လၧအိၫလဲၩ့ဖၫ့ခိၪ ဆၧၥီၪ့လိၪၦဖျိၩ့ၡိလံၬလဲ အီၪထၪ့ဝ့ၫဒၪ လနၩ့နၩ့လါနၫ့ ၦဖျိၩ့ၡိဖိၪတၡါလဖၪ မၩလိၪအၥၭၡၩဝ့ၫဒၪအဂဲး

နံၪ့၂၀၂၀-၂၀၂၁နံၪ့အထးဖၧၩ့ ၦဖျိၩ့ၡိလံၬလဲဒဲဆၧလူဆၧချဲၩ့ ကလ့ၩထၪ့လ့ၩထီၫအဂး ဆၧ ၥီၪ့လိၪထံၪယဲၩ့ခးယဲၩ့အဆၧလူဆၧချဲၩ့ ဆိၫၡဲၫမံၫဒံၫယၫလနၩ့နၩ့အဖၫ့ခိၪ ထံၭလၩ့ၥီၪ့ထဲးလၧ ခးပ ယၩ့ထံၪခးဖၧၩ့အီၪဝ့ၫဒၪဆၨၩဆၬလဖၪ အဆၧလူဆၧချဲၩ့ယူၭနီၪလီၫႉ

ဆၨၩဆၬအဆၧလူဆၧချဲၩ့လၧ ဘၪဆၧၥီၪ့လိၪဝ့ၫဒၪလဖၪနီၪ ဘဲၫယၥ့ၪယၫဝ့ၫအၥိၭ ကခၠၫ့ ဂၠံၩ့ဖီၩႇ ယိၩႇ ဖျိၩ့ၡၩ့ႇ ဖျိၩ့ၡိဒဲ ရခဲၫ့ အလၨလဖၪနီၪလီၫႉ လၧဆၧနီၪအဖၧၩ့ ၦဖျိၩ့ဆၨၩဖိၪလဖၪအဂး မိထံၭ(ဖျိၩ့ၡိ) ဒဲ ဖါ ထံၭ(ဖျိၩ့ၡၩ့) ဘၪဆၧထံၭလၩ့ၥီၪ့ထဲးဝ့ၫနီၪ မွဲလၧဆၧအဂ့ၩဒိၪမၬလၧ ဖျိၩ့ဖိၪလဖၪအဂးနီၪလီၫႉ အ ကၧၩ့ဒိၪထုၬနီၪဘိၭ ဖျိၩ့လၧချဲၩ့ဖျိၩ့ဆၧချဲၩ့လဘၪလၧၩ့ဘၪလဖၪ ဖျိၩ့လၧဖီဖျိၩ့လံၬလဲလဘၪလၧၩ့ဘၪ လဖၪအဂး မွဲဆၧန့ခိးန့တၩကကဲၪထၪ့ ဒိၪဒိၪအၪအၪနီၪလီၫႉ

လၧဆၧၥီၪ့လိၪၦဖျိၩ့ၡိလံၬလဲဒဲဆၧချဲၩ့ဆၧမၩလိၪအဖၨၪဖၧၩ့ လၩ့ၥၭအုၭဝ့ၫဒၪလမံၩ့နီၪ ၦလၧ အဂဲၫထၪ့ဝ့ၫဒၪလဖၪအၪဒၪဆၧနီၪ လမွဲဘၪဖျိၩ့ဆၨၩဖိၪတၡါၡါလဖၪနီၪလီၫႉ ကနၩ့နၩ့နီၪ မွဲ လၧတ ရူၭဆၨၩဖိၪလဖၪႇ ကနၩ့နၩ့နီၪမွဲလၧ ပယၩ့ဆၨၩဖိၪလဖၪႇ ကနၩ့နၩ့နီၪမွဲလၧ ဆၨၩ၂ဆၨၩလဲၩမွံၩထၬၥၭ လဖၪႇ ကနၩ့နၩ့နီၪမွဲလၧ ဖျိၩ့ဆၨၩဒဲဆၨၩဂူၪဂၩလဲၪမွံၩထၬၥၭလဖၪနီၪလီၫႉ

ၦအဂဲၫထၪ့လဖၪအဖၧၩ့ လမွဲဘၪဖျိၩ့ဆၨၩဖိၪလဖၪနီၪ ပအၪ့စၪ့ဘၪ ဘၪနီၪလၧနဂဲၫထၪ့ ၦဖျိၩ့ၡိလံၬလဲဒဲဆၧချဲၩ့ယီၩလဲၪအခၫ အဝ့ၫစံၭဆၧၫ့ထဲၩ့ “ပကဲၪခးပယၩ့ဖိၪဂီၩ့ ထံၪယဲၩ့ခးယဲၩ့အ ဆၧလူဆၧချဲၩ့ခီၫ ပမၩလိၪပၥၭလါနၫ့ အီၪလၧခးပယၩ့အဖၧၩ့ ဆၨၩဆၬလဖၪအဆၧလူဆၧချဲၩ့နီၪ မွဲပလမၩလိၪဘၪနးကၠၪအကၠီၩ့ ဘဲၫယီၩယမိၥ့ၪယၫဘၪ ပထံၪခးဖၧၩ့ဆၨၩဆၬလဖၪ အဆၧလူဆၧ ချဲၩ့ အဆၧဆၧးဎံၪဆၧးလၩလဖၪအကၠီၩ့ ယထၪ့မၩလိၪဘၪယၥၭ ဖျိၩ့ၡိလံၬလဲဒဲဆၧမၩလိၪယီၩ အဂဲး” လီၩဝ့ၫနီၪလီၫႉ

လါနၫ့ဖျိၩ့ဖိၪလၧအဖီဖျိၩ့လံၬလဲလဘၪဘၪလဖၪႇ အချဲၩ့ဖျိၩ့ဆၧချဲၩ့လဘၪလၧၩ့ဘၪလဖၪနီၪ ပဒၪဂဲၫထၪ့မၩလိၪအၥၭၡၩဝ့ၫနၭမၬနီၪလီၫႉ ဆၧအယီၩနီၪလၧဖျိၩ့ၡိဖိၪၥံၪအထီလၧယၫအဂး မွဲကဲၪ ထၪ့ဆၧအၪ့ယိၪခဲၫ့ကံၭကမံၩ့နီၪလီၫႉ ဖျိၩ့ၡိမုနုၬဖိၪလဖၪ အဆၧဝံဆၧနၭနီၪ အ့ၫယၫဝတံၫခးဒီၪ့ဖၧၩ့ ထီးလူၬမၬ အီၪဝ့ၫဒၪဖိၭဘိၭ ကခွးနီၪလီၫႉ ပဆၨၩကလ့ၩထၪ့လ့ၩထီၫအဂးနီၪ ပကဘၪကျ့ၭစၨၭ ထၪ့ဝ့ၫ ကလိၪအၪမၬဒံၭနီၪလီၫႉ

နးအဲၪဖီၫဘွၩ

၂၆ႉ၁၀ႉ၂၀၂၁