ထံၫနီၪ ၥိၩ့ထၪ့ဘဲၫ ထီး ဆံၭ (၁)

ဆၧလၧထံၫအဝံအစၧၩ့(သယံဇာတ)နီၪ မွဲဆၧအအီၪၥၭမၧၫ့လဖၪ ထီးအလူၬအဂး အရ့ၩဒိၪထုၬ လိၫဝ့ၫဒၪ နဲၩ့ဎီၩ့အခၪ့ထံၭခၪ့ဎၧၩ့နီၪလီၫႉ ၦခမျၧးၥံၪလဖၪအဂး ဆၧအၪ့ဆၧအီၩႇ ကအီၪထံၫအဂးဒဲ ဆၧဖိၪဆၧဎါလဖၪထီးအလူၬ အဂး ထံၫကန့အလၧၫ့အဎွ့ၩနီၪ မွဲအရ့ၩဒိၪဝ့ၫဒၪတၡါလီၫႉ ဆၧလၧထံၫနီၪ ၦခမျၧးၥံၪလဖၪထီးလူၬအဂး လအီၪလမငါဘၪ အရ့ၩဒိၪထုၬလီၫႉ

မွဲဆၧဘဲၫနီၪ ထံၫလၩ့ၡၩႇ ထံၫၥလိၪၥလံၬထၪ့ ႇ ထံၫအဆၧၫ့လၧပအီၩ ဂဲၫလၩ့ၡၩ မွဲဝ့ၫ ဆၧကၪဆၧဂဲၩ လဖၪယီၩ ထီးအလူၬနီၪ မၩပျၩ့ထၪ့ဝ့ၫဒၪကန့အဂး ဂၪ့ခိၪကုလၥၭပဂၭအဆၧထံၫလၩ့ဒီၪလၩ့အဖၧၩ့ ၁၉၉၂နံၪ့နီၪ ဂၪ့ခိၪ ကုလၭၥၭပဂၭ အနဲၩ့ဎီၩ့ဒဲ ဘၪထွ့ၫလၧဆၧလ့ၩထၪ့လ့ၩထီၪ့ဆၧဒၪလၩ့ဎိၭနီၪ အဆိၪထုၬအီၪပဂုးခၧၫ့ဝ့ၫဒၪ ကိၭနံၪ့ဒ့ၭ လၩမၭ ၂၂ၥၫ့နီၪ မွဲ ဂၪ့ခိၪထံၫအမုနံၩ (World Water Day )  အကၠီၩ့ အဂုးခိၪထုၬ ဂၪ့ခိၪထံၫမုနံၩနီၪ စၭထၪ့မၩလၩမၩဖၩ ့ၡီၩ့ထၪ့ဝ့ၫခီၫလၧ ၁၉၉၃နံၪ့ လၩ မၭ ၂၂ၥၫ့ အကၠီၩ့ပၥ့ၪယၫဘၪနီၪလီၫႉ

ဘဲၫယီၩ နံၪ့ ၂၀၂၄နံၪ့ ဂၪ့ခိၪထံၫမုနံၩအဂး အီၪက့ၪထၬဝ့ၫ ဆၧထိထီၫ့နီၪမွဲ ဆၧရူၪဆၧမူၬအဂး ထံၫ “Water for PEACE” နီၪလီၫႉ ဂၪ့ခိၪထံၫမုနံၩယီၩ နဲၪထၪ့ဝ့ၫဒၪလၧ ထံၫလၧပၥိၩ့ထၪ့န့ဒဲ ပအီၩန့လဖၪ ထံၫအဆံၫ့အဖျ့ၪ ကအီၪအဂးဒဲ ထံၫအဆၧၫ့အခၪ့ထံၭခၪ့ဎၧၩ့ၥံၪနီၪ ကဆုးအီၪလဆိၩၡၩအဂး အရ့ၩဒိၪဝ့ၫ အကၠီၩ့နီၪလီၫႉ ဆၧလၧထံၫဂဲၫ လၩ့ၡၩနီၪ မွဲ ခိဆၧၩ့ချံၪ့အၪ့လဲၩထၪ့အၥၭအကၠီၩ့ ဂၪ့ခိၪချိၫ့ခိထၪ့ဂီၩ့ လးၥံၪ့ဆ့ၭ လအီၪဘၪႇ ၥံၪ့ ႇ ၥံၪ့ကျိၭၥံၪလူၬပျီၩ့ခွံၬ မွဲဝ့ၫ နဲၩ့ဎီၩ့ဂၭဂီၩ့ဂၭစၪထၪ့ဒဲ ဆုးကျိၭအၥၭလၬခီၩ့လၬဘၭနီၪလီၫႉ

WHO ဂၪ့ခိၪဆၧဆီၪ့ဆၧချဲၪ့ခရၧၫ့ဖၭဒိၪ အဆၧထူၭထၪ့အဖၧၩ့ ဂၪ့ခိၪၡၩအဆၧဝံဆၧနၭ လံပိၩကပိၩနီၪ ကဖီၩ့ဖျ့ၭလၧ ထံၫအဆၧလၩ့အၪ့ယိၫ ထံၫလၧပအီၪအလၧၫ့အဎွ့ၩလအီၪဘၪအကၠီၩ့ ပၥ့ၪယၫဘၪနီၪလီၫႉ ဆၧအယီၩနီၪ ဂၪ့ခိၪချိၫ့ယီၩ ၦၡၩဖိၭဘိၭ အခွး နံၫထီၫ့နီၪ မွဲထံၫအဆံၫ့အဖျ့ၪလၧပအီၩ လအီၪဒံၭဘၪနီၪလီၫႉ ကိၭနံၪ့ဒ့ၭ ဂၪ့ခိၪချိၫ့ယီၩ ၦၡၩဖိၭဘိၭ ဎိၭကုၭ ၥၧၫ့လၬနီၪ မွဲထံၫအကၠီၩ့ ကဲၪထၪ့ဝ့ၫဒၪ ဂူၭလ့ၩဆၧဆၫၥံၪဒဲ ဘၪၥံၫဝ့ၫဒၪအကၠီၩ့ ဆၧဆီၪ့ဆၧချဲၫ့ ပကိၪ့ၥ့ၪလဖၪ လီၩထၬဝ့ၫဒၪနီၪလီၫႉ အအၪထုၬနီၪမွဲ ယဲနံၪ့အဖၫ့လၬ ဖိၪၥၪဆံၭၥံၪလဖၪနီၪလီၫႉ ဆၧလၩ့အၪ့ယိၫလအီၪဘၪ ထံၫပအီၩလဖၪဒဲ နဲၩ့ဎီၩ့အဆံၫ့အဖျ့ၪအ့ၪမွဲအီၪစွါဘဲၫ ဆၧဘၪၥံၫယီၩ ပကဒၩ့ဝ့ၫကန့အကၠီၩ့ ပၥ့ၪယၫဘၪနီၪလီၫႉ