ခးပယၩ့ကဲၬၥလံၬၥၫ့ခိၪဒိၪခရၧၫ့ အၪ့ယၫထၪ့ဘၪဆၧအဂဲး

လၧအဖီၩ့ခွံၬလၩမ့ၫ၂၅ၥၫ့အိၩ ခးပယၩ့ကဲၬၥလံၬၥၫ့ခိၪဒိၪခရၧၫ့ ထုၬထၪ့လံၬ ဘၪထွ့ၪလၧ ဆၧဒုၭဆၧခၬအကၠီၩ့ ၦအဘၪလ့ၩအီၪဒုၩၥၭလၧ ဆၧဘိၪ့ဆၧဘၩလးဖၧၩ့လဖၪနီၪ ထီၩ့မၩနိၫ့မၩနၬဘၪ လဂ့ၩအဂးနီၪလီၫႉ

အဝ့ၫၥံၪထုၬထၪ့လံၬယီၩ ဆၧထိစိၩနီၪ မွဲလၧလၩမ့ၫ၂၃ၥၫ့ မုနၩအိၩ ပယၩ့ၥုၭဖိၪလဖၪခၭၡိၬ စူၪဝဲၩဖၭဒိၪလၧလွဲၫ့ကီၫ ကယၩ့ၥၫယၫၥရိၬအကၠီၩ့ ၦအလ့ၩဎဲၪ့အီၪအၥၭလၧၥရိၬဖၧၩ့အကျၩ ၦအဘၪ ၥံၫ၄ဂၩဒဲ ၦလၧအဘၪထံၭဘၪဆၫလဖၪအဂး ထိစိၩဝ့ၫနီၪလီၫႉ

ၦခမျၧးလဖၪယီၩနီၪ မွဲၦအၡၪ့အယၬဖိၪလဖၪလီၫႉ မွဲလၧကိၫဘံ၁၉ဆၧဆၫခီၫကမံၩ့ လၧဆၧဒုၭဆၧခၭအဂဲးခီၫကမံၩ့ အဝ့ၫၥံၪယီၩဘၪဒၪဆၧၫ့ယၫလၧ ဆၧကၪဆၧဂဲၩအၪမၬနီၪလီၫႉ လၧလၩမ့ၫ၂၃ၥၫ့မုနၩအိၩ ကယၩ့ၥၫယၫၥရိၬဖၧၩ့ၦလၧအဂဲၫဎဲၪ့အီၪၥၭလဖၪနီၪ လမွဲဘၪ ပဖီၪ့စူၪဝဲၩ လဖၪတၭ ဘဲၫကဖီၩ့ဖျ့ၭလၧဆၧမၩနၧၩ့မၩစၪအဂးနီၪ အဝ့ၫၥံၪဂဲၫဎဲၪ့အီၪအၥၭနီၪလီၫႉ လါနၫ့ နၥံၪခိၭ ခွံၬယၩ့ဖီးၥၪလဖၪ နၥံၪခၭၡိၭစိၩ စူၪဝဲၩဖၭဒိၪလဖၪအကၠီၩ့ ၦၡၩဘၪၥံၫဝ့ၫဒၪ၄ဂၩဒဲ ဘၪထံၭဘၪဆၫ ဝ့ၫဒၪ ၈ဂၩနီၪလီၫႉ

အီၪထးၦအဂူၪဂၩနီၪဘိၭ မုခံၭၥၫ့နၩဘၪလ့ၩအီၪၥူၫထဲၩ့ၥၭ လၧၡိၭကျၩနီၪလီၫႉ ၥွံၫထံၫလၧ အလၩ့ဆၩ့ထးၥရိၬဖၧၩ့လဖၪယီၩ လမွဲဘၪဒူၪဒၩအၥွံၫတၭ မွဲလၧပထၧၫ့ဖုဝဲလဖၪအၥွံၫထံၫလီၫႉ အဝ့ၫၥံၪဘၪၥံၫအကၠီၩ့ပဝ့ၫၥံၪလဖၪ ပၥၭအုၭဝ့ၫဒၪအၪမၬနီၪလီၫႉ ၥရိၬနီၪဂၭဂီၩ့ဝ့ၫဒၪအၪမၬအကၠီၩ့ ဆၧအယီၩပဒၪဘၪ ၦၡၩဘၩကၠဲၬအလးလဖၪမၬ ထၪ့ဒူၪဒၩဝ့ၫနီၪ အၧၩ့ၥၫ့ဝ့ၫနၭမၬလ့ၬယူၭနီၪလီၫႉ လကၭဒံၭဘၪ လၧလွဲၫ့ကီၫကကဲၩ့ခီၫ ဆၧဒုၭဆၧခၭအကၠီၩ့ ၦအဘၪစဲၪ့မံၩ့ဂၭဖျိၭအီၪထၪ့ဝ့ၫဒၪ ဖိၭဘိၭအဂၩ၂၀၀၀၀ယူၭအဂဲးႇ အဝ့ၫၥံၪအဂး ဆၧအၪ့ဆၧအီၩႇ ဆၧပိၭဆၧလၫ့ႇ ၥံၪ့ဎွံၪဖၭစၧၩ့လဖၪ လိၫဝ့ၫဒၪအဂဲးႇ ဆၧအဂဲးလဖၪယီၩနီၪ ထံၪခးဂူၪဂၩလၥ့ၪယၫဒံၭဘၪအဂဲးႇ ဆၧလၧ ဘၩယွၩလးႇ ဆၧမၩလိၪလးဒဲ ဆၧဆၫဂံၪ့လဖၪနီၪ မွဲဆၧအလးလၧဆၧဒူၩဆၧယၪ့အီၪဝ့ၫနီၪ ကြၨၭပထုၪ့လၩ့ကၠၭ ပၥၭအဂဲးႇ ၦၡၩအၪဒၪဆၧ ဘၪၥံၫဘၪဆၫဝ့ၫဒၪဒဲ ဘၪကဲၪထၪ့ၦအဘၪစဲၪ့မံၩ့ဂၭဖျိၭလဖၪအကၠီၩ့ ဆၧဘၪထွ့ၪ အီၪခရၧၫ့လဖၪ ဘဲၫၥိၭကအီၪပထုၬခွံၬ ဆၧတုၩ့ထၪ့တုၩ့လၩ့ယီၩအဂဲး ကွ့ၭလၩ့အၪ့ယၫ ထၬဝ့ၫနီၪလီၫႉ

လကၭဒံၭဘၪ ဆုးထဲၩ့ကွ့ၭလၩ့ထၬဝ့ၫ ပအၪ့ယၫထၪ့ဆၧယီၩနီၪ လမွဲဘၪဘဲၫ ၡၩအမၩထံၪ ဂဲးခးဂဲးလဖၪတၭ မွဲဒၪဘဲၫဆၧဘိၪ့ဆၧဘၩခိၪနါလဖၪအဆၧအၪ့ယၫထၪ့လီၫအဂဲး ဒဲ ခးပယၩ့ဖၧၩ့ ဘဲၫၥိၭဆၧဎူၫဆၧဎၩ့ကအီၪထၪ့ဖျဲၪဖျဲၪအဂး အၪ့ကံၩ့ဘၩဆိၪဖၪကၠၭဝ့ၫအဂဲးႇ ဘဲၫၥိၭပထဲၩ့အီၪထဲၩ့ ဘဲၫထၧၫ့ဖုဝဲၥိၭကန့ထၪ့ထဲၩ့အဂး ယိလါဝ့ၫအဂဲး ကွ့ၭလၩ့ထၬဝ့ၫနီၪလီၫႉ

နးအဲၪဖီၫဘွၩ