ဂီအဆၧၫ့အထီမုအီၪပွံၭနံၩႇ မုနွ့ၫ (၅)

ယ့ၫၡုၬဂဲၫလၩ့လၧဂၪ့ခိၪချိၪ့ဖၧၩ့ယီၩ စယီဟၫ့ ၃:၁၇ ႇ အဂဲးဘဲၫယီၩ ယွၩအၪ့မၧၫ့လၩ့အဖိၪခွၫ လၧဂၪ့ခိၪချိၫ့ယီၩႇ ဘဲၫၥိၭအမိစ့ၩရၫ့ ၦဂၪ့ခိၪဖိၪမွဲအ့ၬႉ မွဲဘဲၫၥိၭ ၦဂၪ့ခိၪဖိၪၥံၪ မိထီၩ့ဝ့ၫလၧဆၧထိးထဲၩ့တဲၩ့ထဲၩ့ လၧအဝ့ၫအကၠီၩ့နီၪလီၫႉ

အဝ့ၫၥံၪႇ အၥၭအဎိၩထုၬ ထီၩ့လၧအၥၭအဆံၭထုၬ စဲၪ့ထၪ့ခွံၬလၧဆၧအလးနီၪလီၫႉ အဝ့ၫၥံၪအနၫ့ဆါဒၪဝ့ၫႇ ဒိၭန့ဘၪကဆါယွၩ အဆၧယၫ့ၥုၪ့ယၫ့ၥၭလီၫႉ လၧလံၬဆံၫ့ဎံၪအဖၧၩ့ႇ အဝ့ၫၥံၪဖီဝ့ၫႇ ဆီၫ့မီၪ့ဝ့ၫ ႇ ၥံၫကျံၩထၪ့ဝ့ၫႇ  ယွၩနီၪ အၥၭထၪ့ကၪႇ ဒဲ လၧၫ့ဎွ့ၩဝ့ၫလၧ ဆၧယၫ့ၥုၪ့ယၫ့ၥၭ ဒဲဆၧအဲၪဆၧကွံၩလီၫႉ လၧလံၬဆၧစံၭထၪ့အၪ့အူၭအဖၧၩ့(၅၁:၁)  အဝ့ၫၥံၪၥံၫကျံၩႇ ဘၩဆိၪဖၪႇ ယွၩဧ့ႇ ယၫ့ၥုၪ့ယၫ့ၥၭယၧၩဘဲၫနဆၧအဲၪအခိးအတၩနီၪဆံၭႉ ဘဲၫနယၫ့ၥၭဆၧအၪအၪလ့ၬအၥိၭနီၪ ကွဲၪဖျါခွံၬ ယဆၧမၪလဖၪဆံၭႉ

ယွၩဒီၩ့လၩ့ၦအံၫစရ့လၭဖိၪၥံၪ ဘဲၫၦအဲၪဘိၩဆၧအၥိၭလီၫႉ အဝ့ၫၥံၪအုၩ့လၩ့ၥၭ လၧကတီၩလီၩ့လၧအကဆါယွၩအဖၫ့ခိၪႇ ကဘိၪ့ထၪ့ဘၩထၪ့အဝ့ၫလဂၩဎးႇ ကခိၭနၪအဆၧမၪလါနၫ့ဂ့ၩႇ အဝ့ၫၥံၪ စဲၪ့ဒၪအယွၩအကဆါတၭႇ လ့ၩဘိၪ့ထၪ့ဘၩထၪ့ ဆၨၩအဂူဂၩအဆၧဂၩ့ဆၧဖၪ့လဖၪလီၫႉ လါနၫ့ဂ့ၩ ယွၩနီၪ ကွဲၪဖျါခွံၬအဝ့ၫၥံၪအဆၧဒဲၩကိၭကၠၪဒံၭလီၫႉ