ယိၩယိၩနံၪ့အထးဖၧၩ့ႇ မုနွ့ၫ(၂၃)

ကဆါယွၩနီၪ မွဲဆၧအဲၪဆၧကွံၩကဆါယွၩလီၫႉ အဝ့ၫစံၭထၭဝ့ၫႇ ဘဲၫယအဲၪနၥံၪအၥိၭနီၪႇ အဲၪလိၬကွံၩလိၬနၥံၪအၥၭဘဲၫနီၪၥိၭဆံၭႉ အဲၪနၥံၪအဒုၪအဒၩဆံၭႉ လါနၫ့ဂ့ၩႇ လၧဆၧၥၭထိပရၧၫ့ကနံၩယီၩအဖၧၩ့ႇ ယ့ၫၡူၬစံၭဝ့ၫႇ ၦၡၩကဂၩဂၩ အ့ၪလၥၭဂဲၫ့ဘၪ အမိအဖါႇ အထၧၫ့ဖုထၧၫ့ဝဲႇ အဖိၪအမၫႇ အဖိၪအလံၩ ဒဲအနၫ့ဆါအၥၭမၧၫ့ဒၪလ့ၬတၭႇ ကဲၪထၪ့အဝ့ၫအထံၩအဖျဲၥ့ၪအ့ၬႉ

ယ့ၫၡူၬနီၪ မုလါဝ့ၫ ပမ့ၬလဲၩၥၭဂဲၫ့လိၬၥၭဧၪႉ

အခီၫပယီၫႇ ဆၧမၪလူၬအခၪ့ထံၭႇ အဒိၪထုၬနီၪႇ မွဲဆၧအဲၪကွံၩယွၩႇ နံၫထံၪလထံၪနီၪ ဆၧအဲၪကွံၩလိၬႇ ၦအီၪလပနဲၩ့ထံၭလီၫႉ

ယွၩနီၪ တဲၩ့လၩ့ထၬ ပနးခီၫ့နးၥၭႇ ဖ့ၪလၫ့ထၬပၧၩႇ ဆၧၥၭမၧၫ့ႇ ပမိပဖါႇ ထၧၫ့ဖုဝဲႇ ထံၩၥိၭႇ စူၪလးခၪ့ခိၪၥ့ၪလီၫႉ ဆၧနီၪအကၠီၩ့ ယွၩနီၪ ပကဘၪအီၪက့ၪဒိၪဝ့ၫ လၧကိၭမံၭဒ့ၭအမ့ၬယၫႇ အဖၫ့ခိၪလီၫႉ ဆၧအကၧၩ့ဒိၪနဲၪ့ယွၩနီၪ ဆၧအီၪနးမံၩ့အ့ၬႉ ဆၧလၧယွၩတဲၩ့လၩ့ထၬဝ့ၫလဖၪနီၪ ပကဘၪအီၪက့ၪဒိၪႇ ယူၭယၪ့လါနၫ့ဂ့ၩႇ အ့ၪပအီၪက့ၪဒိၪ ဆၧအဂူၫဂၩႇ မိဖါႇ ထၧၫ့ဖုဝဲႇ ဖိၪမၫႇ ဖိၪလံၩႇ ဆၧဖံၭဆၧမၩႇ ကျိၪစ့ၩ အၪနဲၪ့ဒံၭပအီၪက့ၪဒိၪယွၩစွါဘိၩႇ ပကဲၪထၪ့အထံၩအဖျဲန့အ့ၬႉ ပထီၩ့လၧဆၧထိးထဲၩ့တၩ့ထဲၩ့အလးၥ့ၪအ့ၬႉ

mt 10, 37-38

ၦလၧအအဲၪအမိဂ့ၩအဖါဂ့ၩ အၪနဲၪ့အအဲၪယၧၩယီၩ ကြၨၭလၧယၧၩအ့ၬႉ ၦလၧအအဲၪအဖိၪမုၪဂ့ၩဖိၪခွၫဂ့ၩ အၪနဲၪ့အအဲၪယၧၩယီၩ ကြၨၭလၧယၧၩအ့ၬႉ ၦလၧအမၩန့ဘၪအထုၪ့စူၪယၫဒဲအလၧဖိၬဘၪယခဲၫ့နီၪႉ ကြၨၭလၧယၧၭအ့ၬႉ

