ဂၫ့လၪ - ၂

ထၧၫ့ဖုဝဲမုၪခွၫၥံၪဧ့ နံၩလၧအမုၬနဲၪႉ မုကနွ့ၫယီၩ လၧချံၫ့မုၬၡူၪဘၩနဲၩ့ဎီၩ့အဎံၫလၩအဖၧၩ့ ယမိဆုးအၪ့နၩ့လီၩ့ဖ့ၪနဲၪအ့ၪဘၪနၥံၪ လၧအဖီၩ့ခွံၬမုနွံၫဒံၭဒၪအိၩ ယလီၩထၬဘၪ ဂၫ့လၪလဖၪ ဂ့ၩဒိၪလၧၦၡၩအဂံၪ့အခိၪအဒီၪ့အဂးဒဲ မွဲပခးပယၩ့အဆၧဆၧးဎံၫဆၧးလၩဒံၭ ဎွ့ၩယီၩလီၫဧၪ ကၭဒံၭအ့ၬႉ လၧဂၫ့အထံၭလီၩ့န့ဝ့ၫဒၪ ဂၫ့ၥၪနီၪ မွဲပအၪ့န့ဝ့ၫဒၪ ဆၧအၥၪကမံၩ့လီၫႉ ဆၧလၧဂၫ့ၥၪနီၪ မိမီၪ့ဎီၩ့ဒၪလၧ ထၫ့ၥၪ အဝ့ၫနီၪ ဆၧၫ့ဝ့ၫအရါၥၪအီၪဝ့ၫဒၪလီၫႉ ဆၧလၧဂၫ့နီၪ မွဲပဒိၭအီၩ့အထံၫန့ဆ့နီၪလီၫႉ ဘဲၫဂၫ့ထံၫကန့အဂး ဂၫ့လၪအထိဖီၫနီၪ ပကဘၪယဲအ့ၪကိၭနံၩႉ ဂၫ့ၥၪလဂဲၫၡါလၪ့ဒံၭဘၪနီၪ ဂၫ့လၪထိနီၪ ပကဘၪၥွၪထ့ၬလၧဎ့ၬဂီၩ့ ပကဘၪဒိၭထၬလၧ ဝၪဖီၩ့နီၪလီၫႉ ဂၫ့အထံၫလဖၪ ကဂဲၫထဲၩ့လၩ့လၧ ဝၪဖီၩ့ဖၧၩ့ ကဆံၭကဆံၭနီၪလီၫႉ ဆၧဂဲၫဖၩ့လၫ့ၥၫ့ ဂၫ့ထံၫအရါၥၪနီၪ ကဆၧၫ့ဝ့ၫဒၪ ဒိၪမၬလီၫႉ အ့ၪပကဒိၭလၧ       ဝၪဖီၩ့အလံၩမွဲဂ့ၩ ဆၧဂဲၫခိဆီၪ့လၫ့မွဲဂ့ၩ ဂၫ့ထံၫယီၩကဂဲၫခၪလၫ့နီၪလီၫႉ အ့ၪပအီၪစွါဘဲၫ ဆၧဆီၪ့ဆၧချဲၫ့ဂ့ၩလၧ ပဂိးဖိၫ့အဂးနီၪလီၫႉ အ့ၪမွဲမုမ့ၬဎဲလၩ့အခၫ ဂၫ့ထံၫယီၩ ဘဲၫကထိးယံၬအဂးဒဲ ကဒိၭနဲၩ့ၥၭလၧၥံၪ့ဎွံၪကန့အဂး ထံၭလၩ့ဝ့ၫလၧ ဖၧၩ့ဂိၫ့ဖၧၩ့ဂီၩ့ အၪ့ဂိၫ့ဒီၩ့ထၪ့ထဲၩ့ဝ့ၫလီၫႉ ဆၧအယီၩနီၪ တဝၫ့ဖိၪလဖၪကိၭဝ့ၫလၧ ဆၧအၪ့ဂိၫ့ထံၫဒဲ အၪဒၪဆၧ ၦၡၩကိၭယီၫဝ့ၫလၧ ဂၫ့ဂၭထံၫနီၪလီၫႉ ၦၡၩအၪ့ဂိၫ့ဒီၩ့ထၬဂီၩ့ ဂၫ့ထံၫယီၩ နၧၩ့မၧၫ့ဂီၩ့ အရါၥၪ ဆၧၫ့ခၫဝ့ၫဒၪလီၫႉ အ့ၪပအီၩ့နီၪ အ့ၪပအီၩ့နီၪ ပအၪ့မ့ၩအွံၪ ဘၪထွ့ၪလၧ ပဂိးဖိၪ့ဖၧၩ့ကဲၪထၪ့ဆၧဆၫလဖၪ ကလၩ့မၬဝ့ၫဒၪလီၫႉ ပအီၩ့ကိၭနံၩဒ့ၭစွါဘဲၫ ကဂ့ၩၥံၪ့ဎွံၪ အ့ၪမွဲအၪလၨၪနီၪ မငၭအ့ၬလၥၨၩနဲၪႉ ဂၫ့လၪကထံၭနီၪ ကဘၪခွံၬၡိၬဆိၫ့ဂီၩ့ အလးအီၪနးပၫအ့ၬနီၪလီၫႉ ပၥိၩ့ထၪ့လၧ ၥံၪ့ဎွံၪအဂးန့အၥိၭ ပၥိၩ့လၧ ဂံၪ့ဆၧပိၭဆၧလၫ့အဂးမွဲန့ဆ့ဒံၭနီၪလီၫႉ

ဂၫအ့လၪနီၪ မွဲဂ့ၩၥံၪ့ဎွံၪဆ့နီၪလီၫႉ ဂၫ့အလၫ့အဘၪ့လဖၪနီၪ ပဘီၪ့လၫ့ဂီၩ့ ပအၪ့ဎွံလၪလၧထံၫ ၥၧၫ့ခွၭကခွၭစွါဘဲၫ ပ့ၫလဲၫအူၪနၫ ကဘျၪနီၪလီၫႉ ဂၫ့အလၪအၡါနီၪ ပဎုလၪ့လၧမ့ၪဂီၩ့ ကဲၪထၪ့ဖံၬချၪအမူၭနီၪ အ့ၪပဂူၪလၩ့ဎုၬလၧ ဖျီၩ့ၥၪၥိၪစွါဘဲၫ ခီၫႇ ၡီၫ့ႇ ၥၭဝ့ၫဒၪဆၧဆၫၥံၪလဖၪ ကဘျၪထဲၩ့ဝ့ၫဒၪလီၫႉ

ထံၫဂဲၫထၪ့အကၠီၩ့ ၡါမ့ၬပၫလဖၪ ဂၭဂီၩ့ႇ ဘၪထဲးဘၪဎဲးၦၡၩအဂံၪ့ဒဲ ၦၡၩၥုၪ့လၩ့ထၬဆၧမုဆၧဘီၩ့လဖၪ ပဒၩ့ထၬဝ့ၫကန့အဂး ဒံၫယ့ၫတီၩဒဲ ဂၫ့လၪလဖၪ အလးအီၪလၧ ပကဘၪဖီၪ့ဂုးယိထွ့ၫထၬနီၪလီၫႉ အဝ့ၫၥံၪနီၪ မွဲပဒၩ့ထၬနဲၩ့ဎီၩ့အဆၧလၩ့အၪ့ယိၫန့အကၠီၩ့နီၪလီၫႉ