ဆၧမၩလၩမၩဖၩ့ၡီၩ့ ၂၅နံၪ့ စ့ၩဘျံၭယူၩဘလံၫဖၧၩ့ စောလားထော်ဝါး ဂဲၫၥၭအွံၪဆၧၩ့ စံၭထၪ့အၪ့အူၭအဂဲး

နံၪ့ ၂၀၂၂နံၪ့ လၩမၫၡၭ၂၁ ၥၫ့နီၪ ဆၧမၩလၩမၩဖၩ့ၡီၩ့ ဆၧကဲၪထၪ့ ဘိၪ့ခိၪၥၫ့ခၫ, Bro, Sr အနံၪ့ အီၪထၪ့ဘၭဝ့ၫဒၪ ၂၅နံၪ့စ့ၩဘျံၭယူၩဘလံၫ အီၪဝ့ၫဒၪလၧချံၫ့မုၬခီၫ့ဆၧအီၪကီၪ့နီၪလီၫႉ

ၦလၧအထိးဆၧၫ့ဒိၭန့ စ့ၩဘျံၭယူၩဘလံၫလဖၪနီၪ မွဲဝ့ၫဒၪလၧ ၥၫ့ခၫဒိၪ Fr.Vincence , Broတီမောသေ, Sr.Mariaအငယ်, Sr.မာဒလင်းမေရီသိန်း ဒဲ Sr.ဖလောဒါ လဖၪနီၪလီၫႉ ၦလၧအလ့ၩခိၪလ့ၩနါမံဆၩဆၧလုထၪ့နီၪ မွဲဝ့ၫဒၪ လၧ ချံၫ့မုၬခီၫ့ဆၧအီၪကီၪ့ ၥၫ့ခၫအၥၫ့လဂၩမွဲဝ့ၫ Fr.ဂေးဗြဲလ်နီၪလီၫႉ

လၧစ့ၩဘျံၭယူၩဘလံၫ မံဆၩဆၧလုထၪ့အဖၧၩ့ ၦၥၭအွံၪဆၧဆါလၧအမံၩ့ဎိၩဝ့ၫဒၪလဂၩမွဲဝ့ၫ စောလားထော်ဝါးနီၪ ဂဲၫၥၭအွံၪဆၧၩ့ စံၭထၪ့အၪ့အူၭနီၪ ပဒၪဘၪလီၫႉ အဝ့ၫယီၩနီၪ  အီၪလၧ စကားများဝံးဒီၪ့, စခန်းကြီး တဝၫ့ဒဲ မွဲလၧ ဘၧၩ့ထံၫဆၧဘိၪ့ဆၧဘၩဖိၪကဂၩနီၪလီၫႉ အဝ့ၫယီၩနီၪမွဲလၧၦဖျိၩ့ဆၨၩဖိၪကဂၩဂီၩ့ နုၬလၩ့ပြၧၩ့ဆၧၥၭအွံၪလၧ Myanmar Idol ဖၧၩ့ဂီၩ့ န့ဘၪခိၪဖၭဒဲ ကဲၪထၪ့ဘၪ ၦၥၭအွံၪဆၧလဂၩနီၪလီၫႉ အဝ့ၫယီၩနီၪဆ့ မွဲအမံၩ့ဎိၩဝ့ၫဒၪ ၦၥၭအွံၪဆၧလဂၩဆ့နီၪလီၫႉ

မံဆၩဆၧလုထၪ့အဖၧၩ့ Fr.ဂေးဗြဲလ် စံၭဘၪဝ့ၫ ကဲၪထၪ့ဘၪ ဘိၪ့ခိၪၥၫ့ခၫလဂၩဂီၩ့ ဘၪလုထၪ့မံဆၩ အဆိၪထုၬ လဖၨၪ လၧၦဆူၩနဲၩဖိၪၥံၪအၪအၪအကၠီၩ့အဝ့ၫအၥၭဝၭထိၬအဂဲးႇ ပကဘၪအၪ့အူၭထၪ့ စ့ၩဘျံၭယူၩဘလံၫဆါလဖၪအဂဲးႇ ၂၅နံၪ့အထးဖၧၩ့ယီၩ အဝ့ၫၥံၪဘၪဂဲၫထဲၩ့ခၫ့ဂၬဆၧနီၪ မွဲလယီၫဘၪအဂဲးႇ စံၭခိးစံၭတၩဘၪ ၦအဂဲၫဖ့ၪလၩဖ့ၪဖၩ့ စ့ၩဘျံၭ ယူၩဘလံၫ ဝံးတခိၩ့ ဘျၪ့ကိၪ့ဒိၪ Bp.John Saw Yaw Han အဂဲးႇ ကဆါယွၩနီၪ ဆိၪဂ့ၩဆိၪဘွၩလၩ့ ၦအဂ့ၩဒဲ ၦအအၧၩ့အဂဲးႇ ကဆယွၩနီၪ ဖ့ၪလၫ့ပၧၩအခိးအတၩလဖၪလါနၫ့ ဘဲၫပအၪ့န့အၥိၭနီၪ မွဲပကန့ဘၪအဂဲးႇ လၧပဆၧၥၭမၧၫ့ ဖၧၩ့ ပဒိၭန့ထၬဘၪ ဆၧဆိၪဂ့ၩဆိၪဘွၩအလၩ့ဆၫ့လဖၪလါနၫ့ ပလထုၪ့ကၠၭဘၪပၥၭအကၠီၩ့ ပလၥ့ၪယၫဘၪ ကဆါယွၩ အခိးအတၩအဂဲးႇ ပကဲၪဎြံၬဖိၪကိၭဂၩဒ့ၭနီၪ မွဲပကဘၪလီၩလၩ့လါလၩ့ ဆၧထိးထဲၩ့တၩ့ထဲၩ့အဂဲးနီၪ ပမူၩဒၩအီၪဝ့ၫဒၪကိၭဂၩ အဂဲး စံၭဝ့ၫဒၪနီၪလီၫႉ

