ဆၧလီၩလၩ့လၬလၩ့ ဆၧၥၭထိၬပရၧၫ့ႇ မုအီၪပွံၭနံၩ မုနွ့ၫ (၂၉)

အခံၫ့အခၫဘဲၫနီၪအိၩႇ ၦၡၩအၥၭထၪ့ဘၭ ၁၂နံၪ့ ထီၩ့စိၩ လၧ ၆၅နံၪ့ ၦၡၩကိၭဂၩဒ့ၭနီၪ အမူၩဒၩအီၪ ကဘၪဖ့ၪလၫ့အခီၫ့လီၫႉ  လါနၫ့ဂ့ၩႇ ၦယုဒၫဖိၪလဖၪနီၪ ဘၪအီၪလၧၦရိမၫအဆၧပၧၩ့အဖၫ့လၬ ဒဲဘၪဖ့ၪလၫ့အခီၫ့လၧၦဆၨၩအဂူၫဂၩအကၠီၩ့ ဆၧမံၫ့ၥုၪ့မံၫ့ၥၭအီၪအ့ၬႉ  
ၦဖၫရစံၫ ဒဲၦဟ့ၫရိဒံယၭလဖၪ ဂဲၫအၪ့စၪ့ယ့ၫၡူၬ လၧဆၧၥုၪ့ဂ့ၩၥၭဘွၩဖၧၩ့လမွဲဘၪတၭႇ ဂဲၫအၪ့စၪ့အဝ့ၫ ဘဲၫအီၪက့ၪဆၧမၪလၧယ့ၫၡူၬအလီၩ့ကန့ဝ့ၫအဂးလီၫႉ 
ပဖ့ၪလၫ့အခီၫ့လၧစံစၧၫနီၪႇ မွဲအတီၩလတီၩဘၪလဲၪႉ လီၩဘၪပၧၩနးထံၪဘီၪ.
ဆၧအၪ့စၪ့ဆၧချဲၩ့လထုၪယီၩ ၦဘၪစံၭဆၧၫ့ဝ့ၫႇ ကၪမၬလီၫႉ လၧဆၧၥုၪ့ကဲၪ့ၥၭကဲၪ့အဖၧၩ့ႇ အဝ့ၫၥံၪမိမၩကၪယ့ၫၡုၬႇ ယ့ၫၡူၬအဆၧချဲၩ့စံၭဆၧၫ့အ့ၪဘၪမၪစွါဘိၩႇ အဝ့ၫၥံၪႇ ကအီၪက့ၪဆၧမၪဂီၩ ကစ့ၩရၫ့အဝ့ၫလီၫႉ 
ယ့ၫၡူၬအ့ၪစံၭဆၧၫ့ႇ ဆၧဖ့ၪအခီၫ့လၧစံစၧၫလဂ့ၩ(တီၩအ့ၬ) စွါဘိၩႇ အဝ့ၫကကဲၪထၪ့ ၦလၧအထၫ့ဒုၪဒၩ စံစၧၫတၭႇ ၦဟ့ၫရိဒအၫ့ဒဲ ၦပၧၩ့ ဆၧၦရိမၫဖိၪလဖၪႇ အၥၭကထၪ့အဝ့ၫတၭႇ ကစ့ၩရၫ့စၪအဝ့ၫလီၫႉ 
ယ့ၫၡူၬအ့ၪစံၭႇ ဆၧဖ့ၪလၫ့အခီၫ့လၧစံစၧၫနီၪ မွဲအတီၩအဘၪစွါဘိၩႇ အဝ့ၫဒၪ ကကဲၪထၪ့ ၦလၧအထိးဆၧၫ့ ၦရိမၫဖိၪအဆၧပၧၩ့တၭႇ ၦဖၫရစံၫၥံၪႇ ၦအံၫစရ့လၭဖိၪလၧ အအဲၪဆၨၩအဲၪဆၬလဖၪ အၥၭကထၪ့အဝ့ၫႇ ကစီၪ့ဘၪမၪအဝ့ၫလီၫႉ  
လါနၫ့ဂ့ၩႇ ယ့ၫၡူၬၥ့ၪယၫထၬအဝ့ၫၥ့ၪ အဆၧကိၪ့ထၪ့ဖၭလၩ့ႇ အၥုၪ့ကဲၪ့ၥၭကဲၪ့အကၠီၩ့ႇ ယ့ၫၡုၬစံၭဆၧၫ့အဝ့ၫၥံၪ လၧဆၧကိၪ့ၥ့ၪကိၪ့ဘၪဒိၪဒိၪလ့ၬအဖၧၩ့လီၫႉ 
ယ့ၫရှူၬအၪ့မၧၫ့ ၦဂဲၫဆိၬန့စ့ၩဒန့ရံၫလဘံၪ့ဂီၩ့ႇ အၪ့စၪ့ဝ့ၫႇ  မွဲပလၫအခံးအဂၩ့ ဒဲအဆၧကွ့ၭအၥၭ အီၪလၧစ့ၩဒန့ရံၫအဖၫ့ခိၪလဲၪအခၫႇ  အဝ့ၫၥံၪစံၭဝ့ၫ မွဲစံစၧၫအခံးအဂၩ့ဒဲအဆၧကွ့ၭၥၭအီၪလၧခီၫ့စ့ၩအလီၩ့လီၫ.- 
လၧစ့ၩဒန့ရံၫအဖၫ့ခိၪနီၪ "တံဘ့ၫရံၫအူၩစံစၧၫအီၭဂုၬစတူၩႇ ၦလုဆၧအခိၪယွၩအီၭဂုၬစတူၩအဖိၪခွၫ"
ယ့ၫရှူၬစံၭအဝ့ၫၥံၪႇ  ဖ့ၪလၫ့ထဲၩ့စံစၧၫလၧစံစၧၫအဆၧတၭ ဒဲယွၩလၧယွၩအဆၧဆံၭ.
