ဘၪထွ့ၪလၧ ကိုဗစ်ဆၧဆၫအကၠီၩ့ ခးအံၪ့ဒံၩယၩ ကဲၬၥလံၬဘိၪ့ခိၪၥၫ့ခၫ အဂၩ ၁၆၀ အၥၭဘၪၥံၫခွံၬအဂဲး

မုဆၫကနံၩယီၩ ခးအံၪ့ဒံၩယၩအဖၧၩ့  ဘၪထွ့ၪလၧ ကိုဗစ်ဆၧဆၫအကၠီၩ့ ကနံၩနီၪ ၦၡၩၥံၫဝ့ၫ ဒၪ ဖိၭဘိၭအဂၩ ၄၀၀၀နီၪလီၫႉ လၧအဖီၩ့ခွံၬ မု၅နွံၫအထးဖၧၩ့ ပၥ့ၪယၫဘၪ ကဲၬၥလံၬဘိၪ့ခိၪၥၫ့ခၫ အဂၩ၁၆၀နီၪ ဘၪၥံၫလၧဆၧဆၫယီၩနီၪလီၫႉ လၧအဂၩ၁၆၀အဖၧၩ့နီၪ ၥၫ့ခိၪဒိၪပၫထဲးဒံၭ ၃ဂၩဒံၭ အဂဲး ခးအံၪ့ဒံၩယၩကဲၬၥလံၬဆၧအီၪကီၪ့မဲၭကဇံၩ့ခိၪနါဒိၪ Fr.Suresh Mathew အဆၧလီၩၥ့ၪယၫ အဖၧၩ့ ပၥ့ၪယၫဘၪနီၪလီၫႉ

လၧခးအံၪ့ဒံၩယၩယအဖၧၩ့ ကဲၬၥလံၬဘိၪ့ခိၪၥၫ့ခၫ ထီးလူၬအီၪဝ့ၫဒၪ အဂၩ၃၀၀၀၀လီၫအကၠီၩ့ ကနံၩနီၪ ၥၫ့မုၥၫ့ခၫၥံၫဝ့ၫ ဖိၭဘိၭ၄ဂၩနီၪ မွဲဆၧအၪ့ယိၪခဲၫ့ကံၭ ကဲၪထၪ့ဝ့ၫအၪမၬနီၪလီၫႉ စၭထၪ့လၧ လၩဧပြီဖိၭဖၫ့အိၩ လၧအံၪ့ဒံၩယၩအဖၧၩ့ကနံၩနီၪ ကိုဗစ်ဘၪဂါၦၡၩအီၪဝ့ၫဒၪ ဖိၭဘိၭအဂၩ၃ကုၬဂီၩ့ ဆၧဆၫဂံၪ့လဖၪ ဒဲ ၥံၪ့ဎွံၪဖၭစၧၩ့လဖၪ လလၧၫ့ဘၪနီၪလီၫႉ လကၭဒံၭဘၪ ဘၪဎူထၪ့ၦၡၩအၥံၫစွၫ လဖၪအီၪအၪအကၠီၩ့ ၦၡၩဘၪခိၭလိၬၥၭအဂဲး ပၥ့ၪယၫဘၪနီၪလီၫႉ ဘဲၫယီၩနီၪဘိၭ ကနံၩနီၪ ၦၡၩၥံၫ အဂၩ၄၁၀၆ဂၩအဂဲး ဆၧဆီၪ့ဆၧချဲၫ့ဆၧမၩလး ဘိၭဘၪၥ့ၪယၫထၬဝ့ၫနီၪလီၫႉ

ၥၫ့မုၥၫ့ခၫအၪဒၪဆၧနီၪ လၧအခံၫ့ဂီၩဂီၩအဖၧၩ့ လထိးဘၠၩ့ဘၪဘၪၥၭအကၠၠီၩ့ အၥၭဘၪၥံၫဝ့ၫ ဒၪနီၪ Bishop.Gerald Almeida ယီၩ အၥၭလမုၬဘၪအဂဲး လီၩဝ့ၫနီၪလီၫႉ ၥၫ့မုၥၫ့ခၫလဖၪယီၩ ဖီၪ့ထၪ့ဖံၭထၪ့ကဆါယွၩအဆၧဖံၭဆၧမၩ လၧၡၩခမျၧးကျၩအထီ ဆၧဆၫဘၪဂါဝ့ၫအကၠီၩ့ ၥၫ့ခိၪဒိၪ ယီၩ ဝဲလၫ့ထၬအ့ၪၥၫ့မုၥၫ့ခၫႇ မံၭထၭမုၪႇ မံၭထၭခွၫလဖၪအဂး ကွၫရၫ့တံၩ့စၫ့တၫဂီၩ့ အ့ၪမွဲအဝ့ၫ ၥံၪအီၪလဆီၫ့ဘၪစွါဘဲၫ အၪ့မၧၫ့ထၬအဝ့ၫၥံၪ ၥိၫ့စိၩဆၧပရၧၫ့လၧ စၫ့တၫအဂဲး ၥၫ့ခိၪဒိၪယီၩလီၩၥ့ၪ ယၫဝ့ၫဒၪဘဲၫယီၩအၥိၭနီၪလီၫႉ

နးအဲၪဖီၫဘွၩ