ၦခမျၧးဒဲ နဲၩ့ဎီၩ့

ဂၪ့ခိၪယီၩ ဂဲၫဂၭဂီၩ့ဂၭစၪထၪ့ ကဆံၭဆံၭယူၭႉ အိၫဇိၩ့အထုၪ့ထ့ၭဖၭဂီၩ့ ဂၪ့ခိၪချိၫ့ဘၪဂဲၫခိထၪ့နီၪလီၫႉ ခိဆၧၩ့ချံၪ့ အဆၧၫ့အထီဘၪလၧၩ့အ့ၬႉ ထံၫလိးခိၪလီၩ့လဖၪ ဖံထၪ့ဂီၩ့ ပၫ့လဲၫ့ထံၫ ဂဲၫထီၪ့ထၪ့ ကဲၪထၪ့ထံၫဎိၩလၩ့နီၪလီၫႉ ဂဲၫန့ထၪ့ လၩ့ၥၭမဲၪဝ့ၫဒၪနဲၩ့ဎီၩ့ဆၧလၩ့အၪ့ယိၫနီၪလီၫႉ မ့ၪခိၪလီၩ့လဖၪဖီးဖၭ ႇ ကၫဘိၫ့ဒဲၫ့အီၭစဲၭလဖၪ ထုၭစဲၪ့ထၪ့ဝ့ၫလၧ လံၩ အထုၪ့ဖၧၩ့ ဆၧထုၭစဲၪ့ထၪ့ ကၫဘိၫၥံၪလဖၪယီၩအကၠီၩ့ ဂၪ့ခိၪချိၫ့ ဂဲၫခိထၪ့နီၪလီၫႉ လကၭဒံၭဘၪ လဲၪ့ၥိၪၥံၪ စဲၭဒူၭၥံၪလဖၪ ထူၭထၪ့ စီၩ့ဂဲးလဖၪနီၪ လူၭဘံၭထၬ လံၩအထုၪ့ဂီၩ့ ကဲၪထၪ့ လံၩအထုၪ့ဆၧၥလိၪၥလံၬႇ လံၩအၥလိၪ ၥလံၬလဖၪယီၩ ပၥွံၭဘၪအကၠီၩ့ ကဲၪထၪ့ ပိၭၥိၭဆၧဆၫ ႇ ပဂၪ့ခိၪချိၫ့ယီၩ ကဂဲၫခိဆီၪ့နၭထၪ့ ကဆံၭဆံၭ နီၪလီၫႉ လၧၦၡၩအကၠီၩ့မွဲဂ့ၩ နဲၩ့ဎီၩ့အကၠီၩ့မွဲဂ့ၩ မ့ၪအၪ့ၡိၬ ႇ မ့ၪအၪ့ၡိၬအကၠီၩ့ ဆၧဖိၪဆၧဎါၥံၪဘၪၥံၫနီၪလီၫႉ ၦၡၩဖ့ၬၥံၪ့ၥံၪလဖၪ အကၠီၩ့ ၥံၪ့ကျိၭလူၬပျီၩ့ခွံၬ ဒံၫယ့ၫတီၩလဖၪ လအီၪလၧၩ့ဘၪတၭ လပီၩဒိၪ ၡၬလဲးနီၪလီၫႉ

