ဆိၪဂ့ၩဆိၪဘွၩမၩဆံၫ့ဎံၪထၪ့ တီၫလၭတဝၫ့ ဂံၪ့ဒီၪ့ဆံၫ့ဎံၪၥရိၬအဂဲး

နံၪ့၂၀၂၂နံၪ့ လၩဇၫ့နွ့ၫရံၫ ၂၈ၥၫ့ လဂီၩ၈နၩရံၫအခံၫ့နီၪ ဆၧမၩလၩမၩဖၩ့ ဆိၪဂ့ၩဆိၪဘွၩဝဲထၪ့ဘၪ ထံၫဖီၭ ကၫဆၧအီၪကီၪ့ တီၫလၭတဝၫ့ ဂံၪ့ဒီၪ့ဆံၫ့ဎံၪၥရိၬနီၪလီၫႉ

ၥရိၬယီၩနီၪ မွဲလၧပအဲၪကွံၩယူၭယၪ့ဘၪ ၥၫ့ခိၪဒိၪဂၠိၫ့မၩ့ဆံၫ့ဎံၪလချုၬထဲၩ့ထဲၩ့ဘၪလၧ ကဆါယွၩအအီၪအ ထီ အီၪက့ၪထး အစူၪလးလခဲၫ့ထုၬၥရိၬကဖျိၪ့နီၪလီၫႉ လၧအဂုအိၩၥရိၬယီၩနီၪ မွဲၦၡၩၥုၪ့ထၬဒၪလၧၥံၪ့ဂီၩ့ ဘဲၫက ကဲၪထၪ့ၥရိၬဂ့ၩဂ့ၩကဖျိၪ့အဂး ၥၫ့ခိၪဒိၪယီၩခိးဂဲးခိးဘၭအၪ့ထုၪ့ဆၧမၩဘိၪ့လၧအိၫလဲၩ့ဖၫ့ခိၪအကၠီၩ့ ဆၧမၩဆၧၩ့ လဖၪန့ဝ့ၫဒၪတၭ ဘဲၫယီၩနီၪၥုၪ့ထၪ့ထဲၩ့ဝ့ၫဒၪလၧ တၨၭန့ယူၭနီၪလီၫႉ

ၦလၧအလ့ၩခိၪလ့ၩနါၥုၪ့ထၪ့ၥရိၬယီၩနီၪဘိၭ မွဲဝ့ၫဒၪလၧ တီၫလၭတဝၫ့ဖိၪ မၩ့လၭထိၭဒဲ အထံၭၥိၭလဖၪနီၪ လီၫႉ အဝ့ၫနီၪ မွဲဒံၭလၧ မိမၫရံၫခရၧၫ့ဖိၪကဂၩဒံၭနီၪလီၫႉ

ထံၫဖီၭကၫဆၧအီၪကီၪ့ၥၫ့ခၫဒိၪ Fr.Alexander နီၪစံၭဝ့ၫဒၪ ၥရိၬယီၩနီၪမွဲလၧၥၫ့ခိၪဒိၪဂဲၫထဲၩ့ခိးဂဲးခိးဘၭ ထၬလါနၫ့ ထီၩ့လၧ ပမၩဆံၫ့ဎံၪပဝဲထၪ့ကကၠၪ မွဲအဝ့ၫလအီၪလၧၩ့ဘၪလါနၫ့ အဝ့ၫနီၪမွဲကအီၪယိလၩ့စိၩပၧၩ လၧမူၭခိၪဘၩ့မုးဂီၩ့ အၥၭကဎွံၪဎုၬလၧပၧၩနီၪ ပနဲၩဝ့ၫအဂဲးႇ မုဆၫကနံၩယီၩၥၫ့ခိၪဒိၪလအီၪလၧၩ့ဘၪလၧပကျၩလါနၫ့ ပစံၭခိးစံၭတၩဘၪအဝ့ၫ ဒိၪဒိၪအၪအၪဒ့ၭအဂဲးႇ ဘဲၫၥရိၬယီၩကကဲၪထၪ့ဘဲၫယီၩအဂး ၦလၧအထံၭလၩ့ဆၧမၩဘိၪ့ လဖၪနီၪဆ့ ပစံၭခိးစံၭတၩအဂဲးႇ ၦဆူၩနဲၩဖိၪလဖၪဆ့ ဆုးထဲၩ့အၪ့ကံၩ့ဘၩဆိၪဖၪအ့ၪၥၫ့ခိၪဒိၪအဂးခလူၬအဂဲး  Fr.Alexander နီၪစံၭဝ့ၫဒၪနီၪလီၫႉ