ထၧၫ့ဖုဝဲမုၪခွၫၥံၪဧ့ႇ ဆၧလၧစံစၧၫအဆၧနီၪ မွဲမန့လဲၪႇ ဒဲ ဆၧလၧယွၩအဆၧနီၪလဲၪႉ 
ၦၡၩအီၪလၧဂၪ့ခိၪချိၫ့ယီၩအထီႇ ၦၡၩခမျၧးလဖၪ
အမူၩဒၩအီၪ လၧကဘၪယူၭယၪ့အထံၫခးခိၪနါၥံၪ ဒဲထံၫခးအၥနိၫလဖၪနီၪလီၫႉ ၦၡၩအမူၩဒၪအီၪ လၧကဘၪဖ့ၪလၫ့အခီၫ့လီၫႉ  လါနၫ့ဂ့ၩ ထံၫခးခိၪၥံၪအနၫ့ဆါဒၪဝ့ၫလဖၪနီၪ မွဲကဘၪမွဲဝ့ၫ ယွၩအၡၩယိဆၧႇ ယွၩအခ့ၫအၡၩႇ ၦလၧအယူၭယၪ့ခိၭနၪယွၩလီၫႉ 
လၧအခံၫ့အခၫဘိၩနီၪအိၩႇ စဎွၩၥံၪနီၪ ၦၡၩဘၪအီၪက့ၪဒိၪဝ့ၫ ဘဲၫယွၩကဂၩအၥိၭလီၫႉ 
ပမူၩဒၪအီၪ လၧယွၩအဖၫ့ခိၪနီၪ ကဘၪအီၪက့ၪဒိၪ လၧပမူၩဒၩအဂူၫဂၩအမ့ၬယၫလီၫႉ ယ့ၫၡုၬစံၭဝ့ၫႇ ဖ့ၪလၫ့ထဲၩ့ယွၩ လၧယွၩအဆၧနီၪဆံၭႉ ယွၩအဆၧနီၪ မွဲဆၧနီၪလဖၪလဲၪႉ 
ဆၧအီၪလၧဂၪ့ခိၪချိၫ့ဖၧၩ့ယီၩထီးလူၬႇ ၦၡၩႇ ဆၧဖိၪဆၧဎါႇ ဆၧထံၭဆၧဘီၩ့ႇ မုလၩၡၪလဖၪႇ မွဲဝ့ၫဒၪ ယွၩအဆၧတဲၩ့လၩ့လီၫႉ လကၭဒံၭဘၪႇ ယွၩတဲၩ့လၩ့ထၬၦၡၩႇ ဘဲၫအနၫ့ဆါအခံးအဂၩ့အကၠီၩ့ႇ ယွၩအခံးအဂၩ့ႇ ဒဲအဆၧကွ့ၭၥၭႇ ယွၩအဆၧဂ့ၩဆၧဘွၩနီၪ အီၪဖျီၪထၪ့ လၧဆၧဘၪတဲၩ့လၩ့ၥၭကိၭမံၩ့ဒ့ၭအလီၩ့ႇ လၩ့ဆၫ့ဒၪဆၧႇ အီၪလၧၦၡၩအနးၥၭအလီၩ့လီၫႉ လကၭဒံၭဘၪႇ ဆၧယူၭယၪ့ပၭကၩႇ ဆၧစံၭထၪ့အၪ့အူၭႇ ဆၧဘိၪ့ထၪ့ဘၩထၪ့ႇ ဆၧလၩဆၧဖၩ့ႇ လဖၪနီၪ မွဲဝ့ၫယွၩအဆၧလီၫႉ ပနးခီၫ့နးၥၭႇ ပဆၧၥၭမၧၫ့ယီၩ  မွဲဝ့ၫဒၪယွၩအဆၧအကၠီၩ့ႇ ပဖ့ၪလၫ့အ့ၪ စံစၧၫႇ ပဖ့ၪလၫ့အ့ၪမုၪခီၩလဲးန့အ့ၬႉ ပကဘၪဖ့ၪလၫ့ထဲၩ့ လၧယွၩအစူၪဖၧၩ့လီၫႉ 
ဆၧနီၪအကၠီၩ့ လၧပဆၧၥၭမၧၫ့မုကိၭနံၩဒ့ၭအဖၧၩ့နီၪႇ ပမူၩဒၩအီၪ လၧပကဘၪ ၥီၪ့လိၪနဲၪလိၪအ့ၪ ပဖိၪပလံၩ ယွၩအဖၧၩ့ၥုၪ့ဖၧၩ့ၥၭႇ  ပကဘၪလုထၪ့ ပနးခီၫ့နးၥၭႇ ပကဘၪဖ့ၪလၫ့အခံၫ့ႇ လၧဆၧဘၩဆိၪဖၪႇ ဒဲဆၧဘိၪ့ထၪ့ဘၩထၪ့ယွၩအဂးနီၪလီၫႉ