ဂၪ့ခိၪချိၫ့ဂဲၫခိထၪ့အဂး ဆၧကြၨၭမၩထၪ့လဖၪ (၂)

လယၭစ့ၭပစံၩလဖၪ ကၠူၭစဲၪ့လၫ့ထၬ ပလၭ နီၪဆံၭႉ

လၧနၥိၩ့ဒံၭဘၪ ကိၫပျူၪတၫႇ တံၫဘံၫႇ အီၭစဲၭလဖၪ နဘံၭထၪ့စိၩ ရမုဂီၩ့ နဝဲထၪ့န့လီၫႉ နဆ့ၭထၪ့ထၬ ပလၭဘဲၫယီၩၥိၭနီၪ အီၪဘၪဝ့ၫဒၪအၪမၬဒဲ နမံၬထၪ့စိၩ ရမု နဘၪဂၬထုၪ့လၪ့လၧ နလးလလိၫဘၪလါနၫ့ဂ့ၩ နဆ့ၭထၪ့ထၬ ပလၭ ဘဲၫယီၩၥိၭနီၪ နၥိၪ့ထၪ့ထၭစီၩ့ဂဲးအကၠီၩ့ ထုၪ့နၥၭဆံၭႉ န လယၭစ့ၭပစံၩလဖၪနီၪ လၧနၥိၩ့ထၪ့ဒံၭဘၪအခၫ ဖၭဘံၭထၬခလုၭဂီၩ့ ကၠုၭဘုၭလၫ့ထၬ ပလၭနီၪဆံၭႉ

လခံၫကထုၪ့နီၪ ၥိၩ့ထၪ့ဘၪ ပလၭစတ့ၭ ထိၫ့ကစ့ၩ

ပလ့ၩလၧ ဖၠၪဖၧၩ့အခၫ ပလၭစတ့ၭထိၪ့လဖၪ ဂဲၫထဲၩ့ပၫအၪ ၥ့ၪဝ့ၫဒၪလီၫႉ ကနံၪ့နီၪ ၦၡၩၥိၩ့ထၪ့ ပလၭစတ့ၭ ဘံၫလံယၫ့ ၅၀၀ဒဲ ကထရံၫလံယၫ့အဖၧၩ့လီၫႉ ဆၧအယီၩ မွဲဆၧအမုၬအ့ၬႉ ထံၫကၠီၪ့လဖၪ ဆွံၫဘံၭထၬႇ ဆၧဖိၪဆၧဎါလဖၪ ဘၪၥံၫဂီၩ့ၥံၫစၪ ဆၧလၧပလၭစတ့ၭယီၩ ထုၭထၪ့ဝ့ၫဒၪအထီနးဆ့ ထံၫအထုၪ့ လံၩအထုၪ့ ဘၪၥလိၪၥလံၬထၪ့ဝ့ၫဒၪလီၫႉ

ၥိၩ့ထၪ့ဒၪ ပခွၭယခွၭဆံၭႉ

အထီဘဲၫယီၩ ဆၧၥိၩ့ထၪ့ကကၠၪ ခွၭလဖၪ အၪ့ထၪ့ဝ့ၫဒၪလီၫႉ ပၥိၩ့ထၪ့န့ကကၠၪလီၫ တူၫလဖၪနးဆ့ အီၪဝ့ၫအၪမၬလီၫႉ အၪဒၪဆၧ ဆၧဆၫလနၩ့နၩ့ ဘၪဎၬန့ဝ့ၫဒၪလၧ ပအီၩထံၫခွၭလဖၪလီၫႉ အ့ၪပလ့ၩဆၧအခၫ ပၥိၩ့ထၪ့ဒၪ ပတူၫ ပထံၫခွၭၥံၪနီၪအမငါထုၬလီၫႉ မီၪဎီၩ့ ပဒုၭမၧၫ့ထၪ့ထၬ ဝၪအထံၭလဖၪဆ့ဒံၭနီၪလီၫႉ  ဝၪအထံၭလဖၪနီၪ စွံၭထၪ့ ကၫဘိၫဒဲၫ့အီၭစဲၭအန့ထုၬ ဆၧအထံၭလဖၪနီၪလီၫႉ

ၥုၪ့ထၪ့ဆၧအထံၭဆံၭႉ

ဆၧလၧဆၧအထံၭလဖၪနီၪ စွံၭထၪ့ ကၫဘိၫဒဲၫ့အီၭစဲၭဒဲ ထုၬထၪ့ထဲၩ့ အီၫ့စ့ၫဂၠဲၫနီၪလီၫႉ အထံၭကထံၭနီၪ ထုၬထၪ့ အီၭစံၫဂၠ့ၫန့ဝ့ၫဒၪ ၦၡၩနံၫဂၩအဂး လၧၫ့လၧၫ့ဎွ့ၩဎွ့ၩနီၪလီၫႉ ဆၧလၧဆၧအထံၭနီၪ မွဲဆၧဖိၪဆၧဎါလဖၪ အဂံၪ့ဒဲ ၦၡၩၥံၪအဂံၪ့အဂး ဖ့ၪလၫ့ဝ့ၫ ၥံၪ့ဒံၭနီၪလီၫႉ

ဂၪ့ခိၪချိၫ့ဂဲၫခိထၪ့နီၪ ပကပဒၩ့ထၬအဂးနီၪ မွဲၦမူၩဒၩကိၭဂၩလီၫမွဲအ့ၬဧၪႉ