ဆၧလီၩလၩ့လၬလၩ့ ဆၧၥၭထိၬပရၧၫ့ႇ မုအီၪပွံၭနံၩ မုနွ့ၫ (၁၉)

အဲၪကွံၩဘၪထၧၫ့ဖုဝဲမုၪခွၫထီးလူၬၥံၪဧ့ႇ

ဆၧဘိၪ့ဆၧဘၩၥ့ၪထီးလူၬ အီၪဒၪလၧအဆၧဆူနဲၩဒၪဝ့ၫတၭႇ မုကိၭနံၩဒ့ၭႇ ဘိၪ့ထၪ့ဘၩထၪ့အယွၩႇ ဒဲအၪ့ကံၩ့ဘၩဆိၪဖၪထၪ့ လၧအယွၩအအီၪလီၫႉ 
 
ဆၧဆူနဲၩ ဒဲဆၧဘၩဆိၪဖၪနီၪ ဖ့ၪဂဲးဖ့ၪဘၭႇ မၩဂုးမၩခၧၫ့ထၪ့ၦၡၩအနးခီၫနးၥၭႇ လၧဆၧလၩ့အၪ့ယိႇ ဆၧကၪဆၧဂဲၩႇ ဒဲဆၧၡၪ့ဆၧနၭအထီနီၪလီၫႉ 

မုၪခီၩလးႇ ဆၧဒဲၩဘၭႇ ဆၧအၧၩ့ဆၧၥၫ့ႇ ဒဲဆၧၥံၫဒိၪလဖၪနီၪ ဂဲၫထဲၩ့အၪ့ဂုၬမၩၥံၫမၩဆၫႇ မၩနိၫ့မၩနၭႇ မၩနၧၩ့မၩစၪ ၦၡၩကဆိၩဘၪဆိၩႇ ထီးမုဆၫလနံၩယီၩ လၧကၭဒ့ၭဘၪ ကဆုးမၩဂၭဂီၩ့ ၦၡၩထီးဂၪ့ခိၪယီၩအထုၬလီၫႉ 

ဆၧနီၪအကၠီၩ့ႇ ယ့ၫၡူၬနီ ဂဲၫလၩ့လၧဂၪ့ခိၪချိၫ့ဖၧၩ့ယီၩ ဂဲၫလၩ့ထိးထဲၩ့တၩ့ထဲၩ့ ၦဆၧဒဲၩဘၭဖိၪၥ့ၪ လၧမုၪခီၩလဲးႇ လၧဆၧၥံၫဒိၪအစူၪဖၧၩ့လီၫႉ 

လၧလံၬဆံၫ့ဎံၪကနံၩယီၩအဖၧၩ့ႇ ပနါဂၧၫ့ဘၪ ကဆါယ့ၫၡူၬ ဂၭဖၭလၧထံၫဖံၭခိၪအဂဲးလီၫႉ လၧၦယူဒၫဖိၪၥံၪအဂးႇ ထံၫႇ မၫဆမံၭနီၪ မွဲဝ့ၫဒၪႇ ဆၧၥံၫဒိၪႇ ဆၧမိဒံၩမိဎွါႇ ဆၧဖိၪဆၧဎါအလၩ့ၥၭမဲၪလဖၪအီၪအလးႇ လၩ့ဆၫ့ဒၪဆၧႇ မုၪခီၩလဲးအလးလီၫႉ 
လံၩႇ ထံၫႇ ယ့ၫၡူၬတဲၩ့လၩ့ထၬအကၠီၩ့ႇ အီၪလၧအဝ့ၫအစူၪဖၧၩ့ႇ မုၪခီၩလဲး ဒဲဆၧနၪလဖၪနီၪ အီၪလၧအခၪ့ဖၫ့လၬ  အဝ့ၫမၩနၧၩ့မၩစၪဝ့ၫန့ႇ ဆၧလဖၪနီၪ ဘၪခိၭနၪအဝ့ၫအဆၧချဲၩ့လီၫႉ 

လံၩႇ မၫဆမံၭႇ လံၩမုလဖုၬလဖၪ လၧၦၡၩအဂး မွဲဝ့ၫဒၪ ဆၧလၩ့ၥၭမဲၪလဖၪလီၫႉ လံၩႇ လဖုၬလၩ့ ဆၧမၪဆၧမံၭႇ ပၪ့လဲၪဖၧၩ့အကၠီၩ့ ႇ ၦၡၩဘၪၥံၫအၪအၪလ့ၬလီၫႉ  လံၩမုလဖုၬနီၪ အဂဲဆီၪ့န့ၦၡၩဒံၭအကၠီၩ့လီၫႉ လါနၫ့ဂ့ၩ ယွၩနီၪ အဂဲးဆီၪ့န့ဒံၭ ဆၧကိၭအမံၩ့ဒံၭလီၫႉ 

