နှင်းဆီကုန်းလးဝၩ့ဖၧၩ့ ဆၧဝဲထၪ့ၥရိၬႇ မိမၫရံၫလဲၫ့အိၩဒဲ St.Joseph ရိးကၠဲၭအဂဲး

၂၀၂၂နံၪ့လၩဇၫ့နွ့ၫရံၫ၃၀ၥၫ့နီၪ ဆၧဆိၪဂ့ၩဆိၪဘွၩ ဖိၪၥၪယ့ၫရူၬအီၪဖျဲၪထၪ့ၥရိၬႇ မိမၫရံၫအလိးအိၩ ႇ St.Joseph ရိးကၠဲၭဒဲ ဖိၪၥၪယ့ၫၡူၬအဂံၪ့ ဆၧထံၪလၩ့ဒီၪလၩ့အီၪဝ့ၫဒၪလၧ ဒိၩ့ပၥံၫ့ဆၧအီၪကီၪ့ နှင်းဆီကုန်းလးဝၩ့ ၥၫ့ခၫၥၭၡါလဖၪ အီၪဒုၩၥၭလးဖၧၩ့နီၪလီၫႉ
ၦလၧအလ့ၩခိၪလ့ၩနါမံဆၩဆၧလုထၪ့ယီၩနီၪ မွဲလၧပြည်ဆၧအီၪကီၪ့ Bp.Alexander Pyone Choနီၪလီၫႉ လၧမံဆၩဆၧလုထၪ့အဖၧၩ့ ၥၫ့ခိၪဒိၪလီၩလၩ့လၬလၩ့ဝ့ၫဒၪနီၪ “ၥၫ့ဎွၩဖရၫ့စံစံၭဝ့ၫဒၪ ၥၫ့မုၥၫ့ခၫၥံၪ ပလီၩလၩ့ဆၧၥၭ ထိၬပရၧၫ့အခၫ ပလီၩလၩ့ဘၪယံၭယံၭအ့ၬ ပကဘၪကွ့ၭလၩ့ထၬဂ့ၩဂ့ၩဘၪဘၪဂီၩ့ ပကဘၪလီၩလၩ့လၬလၩ့ဖိၭဘိၭ ၁၀မံန့နီၪလီၫႉ ပတဲၩဝဲၩ့ထၬပၥၭနးမံၩ့အ့ၬဂီၩ့ အ့ၪမွဲပကလီၩလၩ့လၬလၩ့ဆၧနီၪ မီၪ့ဎီၩ့ပမၩဂၭဂီၩ့ ၦဆူနဲၩဖိၪလဖၪ နီၪလီၫႉ ကဂၫယီၩယမိလီၩဘၪနီၪ ယစံၭခိးစံၭတၩဘၪနၥံၪကိၭဂၩ မွဲလၧယဂဲၫမၩလၩမၩဖၩ့ဘၪဘိၪ့ယီၩ လၧနၥံၪ ကၠၧၫ့ကၠၧၫ့အကၠီၩ့နီၪလီၫႉ လၧဆၧအလးယီၩ ၥရိၬအီၪထၪ့ဝ့ၫဒၪႇ မိမၫရံၫအလိးအိၩအီၪထၪ့ဝ့ၫဒၪႇ St.Joseph ရိးကၠဲၭဒဲ ဖိၪၥၪယ့ၫၡူၬအဂံၪ့အီၪထၪ့ဝၫ့ဒၪနီၪ မွဲလၧဆၧအလးယီၩအဆၧနဲၪ့ကမံၩ့နီၪလီၫႉ ဆၧနဲၪ့လဖၪယီၩမွဲလၧ ဖ့ၪနဲၪ ဆၧအလးယီၩ ယွၩအီၪဝ့ၫဒၪနီၪလီၫႉ ၦလၧအဂဲၫထီၩ့စိၩလၧဆၧအလးယီၩလဖၪနီၪ မွဲဝ့ၫဒၪ ဒိၭန့ဘၪယွၩဒဲ ဘိၪ့ဆံၫ့ဎံၪစကရမဲတူၩ အဆၧဆိၪဂ့ၩဆိၪဘွၩလဖၪနီၪလီၫႉ ခိၭနၪဘၪဆၧၥၭထိၬပရၧၫ့ဂီၩ့ အၪ့ဎၬလၩ့ထဲၩ့ နၥံၪအၥၭန့ဒၪဝ့ၫကိၭဂၩဆံၭႉ ပကဂဲၫလၧၥရိၬယီၩဂီၩ့ အ့ၪမွဲပကဂဲၫထၪ့မံဆၩဆၧလုထၪ့ႇ ပကဂဲၫဒိၭန့အၪ့ ကိၪဘိၪ့ဆံၫ့ဎံၪႇ ပကဂဲၫခိၭနၪ ယွၩအဆၧၥၭထိၬပရၧၫ့စွါဘဲၫ ဆၧအယီၩမွဲကန့ပဂဲးဘၭနီၪလီၫႉ ဆၧအလးယီၩ ဘဲၫၥိၭၥရိၬ ကအီၪထၪ့အဂး အၥံၫဖီၩ့ခွံၬဒၪပၧၩ ၥၫ့ခိၪဒိၪ Bp.John Mahn Hsane Hgyi ဆ့ မွဲအဆၧယိလါ ကအီၪထၬဝ့ၫႇ ဂီၩ့နီၪ ၦလၧကမၩဖျီၪထၪ့ ဆၧယိလါလဖၪ ၥၫ့မုၥၫ့ခၫမွဲကအီၪ ဆၧနီၪအကၠီၩ့ ဆၧအလးယီၩ ၥရိၬဒဲ မိမၫရံၫအလိးအိၩ ဆၧလဖၪယီၩ ဂဲၫအီၪထၪ့ဝ့ၫဒၪနီၪလီၫႉ ကဆါယွၩအဆၧဖံၭဆၧမၩလဖၪနီၪ လၩ့ဆၫ့လၩ့မဲၩဝ့ၫ ဒၪအၪမၬနီၪလီၫႉ အဝ့ၫယီၩမၩဖျီၪထၪ့အ့ၪပၧၩ ပဆၧထိစိၩလဖၪ ပဆၧယိလါလဖၪနီၪလီၫႉ ဆၧနီၪအကၠီၩ့ လၧမံဆၩ ဆၧလုထၪ့အဖၧၩ့ယီၩ မွဲပကစံၭခိးစံၭတၩထဲၩ့ယွၩဂီၩ့ လခဲၫ့ခီၫဘဲၫပဂဲၫဘိၪ့ထၪ့ဘၩထၪ့ယွၩ ကထီၩ့စိၩလၧယီၩအ ဂးနီၪ မွဲပကကျ့ၭစၨၭကၠၭ ကိၭဒံၩကိၭဂၩလါဆံၭႉ”
ဂီၩ့နီၪ မူၩဒၩအီၪ ဘၪယိထွ့ၪ ၥၫ့မုၥၫ့ခၫအအီၪပွံၭလဖၪဒဲ နှင်းဆီကုန်းလးဝၩ့ ၦလၧအမူၩဒၩအီၪဝ့ၫဒၪ Fr.Piusမၩ့ၥၭဎွံၪနီၪ စံၭဝ့ၫဒၪ “ယစံၭခိးစံၭတၩဘၪ ၦလၧအဂဲၫဖ့ၪဂဲးဖ့ၪဘၭပၧၩ ပြည်ဆၧအီၪကီၪ့ၥၫ့ခိၪဒိၪ Bp. Alexander Pyone Choနီၪလီၫႉ ဆၧလဖၪယီၩ ဂဲၫကဲၪထၪ့နီၪ မွဲဒၪလၧကဆါယွၩ အစီၩ့အမၩ့နီၪ ယနဲၩဝ့ၫဒၪဒဲ ယစံၭခိးစံၭတၩဘၪကဆါယွၩနီၪလီၫႉ ဆၧအလးယီၩနီၪ မွဲလၧပၥၫ့မုၥၫ့ခၫၥံၪ ဂဲၫအီၪပွံၭအလးလါနၫ့ ပနးၥၭအဂး ဆ့ မွဲလိၪဝ့ၫဒၪဒံၭဆ့ႉ လၧဆၧအလးယီၩအဖၧၩ့ ၥရိၬဂဲၫအီၪထၪ့ကဖျိၪ့အကၠီၩ့ ၦအအီၪလၧလးဝၩ့ယီၩအဖၧၩ့ ၥၫ့မုၥၫ့ခၫလဖၪႇ မံၭထၭမုၪလဖၪဒဲ ၦဆူၩနဲၩဖိၪၥံၪလဖၪ အနးၥၭအဂး မွဲအခိးအတၩကအီၪဝ့ၫဒၪ အၪမၬနီၪ ယထိးဆၧၫ့လီၫႉ ဆၧနီၪအကၠီၩ့ ဘဲၫဆၧလဖၪယီၩကကဲၪထၪ့အဂး ၦလၧအဂဲၫမၩဘိၪ့မၩဆၧၩ့ဝ့ၫဒၪကိၭဂၩနီၪ ယစံၭခိးစံၭတၩဘၪနီၪလီၫႉ”
ၦလၧအမၩဘိၪ့ St.Joseph အဂံၪ့နီၪ မွဲဝ့ၫဒၪလၧ ဦးပေါလူး, ဒေါ်ထရေဇား, ဒဲ ဒေါ်ယဉ်ဌေး, ၦလၧအမၩဘိၪ့ ဖိၪၥၪယ့ၫရူၬအီၪဖျဲၪထၪ့ၥရိၬယီၩနီၪ မွဲဝ့ၫဒၪ မစ္စတာမောရစ် ဒဲ ဂျူးစတီးနား ဒေါ်ခင်မြင့်, ဒေါ်မေရီလင်း, နန့်အထွေး, ခရစ္စတီးနားဒေါ်လှစိန်, ဆရာမခရစ္စတီးနား, ဒဲ ၦဂူၫဂၩလဖၪႇ ၦလၧအမၩဘိၪ့ မိမၫရံၫအလိးအိၩယီၩနီၪ မွဲဝ့ၫဒၪအီၪလၧဝံးတခိၩ့ ကိုဂျေရပ်, မာရီခရစ္စတင်း, နီကောလား, မာတီးနိုၥံၪ အထၧၫ့ဖုဝဲလဖၪနီၪလီၫႉ
မံဆၩဆၧလုထၪ့ဂီၩ့ဝ့ၫဒၪအခၫနီၪ ဖ့ၪလၫ့ဘၪၦအမၩဘိၪ့ထၬဆၧလဖၪ စံၭခိးစံၭတၩထဲၩ့ဆၧနဲၪခိၪဖၭ လဖၪ နီၪဒဲ ဘုၪ့လၩ့ဘၪ ၦအဂဲၫမၩလၩမၩဖၩ့ဆၧလဖၪ လၧမ့ၩအွံၪၥၧၫ့ဆၧၫ့လဖၪနီၪလီၫႉ ဆၧဆိၪဂ့ၩဆိၪဘွၩၥရိၬမံဆၩဆၧ လုထၪ့ယီၩနီၪ စၭထၪ့ဝ့ၫဒၪ အဂၫလၩ့၅နၩရံၫဒဲ ဂီၩ့ခွံၬဝ့ၫဒၪလၧ အဂၫလၩ့၇နၩရံၫခီၫအခံၫ့နီၪလီၫႉ
နးအဲၪဖီၫဘွၩ