ယ့ၫၡုၬမၩဘျၪထဲၩ့ ၦခံၫထူၬဆၫအၧၩ့လဂၩ

လၧကဆါဎရံၬဆၧအဲၪထံၩၥိၭမုခွၪထီးအလူၬၥံၪဧ့ႇ မုကနံၩယီၩ လံၬဆံၫ့ဎံၪဆၧၥၭထိၬပရၧၫ့နီၪ မွဲဝ့ၫဒၪ စမၫကၧၭ ကွ့ၭထၭဝ့ၫနီၪလီၫႉ လၧလံၬဆံၫ့ဎံၪဖၧၩ့ ပနါဂၫ့ဘၪ ယ့ၫၡုၬမၩဘျၪထဲၩ့ ၦခံၫထူၬဆၫအၧၩ့လဂၩအဂဲးနီၪလီၫႉ ”ၦအခံၫထူၬဆၫအၧၩ့လဂၩဂဲၫလၧအအီၪတၭ ချံၭလၩ့အခၪ့လၧအခၪ့ထံၭ အၪ့ကံၩ့အၪ့ယၫဝ့ၫႇ စံၭဝ့ၫဒၪ နၥၭအ့ၪအီၪလၧ နမိမၩဆံၫ့ထၪ့ထဲၩ့ယၧၩတၭ နမၩနဝ့ၫၥ့ၪလီၫႉ“ ယ့ၫၡုၭယၪ့ၥၭဝ့ၫတၭ ယူၬထၪ့အစူၪထိၭဘၪဝ့ၫတၭ စံၭဝ့ၫဒၪ ယၥၭအီၪမွဲနဆံၫ့ထၪ့ထဲၩ့ဆံၭႉ တၭအဆၧခံၫထူၭဆၫအၧၩ့ဒဲၪ့ထၪ့ခွံၭလၧ အလီၩ့ ချဲၫ့မၭတၭ ဆံၫ့ထၪ့ထဲၩ့ဝ့ၫလီၫႉ

အ့ၪမွဲပအၪ့ဎၬဆီၩ့မီၫ့ထဲၩ့ လံၬဆံၫ့ဎံၪယီၩစွါဘိၩႇ ၦအခံၫထူၬဆၫအၧၩ့လဂၩနီၪ အၪ့ကံၩအၪ့ယၫကဆါယ့ၫၡုၬလၧဆူနဲၩဒဲ အဆၧဆၪ့လၩ့ၥုၫ့ဆၪ့လၩ့ၥၭနီၪလီၫႉ အ့ၪမွဲဘဲၫနီၪ ဆၧဆူနဲၩဒဲဆၧဆၪ့လၩ့ၥုၫ့ဆၪ့လၩ့ၥၭနီၪ အကဲၩ့ဒိၪထုၬကမံၩ့နီၪလီၫႉ အ့ၪမွဲပအၪ့ကံၩအၪ့ယၫကဆါယ့ၫၡုၬလၧ ဆၧဆူနဲၩဒဲ ဆၧဆၪ့လၩ့ၥုၫ့ဆၪ့လၩ့ၥၭစွါဘိၩ ကဆါယ့ၫၡုၬနီၪ ဖ့ၫန့အ့ၪပၧၩနီၪလီၫႉ

မွဲဆိၪပနီ အဲၪကွံၩဘၪ ထၧၫ့ဖုဝဲမုခွၫထံၩၥိၭၥံၪဧ့ႇ မုကနံၩယီၩ လံၬဆံၫ့ဎံၪဆၧၥၭထိၬပရၧၫ့ယီၩ ၥီၪ့ထဲၩ့ၥၪ့ထဲၩ့ပၧၩ ပအၪ့ကံၩဘၩဆိၪဖၪလၧ ယွၩအီၪအခၫ ပကဘၪအၪ့ကံၩဘၩဆိၪဖၪလၧ ဆၧဆူနဲၩဒဲ ဆၧဆၫ့လၩ့ၥုၫ့ဆၫ့လၩ့ၥၭနီၪလီၫႉႉႉ