            ၦလၧလယိဘၪပဂူၫဂၩၥံၪအဂး ယိလၩ့ဒၪန့အဝ့ၫၥံၪအဂးမွဲဝ့ၫ ခီၫၡၩဖိၪၥံၪ ႇ ၦလၧဖီၪ့ထၪ့ဖံၭထၪ့ ထံၫခး အဆၧမၩၥံၪလဖၪနီၪ ခုၪ့လိးအကၠီၩ့ ဂဲၫဆုးကဲၪထၪ့ဝ့ၫအခိးအတၩအအၧၩ့လဖၪနီၪ မွဲဖံၭယီၩဂၭဂီၩ့ဂၭစၪ ပၥိၩ့ထၪ့န့နးမံၩ့ လၧၩ့အ့ၬ ကဲၪထၪ့ဖံၭလၧ လအိၭလၧၩ့ဘၪဆၧနးမံၩ့နီၪလီၫႉ ဖံၬခုၥံၪ့ဂီၩ့ ကဘၪၥုၪ့လၩ့ထဲၩ့ဝ့ၫ နၪ့အၥၭအ့ၬႉ ၦလၧအထီးၥံၪ အီၪလဖၪ အၥၭလိၬဖၭအကၠီၩ့ ဆၧဒဲၩဘၭလအီၪဘၪဆၧဖိၪ ဆၧဎါၥံၪလဖၪ ဘၪဖ့ၪလၫ့လၩ့အၥၭကိၭနံၪ့ဒ့ၭနီၪလီၫႉ ကဂၩဒဲကဂၩ ကဒုၩဒဲကဒုၩ ကဆၨၩဒဲကဆၨၩ ဘၪဒိၭနဲၩ့လိၬၥၭ ဂၪ့ခိၪချိၫ့ယီၩ ၦယိလၩ့ဒၪန့အဝ့ၫၥံၪအဂး ၦခမျၧးလဖၪ အဆၧၥ့ၪယၫနၪၥ့ၪအီၪနးဆ့ အဝ့ၫၥံၪလယိ လအၪ့ဎါလၧၩ့ဘၪ ၦဂူၫဂၩၥံၪအဂးနးမံၩ့ဒဲ စီၪလၩ့အၥၭဘဲၫကဆါဂီၩ့ နဲၩ့ဎီၩ့ဘဲၫလဘၪဎၬဘၪလၧၩ့အဝ့ၫၥံၪ ဒဲ လီၩ့ဎွါဒၪမွဲ အဝ့ၫၥံၪအခီၫ့ၡၩအဂးနီၪလီၫႉ

ခိဆၧၩ့ချံၪ့အၪ့လဲၩ့ထၪ့အၥၭအကၠီၩ့ ကဲၪထၪ့ဝ့ၫဒၪ ဆၧဆၫလဖၪ နဲၩ့ဎီၩ့ဆၧလၩ့အၪ့ယိၫ ဆူၫနၫမံၫလပီၩဖၭဒိၪ လဖၪ ႇ ၡၬလဲးခိၪလီၩ့လဲး ႇ ဖူၫဆံၫဂုၥံၪ ကဆိကမံၩ့ ကလးကမံၩ့ ဂဲၫကဲၪထၪ့ဝ့ၫ လၩ့ၥၭမဲၪဝ့ၫဒၪ ဆၧလၩ့အၪ့ယိၫ လဖၪၥံၪယီၩ မွဲဆၧမၩဆၧၩ့ ကန့နးမံၩ့အ့ၬနီၪလီၫႉ ပဘၪၥၭမဲၪနၭန့ နဲၩ့ဎီၩ့ဆၧလၩ့အၪ့ယိၫယီၩ မွဲလအီၪဘၪနးမံၩ့လီၫႉ ဂၪ့ခိၪဆၧကၪဆၧဂဲၩဂဲၫကဲၪထၪ့ဘဲၫယီၩၥိၭနီၪ မပၫလဲၪၥံၪ မၩထၪ့လဲၪ မွဲၦၡၩၥံၪလီၫမွဲအ့ၬဧၪ မွဲလယိဖီၪ့ဂုးဘၪနဲၩ့ဎီၩ့ဒဲ ယိလၩ့ဒၪအၥၭ ၦလၧယိလၩ့ဒၪအၥၭ ဂဲၫအၪထၪ့နီၪ ဂၪ့ခိၪယီၩ ဂဲၫကဲၪထၪ့ဘဲၫယီၩၥိၭလီၫႉ ပကဲၪၦၡၩၥံၪလဖၪယီၩ နဲၩ့ဎီၩ့ဒဲ ဆၧဖိၪဆၧဎါၥံၪလၧအအီၪလၧ ဂၪ့ခိၪချိၫ့ယီၩထီးအလူၬ ၦဘၪဒိၭနဲၩ့အီၪလိၬၥၭအကၠီၩ့ နဲၩ့ဎီၩ့လပဆုးဖီၪ့ဂုးယိထွ့ၫ ဘၪစွါဘဲၫ အထီလၧယၫ ကဂဲၫနၭထၪ့ နၭန့ဘဲၫယီၩအကၠီၩ့ ဘဲၫအခံၫ့အီၪဒံၭယီၩ ပကစူၭကီၪ့ဎိၭလၩ့ပၥၭဂီၩ့ လၧပဂး လၧပဂံၪ့ဒီၪ့အဂး ပဆၨၩဆၬအဂး ပထံၫခးအဂး ဂၪ့ခိၪချိၫ့အဂး ဘဲၫပမၩထၪ့န့အၥိၭ ပကဆုးဖီၪ့ဂုးယိထွ့ၫ ပနဲၩ့ဎီၩ့ကိၭဂၩဒ့ၭလါဆံၭႉ