ဆၧလီၩလၩ့လၬလၩ့ ဆၧၥၭထိၬပရၧၫ့ႇ မုအီၪပွံၭနံၩ မုနွ့ၫ (၂၂)

လၧမုနံၩယီၩ ဆၧၥၭထိၬပရၧၫ့ဖၧၩ့ႇ ယ့ၫရှူၬလီၩ့ၥ့ၪယၫဘၪ အထံၩအဖျဲၥံၪ လၧအနၫ့ဆါအဂဲးႇ ယွၩအဖိၪခွၫဎြံၬနီၪ မိဘၪထိးဆၧနၭဆၧၡၪ့အၪမံၩ့ လၧၦၥုၪ့က့ၭၥၭၡါ, ဒဲလၧၦလုဆၧအဒိၪၥံၪ, ဒဲလၧၦကွ့ၭလံၬလဖၪအစူၪဖၧၩ့တၭ, မိဘၪဆၧမၩၥံၫဝ့ၫတၭ, ထီးဘၪၥၧၫ့နံၩလနံၩနီၪ, မိဂဲထုၪ့ထဲၩ့ဝ့ၫလီၫ. 

ယ့ၫၡုၬကဘၪဆၧဖ့ၪလၫ့ခွံၬဝ့ၫ လၧၦလုဆၧအဒိၪၥံၪႇ ၦၥုၪ့က့ၭၥၭၡၭၥံၪအစူၪဖၧၩ့ႇ  ကဘၪထိဆၧနၭဆၧၡၪ့ႇ ထိးၥံၫဒံၭဘၪအဂဲးနီၪ  လီၩ့ၥ့ၪယၫအ့ၪအထံၩအဖျဲၥံၪ ၥၧၫ့ကၠၪႇ ၥၧၫ့ဘျၩ့လီၫႉ လါနၫ့ဂ့ၩ အထံၩအဖျဲလဖၪႇ ယွၩအဖိၪခွၫႇ လၧအစီၩ့အမၩ့ဒိၪလဂၩႇ ကဘၪထိးၥံၫအဂဲးနီၪ အဝ့ၫၥံၪနၪဝ့ၫၥ့ၪအ့ၬႉ ထိးဆၧၫ့ဝ့ၫန့အ့ၬႉ 

လၧအထီဘဲၫနီၪအိၩႇ ၦယုဒၫဖိၪခိၭယိလါဝ့ၫႇ ဆူနဲၩဝ့ၫ လၧယွၩအဖိၪခွၫကဆါဎြံၬနီၪ အ့ၪဂဲၫလၩ့လၧအကးကဖးႇ လၧအစီၩ့ဒိၪအမၩ့ဎိၩအဖၧၩ့ကကၠၪ   ထိးထဲၩ့တၩ့ထဲၩ့အဝ့ၫၥံၪႇ လၧဒုၪဒၭႇ ၦပၧၩ့ဆၧၦရိမၫၥံၪအစူၪဖၧၩ့အကၠီၩ့လီၫႉ 

စပံတၧၫ အုၩ့လၩ့အဆူနဲၩလၧယ့ၫၡုၬအခၫႇ  ယ့ၫၡူၬအၪ့အူၭအၪ့ဎၧၩ့အဝ့ၫႇ စံၭဝ့ၫႇ စယိနၫအဖိၪခွၫ စစဲမၧၫ့ဧ့ႇ နဘၪဆၧဆိၪဂ့ၩနဝ့ၫဒၪလီၫႉ လါနၫ့ဂ့ၩႇ ထီးအဝ့ၫနါဂၧၫ့ အကဆါ ကဘၪထိးဆၧၡၪ့ဆၧနၭႇ ကဘၪထိးၥံၫၥၭအခၫႇ စံၭအကဆါႇ ကဆါဧ့ႇ မွဲဆၧယၫ့ၥၭလါနၧၩဆံၭႉ ဆၧယီၩမွဲထီးဘၪနၧၩလဂ့ၩႇ အခၫႇ ယ့ၫၡူၬကိၭအဝ့ၫႇ လၧဒုၪဒၩႇ အၪ့မၧၫ့အဝ့ၫထဲၩ့ထဲၩ့လၧအလးခဲၫ့လီၫႉ စံၭအဝ့ၫႇ နမွဲယဆၧလၩ့ထံၩဖါအလးလီၫ. အဂဲးဘဲၫယီၩ နၥၭအီၪလၧယွၩအဆၧအ့ၬ, မွဲလၧၦၡၩအဆၧလီၫ. 

