ဘိၪ့လ့ၩဖၭအဆၧၫ့အထီ မုအီၪပွံၭနံၩ(၆)

လၧလံၬဆံၫ့ဎံၪဆၧၥၭထိၬပရၧၫ့ကနံၩယီၩအဖၧၩ့ႇ ပနါဂၧၫ့ဘၪ ယ့ၫၡုၬအဆၧချဲၩ့မၪလူၬထွ့ၫလဖၪႇ ဘၪထွ့ၫလၧ ဆၧထီးန့ဖံၭထၬ ဆၧမၪလူၬအဂဲး ဒဲ ၦလၧအမၩမုၬဆၧႇ ၥၭမုၪဆံၫ့ဎံၪယွၩအဂဲးနီၪလီၫႉ 
ယ့ၫၡုၬစံၭဝ့ၫႇ 
နၥံၪအ့ၪအဲၪယၧၩတၭႇ ထီးန့ဖံၭထၬ ယဆၧမၪလူၬလဖၪနီၪဆံၭႉ
ၦလၧအအီၪလၧယဆၧမၪလူၬလဖၪႇ ဒဲထီးန့ဖံၭထၬဝ့ၫနီၪႇ မွဲၦလၧအအဲၪယၧၩႇ ဒဲၦလၧအအဲၪယၧၩနီၪႇ ယဖါမိအဲၪအဝ့ၫတၭႇ ယဝ့ၫဒၪယီၩ ယမိအဲၪဝ့ၫဆ့ႇ ယမိဒုၭနဲၪယၥၭ လၧအဝ့ၫနီၪဆ့လီၫႉ 
အဲၪကွံၩဘၪ ထၧၫ့ဖုဝဲမုၪခွၫၥံၪႇ ပဝ့ၫဒၪ ထံၫဖိၪခးဖိၪၥံၪအဂး ထံၫခးအနိၫ့လဖၪ ဘၪဆၧထုၭထၪ့ထၬဝ့ၫလီၫႉ ၦၡၩထီးလူၬႇ ဆၧဘိၪ့ဆၧဘၩဖိၪၥံၪထီးလူၬအဂးဆ့ႇ ကဆါယွၩဖ့ၪလၫ့ထၬ ဆၧမၪလူၬလဖၪနီၪလီၫႉ 
ထံၫၥံၪခးၥံၪအၥနိၫ့ႇ ဒဲ ယွၩဆၧမၪလူၬလဖၪနီၪ ကမၩကၪမၩဂဲၩႇ ကမၩထံၭထၬႇ ဒဲကမၩၡၪ့မၩနၭၦၡၩအဂးမွဲအ့ၬႉ 
လါနၫ့ဂ့ၩ ဘဲၫၥိၭၦၡၩၥံၪ ကဂၩဒဲကဂၩႇ ဆၨၩကဆၨၩဒဲကဆၨၩႇ  ကအီၪဆၧဘၪလိၬအိၭလိၬႇ ဆၧဘၪလိၬဎွ့ၩဎီၩ့ကၥ့ၪအဂး ထံၫခးခိၪနါၥံၪထုၭထၪ့ ၥနိၫ့လဖၪလီၫႉ ၦလၧအလၨၪခၪ့ဖၭ ၥနိၪ့လဖၪနီၪ ဘၪထိးဆၧစ့ၩရၫ့လီၫႉ 
ယွၩတဲၩ့လၩ့ထၬၦၡၩႇ ဖ့ၪလၫ့အဝ့ၫ ဆၧၥ့ၪယၫနၪၥ့ၪ ဒဲကၪ့ၡၧၫ့ ဘဲၫၥိၭ ၦၡၩၥံၪကၥ့ၪယၫ အဲၪကွံၩယူၭယၪ့လိၬၥၭႇ ပအီၪၥၭမၧၫ့ကၠၧၫ့ကၠၧၫ့ ဆၧတီၩဆၧလီၩႇ ဆၧဘၪလိၬဎွ့ၩဎီၩ့ လၧဆၧစီၪ့ဒီၩ့ဘၪလိၬၥၭအဖၧၩ့ႇ ဒဲဘဲၫၥိၭ ၦၡၩကအဲၪဒိၭ ဆၧလ့ၩထၪ့လ့ၩထီၫႇ ဆၧဎံၪဆၧလၩႇ ဒဲဆၧဂ့ၩဆၧဘွၩလဖၪနီၪလီၫႉ 
ပဝ့ၫၥံၪ ထံၫဖိၪခးဖိၪလဖၪယီၩ ပအၪဒၪဆၧႇ ပၥၭမဲၪပကဘၪထိးစ့ၩရၫ့အကၠီၩ့ႇ ပကဘၪလၩ့ လၧထီၫ့ဖၧၩ့အကၠီၩ့ႇ ပကဘၪထိးဆၧမၩလိၬပၧၩအကၠီၩ့  ပလီၩ့ဖိၬ ပထံၫပခးအၥနိၫ့လဖၪနီၪလီၫႉ အၡါမၬနီၪႇ ၦလၧအၥ့ၪယၫနၪၥ့ၪအီၪကိၭဂၩဒ့ၭနီၪ ကဘၪၥ့ၪယၫလီၩ့ဖိၬ ထံၫခးၥနိၫ့လၧဖၪ လၧဆၧအဲၪကွံၩယူၭယၪ့ဒိၪဒိၪလ့ၬအဖၧၩ့လီၫႉ 
ကဆါယ့ၫၡူၬအဆၧမၪလူၬနီၪ မွဲဝ့ၫဒၪ ဆၧအဲၪဆၧကွံၩဆၧမၪလူၬလီၫႉ အဝ့ၫမၬလူၬထၬအထံၩအဖျဲ ႇ ဘဲၫယအဲၪနၥံၪအၥိၭနီၪ အဲၪလိၬကွံၩလိၬနၥံၪအၥၭဘဲၫနီၪၥိၭဆံၭႉ နၥံၪအ့ၪထီးန့ဖံၭထၬ ပဆၧမၪလူၬႇ ယလူယထၫနီၪ နၥံၪမွဲယထံၩယဖျဲလၩ့ထံးလၩ့ဆ့ၭလီၫႉ 
စယီဟၫ့စံၭထၬဝ့ၫႇ ယွၩနီၪမွဲဝ့ၫဆၧအဲၪဆၧကွံၩလီၫႉ ယွၩအဆၧမၪလူၬနီၪ မွဲဝ့ၫဆၧအဲၪဆၧကွံၩဆၧမၪလူၬလီၫႉ 
ၦလၧအဆၧအဲၪဆၧကွံၩအီၪႇ ၦလၧအအဲၪကွံၩၦဂူၫဂၩလၩ့ထံးလၩ့ဆ့ၭကဂၩနီၪ လၩ့ဂၬလၧယွၩအနၫ့ဆါဒၪဝ့ၫတၭႇ မွဲဝ့ၫယွၩအဖိၪမုၪႇဖိၪခွၫလၩ့ထံးလၩ့ဆ့ၭလီၫႉ 
ကယဲၦမၩဆၧလဖၪႇ ပလီၩ့ဖိၬယွၩအဆၧမၪလူၬႇ ပဘိၪ့ထၪ့ဘၩထၪ့ယွၩႇ ပလီၩ့ဖိၬထွ့ၫပထံၫပခးအၥနိၫ့ႇ လၧ ဆၧၥၭမဲၪယွၩႇ ရၭ့မ့ၪအၧၩ့ႇ ဆၧစ့ၩရၫ့အကၠီၩ့တၭႇ ပကြၨၭမၩအ့ၬႉ ကဘၪမွဲဝ့ၫလၧဆၧအဲၪဆၧကွံၩအကၠီၩ့လီၫႉ ယွၩယၫ့ၥၭအဲၪကွံၩပၧၩအကၠီၩ့ႇ ပကဘၪအဲၪကွံၩဆၧၫ့ထဲၩ့ယွၩ လၧဆၧခိၭနၪအဝ့ၫအလူႇ လၧဆၧထီးန့ဖံၭထၬအဆၧမၪလူၬလဖၪနီၪလီၫႉ 
ကဆါယွၩအဆၧမၪလူၬအဒိၪထုၬစံၭထၬဝ့ၫႇ အဲၪယွၩနကဆါလၧနၥၭထၧၫ့ဖျိၪ့ယၫ ဒဲ လၧနၥၭၡီၩ့ထီးလူၬႇ ဒဲလၧနၥၭကိၪ့ၥ့ၪထီးလူၬဆံၭႉ အဲၪၦလၧနနဲၩ့ထံၭ ဘဲၫနနၫ့ဆါဒၪနဝ့ၫအၥိၭနီၪဆံၭႉ(မၭၥုၫ ၂၂:၃၇-၃၈) 
ကဆါယွၩအဆၧမၪလူၬနီၪ မွဲပကန့ဘၪအခိးအတၩအဂးလီၫႉ