အဲၪကွံၩဘၪထၧၫ့ဖုဝဲမုၪခွၫထီးလူၬၥံၪဧ့ႇ

အထံၩအဖျဲလဖၪ ကဒၪဘၪအကဆါကဂဲၫဂၭဖၭ လၧထံၫဖံၭခိၪနီၪ စီၪထၬဝ့ၫနးကၠၪအ့ၬႉ ဆၧနီၪအကၠီၩ့ ထီးအဝ့ၫၥံၪဒၪ ဆၧဂၭလၧထံၫဖံၭခိၪအခၫႇ အဝ့ၫၥံၪဆီၫ့မီၪ့ဝ့ၫ လၧအမွဲၦစၪႇ ဆၧမိဎွါအကၠီၩ့ႇ ၥၭမဲၪၥၭဖျဲၩ့ဆၧတၭႇ ကိၭၡၭထၪ့ဝ့ၫဒၪလီၫႉ လါနၫ့ဂ့ၩ ယ့ၫၡူၬမၩမုၬထၪ့ထဲၩ့အဝ့ၫအၥၭႇ စံၭဝ့ၫႇ 
မွဲနၥံၪအၥၭဎွံၫထၪ့ဘီၪႉ မွဲယၧၩတၭႇ ထီးၥၭမဲၪဆၧလဂ့ၩႉ အခီၫပယီၫနီၪႇ ၥၭမဲၪဆၧနးမံၩ့လဂ့ၩႇ ယၧၩနီၪ မွဲနၥံၪအကဆါႇ နၥံၪအယွၩတၭႇ ယအီၪလၧနၥံၪအၥိၭႇ ယအီၪလၧနၥံၪအနဲၩ့ထံၭအကၠီၩ့လီၫႉ 

လၧဆၧၥၭထိၬပရၧၫ့ကနံၩယီၩအဖၧၩ့ ပနါဂၧၫ့ဘၪ စပံတၧၫ့စဲၪလၩ့လၧချံၪဖၧၩ့ႇ ဂၭဖၭလၧထံၪဖံၭခိၪႇ လ့ၩစိၩလၧအကဆါအအီၪထီႇ ဒၪဘၪလပီၩဖၭဒိၪအကၠီၩ့ႇ ၥၭမဲၪဝ့ၫတၭႇ လၩ့အုၭလၧထံၫကျၩအဂဲးလီၫႉ 
လူၬပၧၩလူၬယၧၩႇ ပယါထံၫၥ့ၪလါနၫ့ႇ လံၩမုလဖုၬလၩ့ႇ လပီၩဖၭဒိၪထၪ့အထီႇ ပၥၭမဲၪဆၧၥ့ၪကိၭဂၩဒ့ၭလီၫႉ စစဲမၧၫ့ပံတၧၫလဂၩႇ အဆၧဆူနဲၩၡၩလါနၫ့ႇ အဝ့ၫၥ့ၪယၫအၪ့ကံၩ့ထၪ့ဆၧမၩဆၧၩ့ လၧယွၩအအီၪလီၫႉ 

ဆၧကၪဆၧဂဲၩႇ ဆၧၡၪ့ဆၧနၭႇ ဆၧလၩ့အၪ့ယိၫအထီႇ အ့ၪပယိလၩ့န့ၫပၥၭႇ န့ၫဆၧကၪဆၧဂဲၩႇ အ့ၪပဒိၭနဲၩ့ပၥၭ န့ၫပဂဲးပဘၭလၧၫ့စွါဘိၩႇ ပခၫ့ဂၭန့အ့ၬႉ ဆၧလဖၪနီၪ ကမၩဂၭဂီၩ့ႇ ကမၩနၧၩ့မၩစၪပၧၩလီၫႉ လါနၫ့ဂ့ၩႇ ယွၩနီၪအီၪယဲၩ့လပၧၩအ့ၬႉ ယွၩအီၪဘူၭဘူၭႇ လၧပနဲၩ့ပဎီၩ့ႇ အီၪဆၧၫ့ထုၪ့ ပမၩဆၧၩ့ပၧၩႇ ပမၩဖီၩ့ဖျ့ၭပၧၩႇ ပထိးထဲၩ့တၩ့ထဲၩ့ပၧၩ လၧဆၧနီၪလဖၪလီၫႉ