ဆၧဒိၭန့ဘၪဒံၫကၫ့အဆၧကဲၪအဂဲး

နံၪ့၂၀၂၃နံၪ့ လၩအီတိၫဘၧၫ ၂၉ၥၫ့ လဂီၩ၈နၩရံၫခီၫအခံၫ့နီၪ ဘၪဆၧမၩလၩမၩဖၩ့ ဆၧဒိၭန့ဒံၫကၫ့အဆၧ ကဲၪအီၪဝ့ၫဒၪလၧ ဒိၩ့ပၥံၫ့ စံၫ့ပံတၧၫ ကၥံၪဒရဲၫၥရိၬဖၧၩ့နီၪလီၫႉ

ၦလၧအဒိၭန့ဘၪ ဒံၫကၫ့အဆၧကဲၪ အီၪဝ့ၫဒၪ နံၫဂၩဂီၩ့ ၦလဖၪနီၪ မွဲဝ့ၫဒၪလၧ Bro Carolus & Bro.Fidelips နီၪလီၫႉ Bro Carolus နီၪ အီၪဝ့ၫဒၪလၧ စံၫ့မ့ၫရံၫ(ထံၫဂူၥၫ့) ဆၧအီၪကီၪ့ဒဲႇ Bro.Fidelipsနီၪ အီၪဝ့ၫဒၪလၧ မ့ၫရံၫလၩ့ဆၧအီၪကီၪ့နီၪလီၫႉ

ၦလၧအလ့ၩခိၪလ့ၩနါ ဖ့ၪလၫ့အ့ၪအဝ့ၫၥံၪ ဒံၫကၫ့အဆၧကဲၪနီၪ မွဲဝ့ၫဒၪလၧ ဒိၩ့ပၥံၫ့ဆၧအီၪကီၪ့ၥၫ့ခိၪဒိၪ ဟ့ၫနရံၫမၩ့အဲၪချံၫ့နီၪလီၫႉ လၧမံဆၩဆၧလုထၪ့အဖၧၩ့ ၥၫ့ခိၪဒိၪဖ့ၪလၫ့အ့ၪအဝ့ၫၥံၪ ဒံၫကၫ့အဆၧကဲၪအခၫနီၪ အၪ့စၪ့ဘၪအဝ့ၫၥံၪ အဝ့ၫၥံၪယီၩ လၧနးခီၫ့မိၡါဒဲနးၥၭဆၧဆံၫ့ဆၧဎံၪအဖၧၩ့ႇ လၧဆၧခိၭနၪခိၪနါအဖၧၩ့ႇ လၧယွၩအ ဆၧၥီၪ့ဆၧၥၫ့အဖၧၩ့  ထဲၩ့ဖီၪ့ထၪ့ဖံၭထၪ့ယွၩအဆၧဖံၭဆၧမၩ ထၧၫ့အၥံၫအၡါ ကန့ဧၪအဂဲးနီၪလီၫႉ အဝ့ၫၥံၪယီၩဆ့ လၧယွၩအမ့ၬယၫ လၧၡၩခမျၧးအမ့ၬယၫ ကထဲၩ့ဖီၪ့ထၪ့ဖံၭထၪ့ ယွၩအဆၧဖံၭဆၧမၩလၧနးခီၫ့ဒဲနးၥၭ ဆၧဆံၫ့ဆၧ ဎံၪဖၧၩ့ႇ လၧယွၩအဆၧၥီၪ့ဆၧၥၫ့အီၪထၬဝဲၩလဖၪအဖၧၩ့ႇ ဆၧခိၭနၪခိၪနါလဖၪအဖၧၩ့ ကထဲၩ့ဖီၪ့ထၪ့ဖံၭထၪ့ယွၩ အဆၧဖံၭဆၧမၩ ထၧၫ့အၥံၫအၡါအဂဲး Broနံၫဂၩယီၩ အုၩ့လၩ့အီၪလၩ့အၥၭလၧ ယွၩမ့ၬယၫ လၧၥၫ့ခိၪဒိၪအမ့ၬယၫ လၧၥၫ့မုၥၫ့ခၫ မံၭထၭမုၪ မံၭထၭခွၫလဖၪအမ့ၬယၫ လၧမိဖါဘူၭထံးလဖၪအမ့ၬယၫဒဲ လၧၦခမျၧးအမ့ၬယၫနီၪလီၫႉ

