ဒိၩ့ပၥံၫ့ဆၧအီၪကီၪ့ FR.HENRY အဲၪချံၫ့အဆၧဆၫ့ထွ့ၪ ဘၪထွ့ၪလၧ ဂီအဆၧၫ့အထီအဂဲး

Wednesday, March 02, 2022

နံၪ့၂၀၂၂နံၪ့ ဘၪထွ့ၪလၧ ဂီအဆၧၫ့အထီ ဆၧဆၫ့ထွ့ၪဘၪၦဆူၩနဲၩဖိၪၥံၪလံၬနီၪ လၧအဖီၩ့ခွံၬလၩမၫၡၭ(၁) ၥၫ့အိၩ ဒိၩ့ပၥံၫ့ဆၧအီၪကီၪ့ fr.Henry အဲၪချံၫ့ ထုၬထၪ့ဝ့ၫဒၪနီၪလီၫႉ

လၧဆၧဆၫ့ထွ့ၪလံၬပရၧၫ့အဖၧၩ့ ကွ့ၭလၩ့ထၬဝ့ၫဒၪနီၪဘိၭ ဂီအဆၧၫ့ထီနီၪ ကစၭထၪ့ဝ့ၫဒၪလၧ လၩမၫၡၭ ၂ၥၫ့ဆၧဒိၭန့’’ချၪ’’ဘိၪ့မုနံၩအဂဲးႇ ကနံၪ့ယီၩ ဂီအဆၧၫ့အထီအဂး ၥၫ့ဎွၩရွံထၪ့ထၬဆၧၥၭထိၬပရၧၫ့နီၪမွဲဝ့ၫဒၪလၧ ဂလ့ၡၫ 6း9-10 လၧပမၩဆၧဂ့ၩအဖၧၩ့နီၪ မွဲပထီးလၩ့ပွံၭလဂ့ၩႉ အဂဲးဘဲၫယီၩ ပအ့ၪလလၩ့ပွံၭလၩ့ထၩ့ဘၪနီၪ ထီးအမုအလၩဘၪခိၬ ပမိကူၭဆၧလီၫ. ဆၧနီၪအကၠီၩ့ ဘဲၫဆၧၥၭထိၬပရၧၫ့ယီၩအၥိၭ ပဝ့ၫၥံၪလဖၪယီၩ ဘဲၫအဆၧၫ့ အထီန့ဝ့ၫၥိၭ ပကမၩထၪ့ ၡၩခံးဂးအဂဲးႇ ပဝ့ၫၥံၪယီၩ ၦဆူၩနဲၩဖိၪလဖၪအဂး မွဲပကဝၩ့မၩဆၧၩ့ထၪ့ကၠၭအဂဲးႇ လၧဂီ အဆၧၫ့အထီဆၧဆၫ့ထွ့ၪ လံၬပရၧၫ့ဖၧၩ့ ကွ့ၭလၩ့ထၬဝ့ၫဒၪနီၪလီၫႉ

လခဲၫ့ကမံၩ့ဘၪဆၧဆၫ့ထွ့ၪထၬနီၪဘိၭ ကနံၪ့ယီၩဂီအဆၧၫ့အထီဖၧၩ့ လၧၥုၪ့ခံၥၭလဲၫအဖၧၩ့ ၦဆူၩနဲၩဖိၪ လဖၪနီၪ ကဘၪအၪ့ကံၩ့ဘၩဆိၪဖၪဆၧဂ့ၩဂ့ၩဘၪဘၪႇ ကဘၪလုအၪ့လုအီၩဝ့ၫဒၪအၪအၪဒဲႇ ကဘၪမၩဘိၪ့ မၩဆၧၩ့ ဆၧအၪအၪနီၪလီၫႉ လၧဆၧဘၩဆိၪဖၪအဖၧၩ့ ပကဘၪအၪ့ကံၩ့ဘၩဆိၪဖၪန့အ့ၪ ခးၥဲၫ့ထၧၫ့ဘံၪ့ယၫ ဘဲၫဆၧဎူၫ ဆၧဎၩ့ကအီၪအဂးႇ ယူၫကရံၩ့ထံၪခး ဒဲ ရၭၡၩထံၪခး ဆၧဒုၭဆၧခၭ ဘဲၫၥိၭကအီၪပထုၬခွံၬဖျဲၪဖျဲၪအဂးႇ ခးပယၩ့ဖၧၩ့ ကိၫဘံဆၧဆၫဘဲၫကလၩ့မါဆိၫ့ခွံၬဝ့ၫအဂး ဒဲ ခးပယၩ့ဖၧၩ့ဘဲၫၥိၭဆၧဎူၫဆၧဎၩ့ကအီၪထၪ့ထဲၩ့အဂးႇ ဘဲၫၥိၭကလ့ၩ ထၪ့လ့ၩထီၫအဂး မွဲပကဘၪထံၭလၩ့အၪ့ကံၩ့ဘၩဆိၪဖၪဝ့ၫဒၪအဂဲး ဆၫ့ထွ့ၪထၬၦဆူၩနဲၩဖိၪလဖၪနီၪလီၫႉ

နးအဲၪဖီၫဘွၩ

2.3.2022