Fr.Wilfried Myint Soeနီၪ ဆုးထဲၩ့စံၭဘၪဝ့ၫ ၥရိၬယီၩအမံၩ့နီၪမွဲဝ့ၫဒၪလၧ ဂံၪ့ဒီၪ့ဆံၫ့ဎံၪအကၠီၩ့ ၦဆူၩ နဲၩဖိၪအအီၪလၧ တီၫလၭတဝၫ့ဖၧၩ့ယီၩလဖၪဆ့  ကဘၪၥုၪ့ထၪ့ထၬအဂံၪ့ဒီၪ့လဖၪ ဘဲၫဂံၪ့ဒီၪ့ဆံၫ့ဎံၪယီၩၥိၭ ကလိၪ ဝ့ၫတၡါအဂဲးႇ ကဘၪအၪ့န့ထၪ့အဒီၩ့အထ့ၬလၧ  စံၫ့ဂၠိၩဇဲႇ မိမၫရံၫဒဲ ကဆါယ့ၩၡူဎြံၬအီၪအဂဲး ဖ့ၪဂဲးဖ့ၪဘၭထၪ့ ၦဆူၩနဲၩဖိၪလဖၪ ဘဲၫနီၪအၥိၭနီၪလီၫႉ

လကၭဒံၭဘၪ Fr.Maurice Nyut Wai နီၪ စံၭဘၪဝ့ၫ အဝ့ၫနၪ့ထၪ့ထဲၩ့ ၥၫ့ခိၪဒိၪဂၠိၫမၩ့ဆံၫ့ဎံၪ အဆၧချဲၩ့ ကမီၪ့အဂဲးႇ ၥၫ့ခိၪဒိၪအဆၧချဲၩ့နီၪမွဲဝ့ၫဒၪလၧ ၦၥုၪ့ထၪ့ၥရိၬနီၪ မွဲကဆါယွၩကလၩ့မါအဂးအ့ၬ ၦၥုၪ့ထၪ့ၥရိၬနီၪ ကဘၪမွဲလၧၦၡၩကထီၩ့စိၩလၧ ကဆါယွၩအအီၪအဂး ဆၧချဲၩ့နီၪလီၫႉ  ၦၥုၪ့ထၪ့ၥရိၬဂီၩ့ အ့ၪမွဲၦၡၩကလၩ့မါနီၪဘိၭ မွဲအခီၫပယီၫကအီၪနးမံၩ့လၧၩ့အ့ၬႉ ပၥုၪ့ထၪ့ၥရိၬနီၪ မွဲလၧပဖိၭလိၭထၪ့အ့ၪ ၦဂူၪဂၩအခွးအယၬ ဘဲၫအဝ့ၫၥံၪက ထီၩ့စိၩလၧကဆါယွၩအအီၪအဂးနီၪလီၫႉ  ဘဲၫပကထီၩ့စိၩလၧ မူၭခိၪဘၩ့မုးအဂးနီၪ ပကဲၪၦၡၩလဖၪယီၩ လၧပမၧၫ့ ဒံၭအထီ ပကဘၪဖံၭၥိၭထၬကဆါယွၩလၧ ပၥုၪ့ပၥၭအဖၧၩ့နီၪလီၫႉ အနီၪမၬအ့ၪမွဲ ပၥံၫကကၠၪ မွဲပကထီၩ့စိၩလၧ မူၭခိၪဘၩ့မုးနီၪလီၫႉ ဘဲၫၥရိၬယီၩကအီၪဘၪဎံၪဎံၪလၩလၩဆံၫ့ဆံၫ့ဖျ့ၪဖျ့ၪအဂး တီၫလၭၦဆူၩနဲၩဖိၪလဖၪ ကဘၪ ခိးဂဲးခိးဘၭဝ့ၫကလိၫအဂဲးႇ မုအီၪပွံၭနံၩအထီ မွဲကဘၪဘိၪ့ထၪ့ဘၩထၪ့ၡီၩ့ကဆါယွၩအဂဲးႇ ကဘၪကိၭဖံၭၥိၭ ဆၧအီၪကီၪ့ၥၫ့ခၫဒိၪဂီၩ့ ကဘၪလုထၪ့လၩ့ဎိၭမံဆၩဆၧလုထၪ့အဂဲး Fr.Maurice Nyut Wai နီၪဖ့ၪဂဲးဖ့ၪဘၭဘၪ ၦဆူၩနဲၩဖိၪလဖၪ ဘဲၫနီၪအၥိၭနီၪလီၫႉ

လၧတီၫလၭတဝၫ့ဖၧၩ့နီၪ လံၬဘွၩ ႇ လံၬၥၧၫ့ ဒဲ ကဲၬၥလံၬၦဆူၩနဲၩဖိၪလဖၪ အီၪဝ့ၫဒၪဒဲ ကဲၬၥလံၬဆၧဘိၪ့ ဆၧဘၩဖိၪထီးလူၬအီၪဝ့ၫဒၪ ဖိၭဘိၭ အဂၩ (၆၀ဘျဲၪ)အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ

၃၁ႉ၁ႉ၂၀၂၂