ယိၩယိၩနံၪ့အထးဖၧၩ့ႇ မုအီၪပွံၭနံၩႇ မုနွ့ၫ(၁၅)

ကဲၭၥလံၬဆၧအီၪကီၪ့ၦကိၪၥ့ၪOrigen မၩထၪ့ဖျီၪ့အ့ၪပၧၩဆၧချဲၩ့ဒီၩ့ယီၩ အခီၫပယီၫလီၫႉ

ကဆါယွၩတဲၩ့လၩ့ထၬၦၡၩဒုၭအီၪလၧပၫရၫဒဲၭႇ အံဒံၫ့ကျိၭအဖၧၩ့ႇ အီၪလၧဆၧလၧၫ့ဆၧဎွ့ၩႇ ဆၧမုၬဆၧၡူၪအလးလါနၫ့ စၭထၪ့ခီၫလၧၦၡၩခိၭနၪမုၪခီၩလဲးအဆၧကျဲၩ့ဖစီၩ့ႇ လၩ့ဘၪဆၧဒဲၩဘၭအဖၧၩ့ႇ ၦၡၩဘၪစဲၪ့ထၪ့ခွံၬလၧပၫရၫဒဲၭအဖၧၩ့တၭႇ ဘၪထိးဆၧၡၪ့ဆၧယၬႇ လၧဂၪ့ခိၪချိၪ့ဖၧၩ့ယီၩလီၫႉ လၧဆၧချဲၩ့ဒီၩ့ဖၧၩ့ ၦလုဒၪအဒိၪဒဲၦလံဝဲၫဖိၪ မွဲဆၧမၪလူၬ ဒဲမီၪအဆၧၥီၪ့ဆၧၥၫ့လဖၪလီၫႉ ၦစမ့ရအၫဖိၪနီၪ မွဲဝ့ၫယွၩအဖိၪခွၫယ့ၫၡူၬဎြံၬနီၪလီၫႉ

ယ့ၫၡူၬဆၧချဲၩ့ဒီၩ့လၩ့ယီၩ မၩနဲၪဖျီၪ့ထၪ့အ့ၪပၧၩ အနၫ့ဆါဒၪဝ့ၫအဂဲး ဒဲၦကွ့ၩလံၬၥံၪႇ ၦဖၫရစံၫၥံၪအဂဲးနီၪဆ့လီၫႉ အဝ့ၫၥံၪ လီၩ့ဆီးလီၩ့ဖိၬ ယွၩအဆၧမၪလူၬႇ မၩဆၧဂ့ၩဆၧဘွၩလဖၪနီၪ ဘဲၫၥိၭ ၦၡၩကဒၪအဂဲးႇကအၪ့အူၭအဂဲးလီၫႉ ယ့ၫၡူၬမၩဆၧလၩ့လၭႇ မၩဘျၪထဲၩ့ၦစူၭၦဆၫႇ လ့ၩထိၭ ၦခံၫထူၬဆၫအၧၩ့ႇ မၩဆံၫ့ထၪ့ထဲၩ့ႇ လ့ၩထိၭၦၥံၫမၩမၧၫ့ထၪ့ထဲၩ့ႇ လၧမးၥံၫနံၩအကၠီၩ့ အဝ့ၫၥံၪအီၪက့ၪဆၧမၪလၧအလီၩလီၫႉ

ယ့ၫၡူၬဂဲၫလၩ့လၧဂၪ့ခိၪချိၫ့ယီၩ ၥီၪ့လိၪနဲၪလိၪအ့ၪၦၡၩ ယွၩအဆၧမၪလူၬႇ ယွၩအဆၧအဲၪႇ လၧအဆၧလီၩ့လၩ့လၬလၩ့ႇ ဒဲအဆၧဖံၭဆၧမၩအဒီၩ့အထ့ၬအဂ့ၩလဖၪနီၪလီၫႉ

ခၫ့ဖျီၫ့လၧၥၭမုဆံၫ့ဎံၪအခိးအတၩႇ လၧစဲၭကရမဲၩတူလဖၪႇ ခၫ့ဖျီၫ့လၧအၥွံၪအယၪႇ ယ့ၫၡူၬဂဲၫမၩဘျၪထဲၩ့ၦဆၧဒဲၩဘၭအဆၧဆၫလဖၪတၭႇ ထိးထဲၩ့တၩ့ထဲၩ့ပၧၩ ဆၧၥံၫလီၫႉ ယ့ၫၡူၬမၪလူၬထး အဆၧအီၪကီၪ့ ဘဲၫၥိၭကဆုးမၩယွၩအဆၧမၩႇ ကယိထဲၩ့ခွါထဲၩ့ယွၩအဖိၪအလံၩကိၭဂၩဒ့ၭလီၫႉ

ၦလုဆၧအဒိၪႇ ဒဲၦလံဝဲၫဖိၪ ဂဲၪဒၪဘၪ ၦလၧအထိးဆၧနိၫ့ဆၧနၭနီၪ လ့ၩဖီၩ့ခွံၬလၧဖၧၩ့ၥၭဝါလခီၫလီၫႉ အဝ့ၫၥံၪယၫ့ၥၭအဝ့ၫဧၪႇ လယၫ့ၥၭဘၪအဝ့ၫဂၩနီၪ ပၥ့ၪယၫအ့ၬႉ ၦစမ့ရအၫဖိၪ ဂဲၫဒၪအဝ့ၫႇ ယၫ့ၥၭဝ့ၫလီၫႉ ၦၡၩအၪဒၪဆၧႇ ပယၫ့ၥၭဆၧၥ့ၪကိၭဂၩဒ့ၭလီၫႉ ပယၫ့ၥၭဆၧၥ့ၪလါနၫ့ အၪဒၪဆၧ အဆိၪထုၬ ပစီၪ့လၩ့န့ပဂးတၭႇ ပလ့ၩမၩဆၧၩ့ၦလၧအဘၪလိၪဆၧမၩဆၧၩ့လဖၪနီၪ ပလ့ၩမၩဆၧၩ့ကဲၪလၫ့အ့ၬႇ ပလ့ၩမၩဆၧၩ့ဘၧၫ့အ့ၬႉ

ပစံၭလၩ့ၥၭႇ အ့ၪပလ့ၩဆၧၦလဂၩစွါဘိၩႇ အခံၫ့လူၬႇ ပကျိၪစ့ၩၥံၪလူၬႇ ပဂဲးပဘၭလူၬလါနၫ့ ပကဘၪၥ့ၪယၫ ၦလၧအမၩဘိၭမၩဆၧၩ့ၦၡၩ လၧအၥုၪ့ဂ့ၩၥၭဘွၩဖၧၩ့ကဂၩနီၪ မွဲကဲၪထၪ့ဆၧပျီၩ့ပျီၩ့အ့ၬႉ  အထီဘဲၫယီၩ ယွၩအဖ့ၪလၫ့အဝ့ၫအခိးအတၩႇ အဂဲးအဘၭ ဒဲလၧယ့ၫၡူၬဎြံၬကဂဲၫလၩ့နံၫဘျၩကကၠၪႇ ကဖ့ၪလၫ့အ့ၪအလံၩ့အလဲၫ့လဖၪလီၫႉ