ဆၧအဲၪဆၧကွံၩအစီၩ့အမၩ့

ၦလအီၪဆီၪ့ဖိၪကဂၩ ကိၭၡါ ကဆါယ့ၫၡုၬႇ “နဇရ့ၭဖိၪယ့ၫၡုၬဧ့ႇ နကမိမၩပၧၩ မန့လဲၪႉ” နဂဲၫနီၪ နကမိမၩ ဂၭဂီၩ့ပၧၩနီၪဧၪႉ ဘၪဒၪခီၩ့ဆၧၫ့ယၫလၧ ဆၧဒူၪဆၧဒၩလါနၪ့ဂ့ၩႇ ယ့ၫၡုၬနီၪ ဒိၭဆၧၫ့ထဲၩ့ဝ့ၫလၧ ဆၧအဲၪလိဆူၭချဲၩ့နီၪအ့ၬလီၫႇ မွဲလါနၫ့ဂ့ၩ အဝ့ၫ မၩဘျၪထဲၩ့ အနၫ့ဆါလၧအဆၧအဲၪဆၧကွံၩနီၪလီၫႉ ၦခမျၧၩ့ၥံၪ ဒၪဘၪအနီအခၫစွါဘိၭ ထီၩမံၪထီၩမၪ့ဝ့ၫဂီၩတၭ စံၭဝ့ၫ “အယီၩနီၪ ဆၧၥီၪထဲၩ့ၥၪ့ထဲၩ့အၥၫ့ ဒဲအနီအလးခဲၫ့နီၪ အစီၩ့အမၩ့ပၫထဲးဝ့ၫဒၪနီၪလီၫႉ ပဎရံၬဖိၪအဂး ဆၧၥီၩ့ထဲၩ့ၥၫ့ထဲၩ့ယီၩနီၪ ပလီၩ့ဖိၭအခၫ စပွံၭၥၭၥၪခလုၭ ပကဘၪလီၩ့ဖိၭ ဒဲ အစီၩ့အမၩ့နီၪ မွဲကအီၪလၧပၧၩအဂး ကိၭထဲၩ့ပၧၩ့နီၪလီၫႉ ပဆၧရၫ ယ့ၫၡုၬနီၪ ဆၧစီၩ့ဆၧမၩ့နီၪဘိၩၥ့ၪလဲၩနီၪ ၥီၪထဲၩ့ၥၫ့ထဲၩ့ပၧၩဂီၩ့ႇ လၧဆၧစီၩ့ဆၧမၩ့နီၪ မွဲပကဘၪဖ့ၪန့အ့ၪ ဆၧအဲၪဆၧကွံၩ လၧၦအဂူၪဂၩၥံၪနီၪလီၫႇ ၦအဂူၪဂၩၥံၪနီၪ လၧခိၭနၫဘၪပၧၩလါနၫ့ဂ့ၩ မွဲပကဘၪ ဖ့ၪန့အ့ၪ ဆၧအဲၪဆၧကွံၩလီၫႉ ၦအဂူၪဂၩၥံၪ အဆၧဘၪမၪနီၪ အ့ၪမွဲပကွဲၪဖျါအခၫႇ အ့ၪမွဲ ပၥၫ့ဆၧၩ့ၥၭဆၧၩ့ပမိပဖါၥံၪအခၫႇ ပမ့ၬပနၫလဂံၪဘၪလါနၪ့ဂံၩ အ့ၪမွဲပဆၧနံမွံၫအီၪအခၫ မီၫ့ဂီၩ့ၥၪ ပၥၭမၧၫ့လၧ ဆၧစီၩ့ဆၧမၩ့နီၪလီၫႉ မုကနံၩယီၩ ၦဂူၪဂၩၥံၪ မွဲကန့ဘၪယွၩအဆၧအဲၪဆၧကွံၩဒဲအဆၧၥၭမၧၫ့အဂး ပကဒုၭနဲၪဖျီၫ့ထၫ့လၧပဆၧချဲၩ့ဒဲပဆၧမၩကိၭဂၩဒ့ၭလါဆံၭနဲၪႉ