ခၫကၫဘိၫရၫဇံၫခိၪလီၩ့အဂဲး

ခၫကၫဘိၫရၫဇံၫခိၪလီၩ့နီၪ လၧခးအ့ၩၡၩမုထၪ့ယီၩ မွဲအထီၫထုၬခိၪလီၩ့ဂီၩ့ အီၪဝ့ၫဒၪလၧ ခးပယၩ့ ကခၠ့ၫဆၨၩခးဒီၪ့ လံၩခံၫကကဲၩ့ ခးဆၧၫ့အလးနီၪလီၫႉ ဆုးကျိၭအၥၭလၧ ဟိမဝန္တာခိၪလီၩ့ဂီၩ့  ပၫ့လဲၪထံၫမ့ၬပၫ အဖၫ့ခိၪ ထီၫဝ့ၫ ၁၉၂၉၆ (ပေ)နီၪလီၫႉ ခိၪလီၩ့ယီၩ အထီၫအီၪဝ့ၫ ၁၉၂၉၆ (ပေ) ဒဲ ဆၧထီးနဲၪ့လနၩ့နၩ့လီၩ့ထၬဝ့ၫ အထီၫအီၪ ၁၉၃၁၄ (ပေ) နီၪလီၫႉ ဆၩ့လၩ့ဝ့ၫဒၪ ကနံၪ့ခၧၩ့နံၪ့နီၪလီၫႉ မွဲဒံၭလၧ တိဗက်ဒဲ ခးပယၩ့အဆၧၫ့ဒံၭ နီၪလီၫႉ ယဲၩ့ဝ့ၫလၧ တံဘဲခးဆၧၫ့ ဖိၭဘိၭ နံၫမဲၪနီၪလီၫႉ

ဆၧအမံၩ့မွဲဝ့ၫ ခၫကၫဘိၫရၫဇံၫနီၪ မွဲဝ့ၫ တံဘဲဆၧချဲၩ့ အီၪဂဲၫစဲၪ့လၩ့လၧ ခၫခၫဘိၫရၫဇံၫ အခီၫပယီၫ အီၪဝ့ၫလၧ တံဘဲအလၨၪ ခၫ နီၪ မွဲဝ့ၫ ဆၩ့ ဒဲ ခၫဘိၫနီၪ အခီၫပယီၫ အီၪဝ့ၫဒၪ အဘွၩစွါဘဲၫႉ ခၫကၫဘိၫရၫဇံၫနီၪဘိၭ မွဲ အီၪလၧ ကခၠ့ၫဆၨၩခးဒီၪ့ ရဝၫ့ဆၨၩဆၬလဖၪ အဆၧချဲၩ့ဂီၩ့ ခၫကၫပူၫနီၪ အခီၫပယီၫ အီၪဝ့ၫ ချဲၩ့ဆၧဒဲ အလူစဲၪ့ထၪ့ဂီၩ့ ရၫဇံၫအခီၫပယီၫနီၪ မွဲ ခိၪလီၩ့အကၠီၩ့တၭ အခီၫပယီၫဖျီၪ့ထၪ့ဝ့ၫဒၪလၧ ခိၪလီၩ့လၧ အလူစဲၪ့ထၪ့နီၪလီၫႉ

နံၪ့ ၁၉၂၃နံၪ့ ခးအံၫ့ဒံယၩပထိၪဖံၭခရၧၫ့လဖၪ ဂဲၫထီၩ့လၧ ဝံးပူၫတၫအိၫ လံၩခံၫကကဲၩ့နီၪဂီၩ့ အဝ့ၫၥံၪ ဒၪဂု ခိၪလီၩ့ ခၫကၫဘိၫရၫဇံၫယီၩ အဆိၪထုၬနီၪလီၫႉ ခၫကၫဘိၫရၫဇံၫ ခိၪလီၩ့ကဘီၩ့ယၫနီၪ ဒၪဘၪ ၥံၪ့ဆိၩ့ (ထင်းရှုး) ၊ ၥံၪ့ထိၭဖၫ (ဝက်သစ်ချ) ၊ မေပယ်၊ ၥံၪ့နီၫ့ခီၫ့ (တောင်မြင့်ဇလပ်) ၊ ပရီမြူလာ၊ လီလီ၊ မြေကပ်သစ်ခွ အထံၭလဖၪၥံၪနီၪလီၫႉ လၧခၫကၫဘိၫရၫဇံၫခိၪလီၩ့ကဘီၩ့ယၫနီၪ အီၪန့ တံဘဲ ဆၨၩဖိၪၥံၪလကၭဘၪ ထလုဒဲ ထရိၫ့ ဆၨၩဆၬၥံၪလဖၪ မွဲအီၪဆ့နီၪလီၫႉ