စ့ၩဘျံၭယူၩဘလံၫဆါလဂၩမွဲဝ့ၫ Bro.တီမောသေနီၪ စံၭဝ့ၫဒၪ ယၥၭအီၪထၪ့ဘၭ၄၈နံၪ့အထီနီၪ ယထိးဆၧၫ့ဒိၭန့ ဘၪ၂၅နံၪ့စ့ၩဘျံၭယူၩဘလံၫလီၫႉ ၂၅နံၪ့အထးဖၧၩ့ယီၩ ယခ့ၬယိထဲၩ့အခၫနီၪ ယဂဲၫထဲၩ့မၩထၪ့ထၬ ဆၧဖံၭဆၧမၩ ဎိၩဎိၩဒိၪဒိၪ အီၪနးမံၩ့အ့ၬႉ ဆၧကၪဆၧဂဲၩဒဲ ဆၧစူၭဆၧဆၫ ဎိၩဎိၩဒိၪဒိၪဆ့ ယဒၪဆၧၫ့ယၫနးဆိၭအ့ၬႉ ကယဲဒၪ ယဘၪလၩ့အလးလဖၪနီၪ မွဲလၧကဆါယွၩအခိးအတၩအကၠီၩ့ ယထိးဆၧၫ့ခၫ့ဂၬခွံၬ ကနံၪ့ဘၪကနံၪ့ န့ဝ့ၫဂ့ၩဂ့ၩဘၪဘၪလီၫႉ ဖိၭဘိၭ ၂၃နံၪ့ဆါဆါနီၪ ယဘၪဂဲၫထဲၩ့ဖီၪ့ဒၪ ဘော်ဒါနီၪလီၫႉ ပဘၪယိဖိၪၥၪအခၫ လၧအဝ့ၫၥံၪအီၪဆ့ ပဘၪထိးၥီၪ့ထဲၩ့ ပၥၭမွဲအီၪဆ့နီၪလီၫႉ ၂၅နံၪ့ အထးဖၧၩ့ယီၩ ကဆါယွၩဖ့ၪလၫ့ယၧၩအခိးအတၩလဖၪနီၪ ယစံၭခိးစံၭတၩထဲၩ့ဘၪဒဲ လၧယၫခီၫဘဲၫၥိၭ ယဆုးထဲၩ့ဖီၪ့ ထၪ့ဖံၭထၪ့ ကဆါယွၩ အဆၧဖံၭဆၧမၩ ကန့အဂး အၪ့ကံၩ့ဘၩဆိၪဖၪအ့ၪပၧၩပဂးလါဆံၭ အဂဲးစံၭဝ့ၫဒၪနီၪလီၫႉ

စၭထၪ့လၧ အဖီၩ့ခွံၬ၂၀၂၁နံၪ့ အိၩ ဒိၩ့ပၥံၫ့ဆၧအီၪကီၪ့ ၥၫ့ခိၪဒိၪ Bp.John မၩ့ဆံၫ့ဎံၫနီၪ မွဲလအီၪလၧၩ့ဘၪအကၠီၩ့ စ့ၩဘျံၭယူၩဘလံၫကဘျၩ့ယီၩအဖၧၩ့ ဝံးတခိၩ့ဆၧအီၪကီၪ့ ၥၫ့ခိၪဒိၪ Bp.John စောယောဟန် ဂဲၫဖ့ၪဂဲးဖ့ၪဘၭဝ့ၫဒၪအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ

နးအဲၪဖီၫဘွၩ

24.3.2022