FABC ခးအ့ၩၡၩ ကဲၬၥလံၬ ၥၫ့ခိၪဒိၪခရၧၫ့ခိၪနါ ကဝဲထၪ့ဘၪ RVA Mobile App အၥၫ့အဂဲး

ခးအ့ၩၡၩကဲၬၥလံၬၥၫ့ခိၪဒိၪခရၧၫ့ခိၪနါ ကၫဒံၫနဲၫခၠၩစမီၫ့ဘိၫနီၪ လၩအီၭတိၫဘၧၫ(၁၁)ၥၫ့ ကိ မွဲကဝဲထၪ့ဘၪ RVA Mobile Appအၥၫ့ လၧဝံးတခိၩ့ စံၫ့မ့ၫရံၫကၥံၪဒရဲၫၥရိၬလးဖၧၩ့နီၪလီၫႉ

မုနံၩအနီၪ မွဲဝ့ၫဒၪလၧ ၦအဂဲၫထဲၩ့မၩကဲၪထၪ့ထၬ RVA အဆၧရၩလၩ့လဂၩမွဲဝ့ၫ ၥၫ့ဎွၩ ၦဆံၫ့ဎံၫဂၠိၫ့(၂၃)ဂၩလဂၩ အဘိၪ့မုနံၩနီၪလီၫႉ RVA ယီၩနီၪ စၭထၪ့လၧ ၁၉၆၉နံၪ့အိၩ ခးအ့ၩၡၩ ၦခမျၧးလဖၪအဂး ၥၫ့ခိၪဒိၪလဖၪ ဂဲၫထဲၩ့မၩကဲၪထၪ့ထၬ ဘဲၫဆၧဆုးကျိၭလိၬၥၭပလဲၭဖီၩ့ကမံၩ့ၥိၭ နီၪလီၫႉ  

RVAယီၩနီၪ ရၩလၩ့စိၩဘၪ ဆၧၥၭထိၬပရၧၫ့လဖၪႇ ဆၧဘိၪ့ဆၧဘၩအဂဲးလဖၪႇ ဆၨၩဆၬ လဖၪအဆၧဆၧးဎံၪဆၧးလၩအဂဲး ဒဲ ဆၧဒၪလၩ့ဎိၭလၧၦအၡၪ့အယၬဖိၪအဂဲးလဖၪနီၪလီၫႉ

လၩအီၭတိၫဘၧၫ(၁၁)ၥၫ့ကိ လၧမံဆၩဆၧလုထၪ့ live အဖၧၩ့ ကၫဒံၫနဲၫ ကဝဲထၪ့ RVA Mobile appအၥၫ့ယီၩနီၪလီၫႉ FABC ၡၩခမျၧးဆၧဆုးကျိၭလိၬၥၭအဂးမူၩဒၩအီၪ ၥၫ့ခိၪဒိၪလဖၪဆ့ လၧဆၧ ဝဲထၪ့ app ယီၩ ဆၧဎိၭထံၫဎိၭဒီၪအဖၧၩ့ ကလီၩလၩ့ဘၪ ဆၧချဲၩ့မၪလူၬထွ့ၪလဖၪနီၪလီၫႉ

          ဘၪထွ့ၪလၧကဲၬၥလံၬ ဆၧအီၪကီၪ့အဂဲးအဖးလဖၪနီၪ ဘဲၫလံၬၥၭထံၭအၥိၭမွဲဂ့ၩႇ ဘဲၫလီၩ ပျၩ့ဖ့ၪနဲၪအခီၫပယီၫၥိၭမွဲဂ့ၩ ရၩလၩ့စိၩဝ့ၫဒၪနီၪလီၫႉ  လကၭဒံၭဘၪ နးၥၭအဂးန့ဂဲးန့ဘၭဝ့ၫဒၪ ဆၧ ၥၭထိၬပရၧၫ့လဖၪႇ ၦမံၩ့ဎိၩၥၪဖျီၪလဖၪအဆၧချဲၩ့လၧအလူဒိၪဎွ့ၩဒိၪလဖၪႇ အခီၫပယီၫယိၬဝ့ၫဒၪ လံၬဆံၫ့ဎံၫအဂဲးဆၧရၩလၩ့လဖၪႇ ၡၩအဆၧၥၭမၧၫ့လၧ ဖ့ၪပၧၩဂဲးဘၭန့ဝ့ၫလဖၪႇ ကိၭနံၩဒ့ၭဆၧလု ထၪ့မံဆၩဆံၫ့ဎံၫလဖၪဒဲ ဆၧဘၩဆိၪဖၪဆၧအဂဲးလဖၪနီၪ RVA Mobile Appယီၩ ရၩလၩ့စိၩဘၪ ဝ့ၫနီၪလီၫႉ

 ဆၧဝဲထၪ့RVA Mobile app ဆၧဎိၭထံၫဎိၭဒီၪနီၪ မွဲကရၩလၩ့စိၩဝ့ၫလၧ ခးပယၩ့ႇ ဝံးတခိၩ့ႇ St.Mary ကၥံၫဒရဲၫ Radio Veritas Asia Facebook Page အဖၫ့ခိၪနီၪလီၫႉ

နးအဲၪဖီၫဘွၩ