မံဆၩဆၧလုထၪ့ဖၧၩ့ ၥၫ့ခိၪဒိၪစံၭဘၪဝ့ၫ “ယွၩကိၭပၧၩ ယွၩရွံထၪ့ပၧၩႉ ဘၪဆၧထိးကိၭပၥၭနီၪ အီၪဂဲၫဝ့ၫဒၪ လၧယွၩအီၪနီၪလီၫႉ ဒံၫကၫ့နံၫဂၩယီၩနီၪ လမွဲဘၪလၧ မိဖါၥံၪအၪ့မၧၫ့ဆီၪ့ အၪ့မၧၫ့နီၩ့အကၠီၩ့ ရွံထၪ့ဖၧၩ့ၥၭအယီၩ လမွဲ ဘၪဒဲ မွဲလၧယွၩကိၭအဝ့ၫၥံၪ ယွၩရွံထၪ့အဝ့ၫၥံၪအကၠီၩ့ အဝ့ၫၥံၪယီၩ ဂဲၫထီၩ့လၧအလးထယီၩနီၪလီၫႉ မိဖါၥံၪလၧ အလုထၪ့အ့ၪပၧၩ ဖိၪခွၫလဖၪယီၩဆ့ ယစံၭခိးစံၭတၩဘၪနီၪလီၫႉ  လကၭဘၪ မိဖါထီးလူၬလဖၪဆ့ ဘဲၫၥိၭဖိၪၥံၪ လဖၪ အၥၭကအီၪလၧကမိကဲၪၥၫ့မုၥၫ့ခၫအဂးဆ့ အၪ့ကံၩ့ဘၩဆိၪဖၪဂီၩ့ ၥိၫ့စိၩဘၪနၥံၪအဖိၪအဒံၪလၧ ဆၧအလး ယီၩလါဆံၭႉ ပကဘၪကူၭဆၧနီၪအီၪဝ့ၫဒၪအၪမၬဒဲ ပလိၪဘၪၦၡၩလၧကကူၭဆၧလဖၪအၪမၬနီၪလီၫႉ ဘဲၫနၥံၪအဖိၪ အဒံၪအၥၭလုအီၪအၥိၭဆ့ မၩလၧၫ့ဎွ့ၩအ့ၪလါဆံၭႉ ယွၩအဆၧကိၭကမံၩ့နီၪ ဆၧကဲၪၡူၭကဲၪဖျဲၩ့လအီၪဘၪတၭ ယွၩ အဆၧကိၭ ကိၭမံၩ့နီၪ မွဲဆၧဎိၭထံၪဎိၭဒီၪအီၪဝ့ၫဒၪအဂဲး” ဘၪထွ့ၫလၧယွၩအဆၧကိၭအဂဲးနီၪ ၥၫ့ခိၪယီၩလီၩလၩ့လါ လၩ့ဝ့ၫဒၪ ဘဲၫနီၪအၥိၭနီၪလီၫႉ

မံဆၩဆၧလုထၪ့လချူၭဂီၩ့ဒံၭဘၪအထီနီၪ ၦလၧအကဲၪထၪ့ဒံၫကၫ့လဂၩမွဲဝ့ၫ ဒံၫကၫ့ဖီဒဲလစ်နီၪ “စံၭခိးစံၭ တၩဘၪယွၩႇ စံၭခိးစံၭတၩဘၪၥၫ့ခိၪဒိၪႇ စံၭခိးစံၭတၩဘၪ မိဖါဘူၭထံးလဖၪႇ စံၭခိးစံၭတၩဘၪ အဆရၫၥၫ့မုၥၫ့ခၫ လဖၪႇ ၦလၧအမၩဆၧၩ့အဝ့ၫၥံၪလဖၪဒဲ ၦဆူနဲၩဖိၪလၧအဂဲၫထၪ့ မၩလၩမၩဖၩ့အဝ့ၫၥံၪလဖၪထီးလူၬအဂဲး” စံၭဝ့ၫဒၪ နီၪလီၫႉ

လၧမံဆၩဆၧလုထၪ့အဖၧၩ့ ၦၡၩဂဲၫထၪ့မၩလၩမၩဖၩ့ဘိၪ့မုနံၩယီၩ ကအီၪဝ့ၫဒၪ ဖိၭဘိၭအဂၩ ၈၀၀အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