ၥၭၡါလဖၪဘိၪ့မုနံၩကိ ကဖျါခွံၬထဲၩ့ၦၥၭၡါလဖၪ အဆၧဒဲၩဘၭအဂဲး ဘၫတံၫကၫ့ဘိၭဘၪၥ့ၪယၫထၪ့

ၥၧၫ့ဘျၩ့လဘျၩ့ကလၩ့ဝ့ၫဒၪ ဖံၫဖူၫၥၭၡါလဖၪအဘိၪ့မုနံၩကိ ၦလၧအနုၬလၩ့ပၫဝ့ၫဒၪ ၦၥၭၡါလဖၪနီၪ က ဖ့ၪလၫ့ဘၪ ဆၧဒဲၩဘၭဆၧကွဲၪဖျါအဂး ကၫဒံၫနဲၫ Kevin Joseph Farrellနီၪ အၪ့ကံၩ့အၪ့ယၫထၪ့ဝ့ၫလီၫႉ ခးၥဲၫ ထၧၫ့ဘံၪ့ယၫ ဖံၫဖူၫၥၭၡါဘိၪ့မုနံၩနီၪ ၦၡၩကမၩဝ့ၫဒၪလၧ လၩယူၫလဲၫ့ ၂၃ၥၫ့ ၂၀၂၃နံၪ့နီၪလီၫႉ

ကနံၪ့ယီၩအဂး ဆၧထိထီၫနီၪမွဲဝ့ၫဒၪလၧ ‘His mercy is from age to age’ ကဆါယွၩအဆၧယၪ့ၥၭနီၪ မွဲအထုၬလအီၪဘၪဒဲ အီၪဝ့ၫဒၪအဆိၩအကၠၪကၠၪလီၫႉ ဆၧထိထီၫယီၩနီၪ အၪ့န့ထၬဝ့ၫဒၪ စလုကၫ ၁:၅၀ဖၧၩ့နီၪ လီၫႉ ၦလၧကမိဒိၭန့ ဆၧဒဲၩဘၭဆၧကွဲၪဖျါလဖၪနီၪ ကဘၪအီၪတဲၩဝဲၩ့အၥၭ ၁ႉ ကဘၪဒိၭန့ဆၧဒဲၩဘၭဆၧကွဲၪဖျါႇ ၂ႉ ကဘၪဒိၭန့အၪ့ကိၪဘိၪ့ဆံၫ့ဎံၫႇ ၃ႉ ၥၫ့ဎွၩဖရၫ့စံၭအဂး ကဘၪဘၩဆိၪဖၪ ကဆါယ့ၫၡူအဆၧဘၩဆိၪဖၪႇ မူၭခိၪအ ၥီၫ့ဆၧစံၭဂ့ၩဆၧဘၩဆိၪဖၪႇ လၧဖါ ဒဲဖိၪခွၫ ဒဲၥၭမုၪဆံၫ့ဎံၫ အမံၩ့နီၪလီၫ ဆၧဘၩဆိၪဖၪလဖၪယီၩနီၪလီၫႉ

အဝ့ၫၥံၪယီၩ မွဲလၧအဝ့ၫၥံၪ အဆၧမၪအဂး ကဘၪထိးဆၧစ့ၩရၫ့နီၪလီၫႉ လၧပမၧၫ့ဒံၭအခၫယီၩ ပဆၧမၪ လဖၪအဂး ပကဘၪလိၬကၪထဲၩ့ထၧၫ့အလူၬနီၪလီၫႉ အ့ၪမွဲပလလိၬကၪထဲၩ့ဘၪစွါဘဲၫ ပကဘၪဆုးထဲၩ့ လိၬကၫ လၧရၬမ့ၪဖၧၩ့နီၪလီၫႉ အဝ့ၫၥံၪယီၩထိးဆၧၫ့ဒိၭန့ဘၪ ဆၧဒဲၩဘၭဆၧကွဲၪဖျါယီၩဂီၩ့အခၫ ကကဲၪထၪ့ထဲၩ့ဘဲၫ ဒိၭန့ဆၧ ၥူၫဝၭဆံၫ့ဎံၫအခံၫ့အိၩနီၪလီၫႉ

လကၭဒံၭဘၪ ၦလၧအလ့ၩဂၬကွ့ၩစိၩလၧအဖံၫဖူၫအီၪႇ  ၦလၧ အလ့ၩဂၬကွ့ၩစိၩလၧၦၥၭၡါလဖၪအအီၪဂီၩ့ လ့ၩမၩဆၧၩ့ဝ့ၫလဖၪႇ  ၦလၧအလီၩ့မၩဆၧၩ့ ၦၥၭၡါလၧ အီၪလဆီၪ့ဘၪလဖၪႇ ဘၪဒၪဆၧၫ့ယၫဆၧကၪဆၧဂဲၩလဖၪႇ ဘၪထိးခွံၬၡိၬထၬအၥၭလဖၪႇ နးခီၫ့မိၡါလလၧၫ့ဎွ့ၩဘၪလဖၪနီၪဆ့ မွဲကဒိၭန့ထၪ့ဘၪ ဆၧလၩ့ဆၫ့အယီၩဆ့နီၪလီၫႉ မုကနံၩနီၪမွဲကရၩလၩ့ဘၪ မံဆၩဆၧလုထၪ့နီၪလၧ internet live ဖၧၩ့အကၠီၩ့ ၦၥၭၡါလၧ လ့ၩထၪ့ၥရိၬ လနၧၩ့လၧၩ့ ဘၪလဖၪဆ့ အီၪထိးဆၧၫ့ဒိၭန့ဝ့ၫလၧ အဂံၪ့အဎၫ့န့ႇ ဘၪထိးဝ့ၫဒၪဆၧဆၫလဖၪနီၪ လုထၪ့ဝ့ၫဒၪလၧမံဆၩဆၧလု ထၪ့ဖၧၩ့န့ဂီၩ့ ဒိၭန့ဆၧဆိၪဂ့ၩဆိၪဘွၩနီၪ ကန့ဆ့နီၪလီၫႉ

နးအဲၪဖီၫဘွၩ