ကဆါဎြံၬထဲၩ့ထၪ့ထဲၩ့လၧမူၭခိၪအဘိၪ့မုနံၩ

...ယ့ၫၡူၬဎြံၬယီၩ ထဲၩ့ထၪ့ထဲၩ့လၧမူၭခိၪလါနၫ့ အဝ့ၫဆုၭအီၪကၠၧၫ့ကၠၧၫ့ လၧအဆၧအီၪကီၪ့အၡၩခမျၧးအၥိၭလီၫႉ ခၫ့ဖျီၫ့လၧၥၭမုဆံၫ့ဎံၪကဆါယွၩမွဲဂ့ၩႇ လၧစဲၭကရမဲၩ့တူၩ(၇) မံၩ့အဖၧၩ့မွဲဂ့ၩႇ ခၫ့ဖျီၫ့လၧအလူအထၫမွဲဂ့ၩႇ လၧၦၡၪ့ဖိၪယၬဖိၪဖၧၩ့မွဲဂ့ၩႇ ယ့ၫၡူၬဎြံၬ ဆုၭအီၪကၠၧၫ့ကၠၧၫ့လၧပဝ့ၫဒၪၦဆူနဲၩဖိၪၥံၪအၥိၭတၭႇ အဝ့ၫမၩဆၧၩ့ပၧၩႇ မၩဖၩ့ထၪ့ပၥၭႇ ဖ့ၪဂဲးဖ့ၪဘၭပၧၩႇ ဒဲကွဲၪဖျါခွံၬပဆၧမၪလဖၪနီၪလီၫႉ

ပအီၪလၧဂၪ့ခိၪချိၪ့အထီနီၪႇ ပကိၭဂၩဒ့ၭယီၩ မွဲၦမွံၩလဖၪလီၫႉ ကဆါယွၩတဲၩ့လၩ့ထၬပၧၩနီၪ မွဲပကၥ့ၪယၫအဲၪကွံၩယူၭယၪ့အဝ့ၫႇ ဒဲပအီၪၥၭမၧၫ့ဒဲ ပကမၩဆၧဂ့ၩဆၧဘွၩ ဘဲၫအဝ့ၫအၥၭလုအၥိၭတၭ အလးခဲၫ့ထုၬ ပကထီၩ့ လၧမူခိၪဘၩ့မုးနီၪလီၫႉ

ကဆါဎြံၬအီၪလၧဂၪ့ခိၪချိၪ့ယီၭအထီ အဝ့ၫဘၪဒၪခီၩ့ဆၧၫ့ယၫ ဆၧနိၫ့ဆၧနၭႇ ဆၧၡၪ့ဆၧယၬႇ ဆၧကၪဆၧဂဲၩႇ ဆၧမၩအၧၩ့မၩနၭႇ ဒဲဆၧမၩၥံၫမၩဆၫအၥိၭႇ ပဝ့ၫဒၪလၧအဖိၬယ့ၫၡူၬဎြံၬအခဲၫ့လဖၪယီၩႇ ပကဘၪဒၪခီၩ့ဆၧၫ့ယၫဆၧနီၪလဖၪဆ့လီၫႉ

ဆၧၡၪ့ဆၧနၭႇ ဆၧကၪဆၧဂဲၩအဂဲးယီၩ ပလီၩအ့ၪၦဂူၫဂၩႇ ပရၩလၩ့အ့ၪၦၡၩလၧပဆၧလူဆၧချဲၩ့ႇ ပဖ့ၪဂဲးဖ့ၪဘၭ ၦဂူၫဂၩႇ အွံၪၥၭဆၧၩ့ႇ ထိးဆၧနိၫ့ဆၧနၭႇ ဆၧစူၭဆၧဆၫႇ ကၧၩ့ဖျိၪ့ၥၭကၠၧၫ့ကၠၧၫ့လၧကဆါယ့ၫၡူၬဆံၭႉ ယီၫလဆံၭလါနၫ့ႇ ပဝ့ၫဒၪ ပနၫ့ဆါဒၪဝ့ၫ အ့ၪပဘၪဒၪခီၩ့ဆၧၫ့ယၫႇ ဆၧကၪဆၧဂဲႇ အ့ၪပဘၪထိး ဆၧစူၭဆၧဆၫကကၠၪႇ ပဘၪထိးကၪမၬလီၫႉ မွဲန့ၫၦၡၩလဖၪမွဲအ့ၬႉ ကဆါယွၩအဖိၪခွၫ ယ့ၫၡူၬအနၫ့ဆါဒၪလ့ၬႇ ဒၪခိၩ့ဆၧၫ့ယၫ ဆၧနိၫ့ဆၧနၭအခၫနီၪ ဆီၫ့မီၪ့ဝ့ၫလၧ အဖါကဆါယွၩခွံၬထၬအဝ့ၫလီၫႉ

ဘဲၫကဆါယ့ၫၡူၬမၧၫ့ထၪ့ထဲၩ့လၧဆၧၥံၫႇ ဒဲထဲၩ့ထၪ့ထဲၩ့လၧမူခိၪအၥိၭႇ ၦလၧအဖိၬအဝ့ၫအခဲၫ့ႇ ဆၧခိၭနၪႇ ဆၧထီးန့ဖံၭထၬအဝ့ၫအလူအထၫလဖၪနီၪ ကဆါယွၩကမၩမၧၫ့ထၪ့ထဲၩ့လၧဆၧၥံၫဒဲ ကထဲၩ့ကိၭအဝ့ၫၥံၪ လၧမူၭခိၪဘၩ့မုးအဖၧၩ့နီၪလီၫႉ...