ပဂၪ့ခိၪချိၫ့ကဎံၪလၩထၪ့အဂး ဖီၪ့ဂုးထၬနဲၩ့ဎီၩ့ဆံၭ (၄)

ဆၧလဖၪၥံၪယီၩနီၪ ပဘျၩ့ကန့ဒၪလၧ နဲၩ့ဎီၩ့အဆၧလၩ့အၪ့ယိၫအဂး ပဒၩ့ဆိၫထၬ ဆၧထံၫလၩ့ဒီၪ လၩ့လဖၪနီၪလီၫႉ ဆၧယိထွ့ၫနဲၩ့ဎီၩ့ ဆၧမၩလဖၪနီၪ ဆၧၥိၩ့လၩ့ၡၩထၪ့စီၩ့ဂဲးႇ ၥိၩ့ထၪ့ နဲၩ့ဎီၩ့စီၩ့ဂဲးလဖၪဒဲ ဆၧအခူၪစဲၪ့ထၪ့န့ ဆၧပိၭဆၧလၫ့လဖၪနီၪ ပၥိၩ့လၩ့ၡၩထၪ့တၭ ၡၩခံးဂး နဲၩ့ဎီၩ့အဂ့ၩ ဆၧမၩဒိၪထၪ့ထီၫ့ထၪ့ ဆၧမၩလဖၪ ပၫဝ့ၫဒၪလီၫႉ ဖ့ၪနဲၪပၧၩ နဲၩ့ဎီၩ့ဆၧလၩ့အၪ့ယိၫအလူ့လဖၪနီၪ မၩလိၪထၪ့ဂီၩ့ ဘဲၫနဲၩ့ဎီၩ့လဂၭဂီၩ့ဘၪႇ ခိဆၧၩ့ချံၪ့ကဂ့ၩထၪ့အဂး မၩထၪ့ကၠၭ ဝ့ၫဒၪနီၪလီၫႉ ခိဆၧၩ့ချံၪ့အဆၧၫ့အထီလဖၪနီၪ ပမၩထီးထၬလန့ဘၪဒဲ ဂဲၫကဲၪထၪ့ဝ့ၫဒၪ ဆၧလၩ့အၪ့ယိၫနီၪ ဆၧဒၪဎီၩ့ဆၧၫ့ယၫနဲၩ့ဎီၩ့ဆၧလၩ့အၪ့ယိၫႇ ဆၧမၩလိၪလဖၪ အီၪဒၪ ပကဘၪ ဒၪဎီၩ့ဆၧၫ့ ယၫကၠၭနီၪလီၫႉ

ခိဆၧၩ့ချံၪ့အၪ့လဲၩ့ထၪ့အၥၭနီၪ ပထိးဆၧၫ့ကန့အဂး ပကဘၪဆုးဖီၪ့ဂုးထၬ နဲၩ့ဎီၩ့နီၪလီၫႉ ကနံၪ့ဒဲကနံၪ့ ဂဲၫအၧၩ့ထၪ့ဝ့ၫဒၪ ခိဆၧၩ့ချံၪ့ဆၧလၩ့အၪ့ယိၫယီၩ ၦခမျၧးၥံၪလဖၪ ဘၪထိးဂ့ၩဘၪ ဆဲၫ့အကၠီၩ့ ပအီၪလၧဆၧၥ့ၪယၫ နၪၥ့ၪကိၭဒံၩကိၭဂၩ ၦခမျၧးၥံၪ ကြၨၭမၩဎံၪလၩထၪ့ထဲၩ့ ဂၪ့ခိၪနီၪလီၫႉ အ့ၪပအဲၪပနဲၩ့ပဎီၩ့ႇ ပကပဒၩ့ထၬအဂး ပၥၭအီၪႇ ပအီၪၥၭမၧၫ့လၧၥနိၫအဖၧၩ့စွါဘဲၫ ဂဲၫခိၪယီၩ ကဂဲၫဎံၪလၩထၪ့န့ဘဲၫယီၩနီၪလီၫႉ