လၧဆၧအၪ့ယိၫအဖၧၩ့ႇ လၧဆၧအဲၪကွံၩယူၭယၪ့ႇ လၧဆၧၥုၪ့ဂ့ၩၥၭဘွၩအဖၧၩ့ႇ စပံတၧၫချဲၩ့ထၪ့ဆၧႇ စံၭအကဆါႇ မွဲနဖီၩ့ဖျ့ၭ လၧဆၧၡၪ့ဆၧနၭႇ လၧဆၧၥံၫဆံၭႉ အဆရၫႇ ကဆါႇ ယ့ၫၡုၬယွၩအဖိၪ ပဘၪထိးဆၧနၭဆၧၡၪ့နီၪ အဝ့ၫမုလါဝ့ၫအ့ၬႉ ထိးဆၧၫ့ဝ့ၫန့အ့ၬႇ နၪဝ့ၫၥ့ၪအ့ၬႉ  
လါနၫ့ဂ့ၩႇ လၧယ့ၫၡုၬအဂးႇ စပံတၧၫအဆၧချဲၩ့ယီၩႇ လၩ့ဂၬလၧဒုၪဒၩႇ လၧမုၪခီၩလဲးအဆၧကျဲၩ့ဖစီၩ့လီၫႉ ဘၪနီၪလဲၪစွါဘိၩႇ ဘဲၫၥိၭ ယ့ၫၡုၬကလၩ့ထံၩဖါအဂးႇ ကလၩ့မုလၩ့ဖၭလၧအဖါယွၩအဂးႇ ပမီၪ့ဘံၭအဖါယွၩအဂး မုၪခီၩလးကျဲၩ့ဖစီၩ့ယ့ၫၡူၬလီၫႉ 

ယ့ၫၡူၬနီၪ ဂဲၫလၩ့လၧဂၪ့ခိၪချိၫ့ဖၧၩ့ယီၩ မၩလၧၫ့ထၪ့ဎွ့ၩထၪ့ႇ အဖါယွၩအၥၭႇ ကဘၪထိးထဲၩ့တၩ့ထဲၩ့ဆၧဒဲၩဘၭဖိၪ ခၫ့ဖျီၫ့လၧအဆၧထိးနိၫ့ထိနၭႇ ဒဲအဆၧထိးၥံၫၥၭ လၧထုၪ့စူၪယၫအလီၩ့အကၠီၩ့ၥ့ၪယၫဆိၫဝဲၩ့ဝ့ၫလီၫႉ လါနၫ့ဂ့ၩ ယ့ၫၡူၬနီၪ ဘဲၫၦၡၩကဂၩအၥိၭႇ အဝ့ၫကဘၪဒၪခီၩ့ဆၧၫ့ယၫ ဆၧလဖၪနီၪ ၥၭမဲၪဝ့ၫဒၪလီၫႉ 

လၧချုၭထိးနိၫ့ထိးနၭဒံၭအထီ လ့ၩအၪ့ကံၩ့ဘၩဆိၪဖၪဆၧ လၧကျိၭဂၠဲၭစမၫနံၫအဖၧၩ့ႇ ဖါဧ့ႇ ဆၧလၧလိၫ့ယီၩအ့ၪၥ့ၪတၭႇ မွဲဆၧဒုၭဖီၩ့ခွံၬယၧၩဆံၭႉ