၩယီၩနီၪလီၫႉ 
ဆၧလၧကိၪဘိၪ့ဆံၫ့ဎံၪ စၭကရၫမဲၩတူၩယီၩနီၪ ကဆါယ့ၫၡုၬဎြံၬအၥွံၪအယၪႇ ကဆါယ့ၫၡုၬအနၫ့ဆါ ဒဲကဆါယ့ၫၡုၬဎြံၬအီၪကၠၧၫ့ကၠၧၫ့လၧပၧၩနီၪလီၫႉ 
ကိၪဘိၪ့ဆံၫ့ဎံၪနီၪ ပဒၪဘၪအလွ့ၫအီၪဘွၩဘွၩလါနၫ့ဂ့ၩႇ ကဆါယ့ၫၡုၬဎြံၬအလူအထၫအီၪဝ့ၫအကၠီၩ့ႇ ပၥ့ၪယၫဘၪ ဘိၪ့ဆံၫ့ဎံၪယီၩနီၪ မွဲကဆါယ့ၫၡုၬဎြံၬ အၥွံၪအယၪအၡါမၬနီၪလီၫႉ 
လၧမံဆၩဆၧလုထၪ့ဆံၫ့ဎံၪအဖၧၩ့ ကိၪဘိၪ့ဆံၫ့ဎံၪယီၩ ကဲၪထၪ့ကဆါယ့ၫၡုၬအၥွံၪအယၪ ဒဲအဝ့ၫအနၫ့ဆါဒၪဝ့ၫ အီၪကၠၧၫ့ကၠၧၫ့လၧပၧၩနီၪလီၫႉ 
ၦလၧဒိၭန့ဘၪ ဘိၪ့ဆံၫ့ဎံၪယီၩနီၪ မွဲဝ့ၫဒၪ ၦလၧအဒိၭန့ဘၪ ကဆါယ့ၫၡုၬအနၫ့ဆါဒၪဝ့ၫလီၫႉ ကိၭနံၩကိၭနံၩ ဘဲၫၥိၭပဂဲးပဘၭကအီၪထၪ့ဝ့ၫႇ ဒဲကဆီၪ့ထၪ့ဝ့ၫအၥိၭႇ ပဘၪပဆၪ ဒဲပဘၪအီၩထံၫနီၪလီၫႉ ဆၧအၪ့ဆၧအီၩနီၪ မၩမၧၫ့ထၪ့ပၥၭႇ မၩဆီၪ့ထၪ့ပဂဲးပဘၭလီၫႉ ဘဲၫၥိၭနးခီၫအၥၭကမၧၫ့ဝ့ၫအဂးနီၪ ပဘၪအၪ့အီၩဝ့ၫအၥိၭႇ ဘဲၫၥိၭပနးၥၭကမၧၫ့ဝ့ၫအဂးနီၪ ပကဘၪဒိၭန့ဘိၪ့ဆံၫ့ဎံၪယွၩအၥွံၪအယၪလီၫႉ ဘဲၫၥိၭကဆါယ့ၫၡုၬလီၩဝ့ၫအၥိၭႇ ၦလၧဒိၭန့ယၥွံၪယယၪနီၪ ကန့ဘၪဆၧၥၭမၧၫ့ဆိၩကၠၪအကၠီၩ့ႇ ဆၧလၧဘိၪ့ဆံၫ့ဎံၪနီၪ ဖ့ၪလၫ့ပၧၩဆၧၥၭမၧၫ့ဆိၩကၠၪၥ့ၪဝ့ၫဒၪလီၫႉ 
ကိၪဘိၪ့ဆံၫ့ဎံၪနီၪ ပကဘၪဒိၭန့ လၧဆၧဆူနဲၩဖၧၩ့ ဒဲဆၧၥုၪ့ဆံၫ့ဎံၪၥၭဆံၫ့ဎံၪအဖၧၩ့လီၫႉ 
ကိၪဘိၪ့ဆံၫ့ဎံၪနီၪ မၩဆံၫ့ထၪ့ပၥုၪ့ပၥၭ ဒဲမၩဎိၩထၪ့ဒိၪထၪ့ဆၧအဲၪဆၧကွံၩ လၧပၥၭခံဖၧၩ့လီၫႉ