SFX Srခရၧၫ့ ဂဲၫထဲၩ့ အီၪၥုၪ့လၩ့ၥၭ အနံၪ့အီၪထၪ့ဘၭဝ့ၫဒၪ ၁၂၅နံၪ့ယူၩဘလံၫအဂး ၥၫ့ဎွၩဖရၫ့စံ ၥိၫ့စိၩဝ့ၫဒၪ လံၬဆိၫ့ဂ့ၩဆိၫ့ဘွၩအဂဲး

နံၪ့၂၀၂၂နံၪ့ လၩဖ့ၫဘြူၫအ့ၫရံၫ၂ၥၫ့ လဂီၩ၆နၩရံၫခီၫအခံၫ့နီၪ ဘၪဆၧမၩလၩမၩဖၩ့ SFX Srခရၧၫ့ ဂဲၫထဲၩ့ အီၪၥုၪ့လၩ့ထၬၥၭ ထၪ့ဘၭ ၁၂၅နံၪ့ ယူၩဘလံၫနီၪလီၫႉ

ဆၧဎိၭထံၪဎိၭဒီၪနီၪ မၩလၩမၩဖၩ့ဝ့ၫဒၪလၧ ဒိၩ့ပၥံၫ့ဆၧအီၪကီၪ့ စံၫ့ပံတၧၫ့ကၥံၫဒရဲၫၥရိၬလးဝၩ့ဖၧၩ့နီၪလီၫႉ ၦလၧအလ့ၩခိၪလ့ၩနါမံဆၩဆၧလုထၪ့နီၪ မွဲဝ့ၫဒၪလၧ ပြည်ဆၧအီၪကီၪ့ Bp.Alexander  Pyone Cho  နီၪလီၫႉ

SFX Srခရၧၫ့အီၪၥုၪ့လၩ့ထၬၥၭ၁၂၅နံၪ့ ထၪ့ဘၭဝ့ၫဒၪ ယူၩဘလံၫအဂး ပအဲၪကွံၩယူၭယၪ့ဘၪ ၥၫ့ဎွၩဒိၪ ဖရၫစံၥိၫ့စိၩဘၪ လံၬဆိၫ့ဂ့ၩဆိၫ့ဘွၩနီၪလီၫႉ လၧလံၬဖၧၩ့နီၪ ၥၫ့ဎွၩကွ့ၭလၩ့ထၬဝ့ၫဒၪ ‘‘ Mother Maria ကြင်ဌေး ဒဲ SFX Srထီးလူၬဧ့ ကနံၩယီၩ နၥံၪအခရၧၫ့ ဂဲၫထဲၩ့အီၪၥုၪ့လၩ့ထၬအၥၭ ထၪ့ဘၭဝ့ၫဒၪ ၁၂၅နံၪ့ ယူၩဘလံၫအကၠီၩ့ ယဖ့ၪစိၩဘၪနၥံၪဆၧလၩဆၧဖၩ့ဒဲ ဆၧအၪ့ကံၩ့ဘၩဆိၪဖၪနီၪလီၫႉ ယၧၩဆ့လၧနၥံၪကၠၧၫ့ကၠၧၫ့ မွဲယစံၭခိးစၭတၩဘၪ ကဆါယွၩနီၪလီၫႉ နၥံၪအခရၧၫ့ယီၩနီၪ မွဲဝ့ၫဒၪ ၦလၧအဆံၭထုၬလဖၪအဂး လၧဆၧၡၪ့ၡၪ့ယၬယၬအဖၧၩ့ ယိထွ့ၪ မၩဆၧၩ့ဝ့ၫဒၪ ခရၧၫ့ကခရၧၫ့နီၪလီၫႉ လၧနၥံၪအယူၩဘလံၫ ဘိၪ့မုနံၩယီၩ မၩၥၫ့ထၪ့ထဲၩ့ နၥံၪလုထၪ့ထၬ ဆၧၥၭမၧၫ့ နီၪဂီၩ့ ဘဲၫနၥံၪအခရၧၫ့ဆၧထိထီၫ ကကၧၩ့ဖျိၪ့ထၪ့ၥၭလၧမိဆၧအီၪကီၪ့လၥွံၪဎးလယၪဎးအၥိၭ ခးပယၩ့ဖိၪလဖၪ အဂး လၧဆၧအဲၪဆၧကွံၩဖၧၩ့ နၥံၪကဖ့ၪဆၧၫ့လၩ့ၥၭအဂးနီၪဆ့ ယယိလါဝ့ၫလီၫႉ နၥံၪအခရၧၫ့ဖိၪထီးလူၬ  မွဲမိမၫရံၫကယိလၩ့ခွါလၩ့ဝ့ၫဒဲ St.Francis Xavier အဆၧဘၩဆိၪဖၪအဖၧၩ့ ယၥိၫ့စိၩဘၪ ယဆၧဆိၪဂ့ၩဆိၪဘွၩ လဖၪ လၧကဆါဎြံၬအဆၧဎူၫဆၧဎၩ့ဖၧၩ့နီၪလီၫႉ ထီးၥၭနၪ့အၪ့ကံၩ့ဘၩဆိၪဖၪယဂးလဂ့ၩအဂးနီၪဆ့ ယအၪ့ကံၩ့ အၪ့ယၫစိၩဘၪနၥံၪနီၪလီၫႉ’’

လကၭဒံၭဘၪ  ခးအ့ၩၡၩထၧၫ့ဒီၪ့ယၫ ကၫဒံၫနဲၫ Bp.Paul ချန်အင်နန်ဆ့ ၥိၫ့စိၩဘၪ လံၬဆိၫ့ဂ့ၩဆိၪဘွၩဆ့ နီၪလီၫႉ လၧလံၬဖၧၩ့နီၪ အဝ့ၫကွ့ၭလၩ့ထၬဝ့ၫဒၪ ‘ St. Francis Xavier Srခရၧၫ့ ဂဲၫထဲၩ့ၥုၪ့လၩ့ထၬအၥၭအနံၪ့ အီၪ ထၪ့ဘၭဝ့ၫ၁၂၅နံၪ့အကၠီၩ့ ယဖ့ၪလၩဖ့ၪဖၩ့ဘၪနၥံၪဒဲ ယအၪ့ကံၩ့ဘၩဆိၪဖၪအ့ၪနၥံၪအဂးနီၪလီၫႉ လၧနၥံၪအခရၧၫ့ အဂး ကဆါယွၩဖ့ၪလၫ့လၩ့ဘၪဆၧဆိၪဂ့ၩဆိၪဘွၩ ကိၭမံၩ့ဒ့ၭအဂးနီၪဆ့ လၧၥၫ့ဎွၩကၠၧၫ့ကၠၧၫ့ ယၧၩဆ့ ယစံၭခိးစံၭ တၩဘၪကဆါယွၩနီၪလီၫႉ မွဲမိမၫရံၫယိလၩ့ခွါလၩ့ဘၪနၥံၪအခရၧၫ့နီၪဆံၭႉ ခးပယၩ့ဆၧတုၩ့ထၪ့တုၩ့လၩ့ဖၧၩ့ ဘဲၫနၥံၪ ဆုးထဲၩ့ ဖီၪ့ထၪ့ဖံၭထၪ့ ယွၩအဆၧဖံၭဆၧမၩလဖၪကန့အဂးဒဲ ဘဲၫနၥံၪကဖီၩ့ဖျ့ၭလၧ ဆၧနိၫ့ဆၧနၬလဖၪအဂးဆ့ ယအၪ့ကံၩ့ဘၩဆိၪဖၪအ့ၪနၥံၪနီၪလီၫႉ’’

SFX Srခရၧၫ့ယီၩနီၪ စၭထၪ့လၧ၁၈၉၇နံၪ့အထီအိၩ ခးပြင်သစ်ဖိၪ Bp.Alexander Cardot ဂဲၫထဲၩ့မၩ ကဲၪထၪ့ထၬဝ့ၫဒၪဒဲ ထီးမုဆၫကနံၩယီနီၪ Srလဖၪ ထီးလူၬအီၪထၪ့ဝ့ၫဒၪ ဖိၭဘိၭ အဂၩ(၄၀၀ဘျဲၪ) ယူၭနီၪလီၫႉ

လၧ၁၂၅နံၪ့ထၪ့ဘၭ ယူၩဘလံၫမံဆၩဆၧလုထၪ့ဖၧၩ့ ၥၫ့ခိၪဒိၪ Bp.Joha Saw Yaw Han, Bp.စော နောဧ, Bp.Justin စောမင်းသိုက်, ဒဲ Bp.Alexandar ပြုံးချိုလဖၪ ဂဲၫဖ့ၪဂဲးဖ့ၪဘၭ မၩလၩမၩဖၩ့ကၠၭဝ့ၫအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ

နးအဲၪဖီၫဘွၩ

၂ႉ၂ႉ၂၀၂၂