အဲၪကွံၩဘၪထၧၫ့ဖုဝဲၥံၪဧ့ႇ

ပကထီၩ့လၧဆၧထိးထဲၩ့တၩ့ထဲၩ့ႇ လၧမူၭခိၪအဘၩ့အမုးဖၧၩ့အဂး ပအီၪၥၭမၧၫ့လဂၪ့ခိၪချိၪ့ယီၩအထီ ပကဘၪကဲၪထၪ့ ဆါယ့ၫၡူၬအထံၩအဖျဲလဖၪလီၫႉ အ့ၪပယိလၧလံၬဆံၫ့ဎံၪစွါဘိၩႇ ပကၥ့ၪယၫဘၪဆါယွၩအထံၫအဖျဲအလၩ့ထံးလၩ့ဆ့ၭလဖၪအဂဲးလီၫႉ

ၦလဂၩဂၩ ကကဲၪထၪ့ယ့ၫၡူၬအထံၩအဖျဲႇ အဆၧအၪ့မၧၫ့ဖိၪၥ့ၪအဂး အဝ့ၫဘၪစဲၪဒၪခွံၬ အဂံၪ့အဎၪ့ႇ အဖိအဖါႇ အထၧၫ့ဖုထၧၫ့ဝဲႇ ဒဲအဆၧဖံၭဆၧမၩ ဒဲအစူၪလးခၪ့ခိၪလဖၪလီၫႉ

အ့ၪပဆီၫ့မီၪ့ထၪ့ကၭၥလံၬဆၧအီၪကီၪ့အဖးဖီၩ့တၭႇ ပကဒၪဘၪ စၭထၪ့လၧယ့ၫၡူၬအဆၧအၪ့မၧၫ့ဖိၪႇ ဒဲအထံၩအဖျဲၥံၪႇ ကဆၫ့ဘၪ့ကဆၫ့ႇ ထီၩ့လၧမုၪဆၫကနံၩယီၩႇ ၦလၧအဖ့ၪလၫ့လၩ့ၥၭႇ ၦလၧအဖိၬယ့ၫၡူၬအခဲၫ့လဖၪနီၪ ဘၪစဲၪဒၪခွံၬအဂံၪ့အဎၪ့ႇ မိဖါႇထၧၫ့ဖုဝဲႇ ထံၩၥိၭႇ အဆၧဖံၭဆၧမၩႇ အထံၫအခးတၭႇ လ့ၩလီၩ့လၩ့လၬလၩ့ကဆါယွၩအဆၧထိၬပရၧၫ့ လၧထံၫယဲၩခးယဲၩလီၫႉ

ဆၧလၧယွၩတဲၩ့လၩ့ထၭဆၧလဖၪနီၪႇ ဆၧအကၧၩ့ဒိၪထုၬႇ ဆၧအလူဒိၪဎွ့ၩထုၬနီၪ မွဲၦၡၩႇၦၡၩအနးၥၭလီၫႉ ၦလၧအဖ့ၪလၫ့ပနးၥၭႇ ပနးခီၫ့အဆၧၥၭမၧၫ့ႇ ဆၧထိးထဲၩ့တၩ့ထဲၩ့လၧဆၧၥံၫန့နီၪ အီၪဒၪယွၩလဂၩဎးလီၫႉ

အ့ၪပမိယိၬဘၪထုၪ့စူၪယၫနီၪ ပဖိၬယ့ၫၡူၬအခဲၫ့ၥ့ၪအ့ၬႉ ပကဲၪထၪ့ယ့ၫၡူၬအထံၩအဖျဲဘူၫဘူၫယီၫယီၫန့အ့ၬႉ ဆၧလၧအမၩ့ထံၭထၭ ပဆၧဖိၬယ့ၫၡူၬအခဲၫ့ကိၭမံၩ့နီၪ ပကဘၪထုၪ့ၥုၪ့ထုၪ့ၥၭလီၫႉ

ဆၧၥၭထၪ့ထီၫႇ ၥုၪ့လတီၩၥၭလီၩ့ဘၪလဖၪႇ ဆၧၥၭကွံၩစူၪလးခၪ့ခိၪႇ ဂၪ့ခိၪအဆၧမုၬဆၧလၩလဖၪ မၩထံၭထၭပၧၩၥ့ၪအကၠီၩ့ႇ ပကဘၪကျ့ၭစၨၭခွံၬၡိၭဆၧလဖၪနီၪလီၫႉ