SFX Sister လဖၪဒိၭန့ စ့ၩဘျံၭယူၩဘလံၫ

နံၪ့၂၀၂၃နံၪ့ လၩနိၫဝံၩ့ဘၧၫ၁၇ၥၫ့ လဂီၩ၆နၩရံၫခီၫအခံၫ့နီၪ SFX Sister လဖၪဒိၭန့ ၂၅နံၪ့စ့ၩဘျံၭယူၩဘလံၫဆၧထံၪလၩ့ဒီၪလၩ့အီၪဝ့ၫဒၪလၧ ဒိၩ့ပၥံၫ့ မယၩ့ခၠီၩ့ SFX Sister လဖၪအကၠီးဝးဖၧၩ့နီၪလီၫႉ

ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪလၧ ဒိၩ့ပၥံၫ့ဆၧအီၪကီၪ့ၥၫ့ခိၪဒိၪ Fr.Henry Mahn Eikhlein နီၪလီၫႉ ၦလၧအဒိၭန့ဘၪ စ့ၩဘျံၭယူၩဘလံၫအီၪဝ့ၫဒၪ ၈ဂၩအဖၧၩ့ ဂဲၫထၪ့ဒိၭန့ဝ့ၫ န့ Sister၆ဂၩနီၪလီၫႉ အဝ့ၫၥံၪနီၪ မွဲဝ့ၫဒၪ

Sr.Marie Celine Khin Than Htwe, Sr.Ritta Khin New, Sr.Mary Irene, Sr.Catherine Nan Than New, Sr.Cecilia San Yu Maw ဒဲ Sr.Marie Emerita Pu Tu Lay လဖၪ နီၪလီၫႉ

 ၥၫ့ခိၪဒိၪနီၪလီၩလၩ့လါလၩ့ဝ့ၫဒၪ “ယွၩအဆၧကိၭဒဲအဆၧရွံထၪ့နီၪ မွဲဆၧကဲၪထၪ့ၡူၭ လမွဲဘၪတၭ မွဲဒၪလၧ ယွၩအဆၧဎိၭထံၪဎိၭဒီၪ ဖၭဒိၪကမံၩ့နီၪလီၫႉ လၧနံၪ့ယီၩကလူၬထီ အီၪထးဝ့ၫဒၪလၩကဘံၪ့ဘျဲၪဘျဲၪဖိၪယီၩ ပၥိၭၥံၪလဖၪ မွဲပကဘၪမၩဆီၪ့ထၪ့ဆၧအၪ့ကံၩ့ဘၩဆိၪဖၪဆၧအဂဲးအဘၭနီၪလီၫႉ”

SFX Sister ခရၧၫ့ခိၪနါ မွဲဝ့ၫ Mother Ann Teresa နီၪစံၭဝ့ၫဒၪ "စံၭခိးစံၭတၩဘၪၥၫ့ခိၪဒဲ ၥၫ့မုၥၫ့ခၫၥံၪလဖၪႇ မံၭထၭမုၪမံၭထၭခွၫလဖၪ ဒဲ ၦလၧအဂဲၫမၩဆၧၩ့အဝ့ၫၥံၪ ၦလၧအဂဲၫမၩလၩမၩဖၩ့မံဆၩဆၧလုထၪ့ယီၩကိၭဂၩနီၪလီၫႉ ဂီၩ့နီၪ ဆုးထဲၩ့စံၭဘၪဝ့ၫ ကနံၪ့ယီၩ ၦလၧကဒိၭန့ဘၪယူၩဘလံၫနီၪအီၪဝ့ၫဒၪ ၈ဂၩလါနၫ့ ၂ဂၩနီၪ မွဲလၧကဘၪဂဲၫဆၧကၪဆၧဂဲၩအီၪအကၠီၩ့ ဂဲၫဝ့ၫလန့ဘၪအဂဲးႇ SFX Sister ခရၧၫ့ယီၩ ဂဲၫထဲၩ့အီၪၥုၪ့လၩ့အၥၭ အနံၪ့အီၪ ထၪ့ဘၭဝ့ၫဒၪ ၁၂၆နဲၪ့ဘျဲၪယူၭဂီၩ့ လၧဒိၩ့ပၥံၫ့ဆၧအီၪကီၪ့ ၁၆ဒီၪ့ဖၧၩ့အဝ့ၫၥံၪအခရၧၫ့ယီၩ လီၩ့ဖီၪ့ထၪ့ဖံၭထၪ့ယွၩ အဆၧဖံၭဆၧမၩအီၪဝ့ၫဒၪ ဆၧအီၪကီၪ့၁၃ဖၧၩ့အဂဲးႇ လၧထဲၩ့ထံၪခးႇ အီတလီထံၪခးႇ လၧအမ့ၫရံကၩဒဲ လၧဖံလံပဲၫ့ထံၪခးဖၧၩ့ဆ့ လ့ၩဖီၪ့ထၪ့ဖံၭထၪ့ ယွၩအဆၧဖံၭဆၧမၩအီၪဝ့ၫဒၪအဂဲးႇ ထီးမုဆၫကနံၩယီၩ အဝ့ၫ ၥံၪအခရၧၫ့ဖိၪထီးလူၬအီၪဝ့ၫဒၪ Sister အဂၩ၄၅၀အဂဲးႇ ကနံၪ့ယီၩအထးဖၧၩ့ Sister လၧအဒိၭန့ လိးဘွၩ ယူၩဘလံၫအီၪဝ့ၫဒၪ ၄ဂၩႇ ၦလၧအဒိၭန့ဘၪထီၫ့ယူၩဘလံၫဒဲ ကနံၩယီၩၦလၧအဒိၭန့ဘၪ ၂၅နံၪ့စ့ၩဘျံၭယူၩ ဘလံၫအီၪဝ့ၫဒၪ ၆ဂၩဒီၭအကၠီၩ့ ၂၀၂၃နံၪ့ယီၩနီၪ မွဲလၧအဝ့ၫၥံၪအခရၧၫ့အဂး နံၪ့လၩ့ဆၫ့ကနံၪ့အဂဲးႇ အဝ့ၫ ၥံၪSisterလဖၪယီၩနီၪ စၭထၪ့လၧအၥၭဘၪ့ဘၪ့ ထီၩ့အၥၭၡါထၪ့အထီ အ့ၪမွဲအဝ့ၫၥံၪလ့ၩဆၧထဲၩ့ ဆၧလ နၧၩ့လၧၩ့ဘၪ ဆၧဆီၪ့ဆၧချဲၩ့လဂ့ၩလၧၩ့ဘၪ ချဲၩ့လၥ့ၪလၧၩ့ဘၪစွါဘဲၫ အဝ့ၫၥံၪယီၩ လၧအၥုၪ့အၥၭ ကၧၩ့ဖျိၪ့ အၥၭလၧကဆါယွၩဂီၩ့ လၧဆၧဘၩဆိၪဖၪဆၧဖၧၩ့ ဆုးထဲၩ့ဖီၪ့ထၪ့ဖံၭထၪ့ယွၩ အဆၧဖံၭဆၧမၩထၧၩ့အၥံၫအ ၡါအဂဲးႇ မွဲလၧၥၫ့ခိၪဒိၪဒဲ ၥၫ့မုၥၫ့ခၫၥံၪအဆၧလ့ၩခိၪလ့ၩနါဖၧၩ့ Sisterလဖၪယီၩ လၧဆၧအီၪကီၪ့လဖၪ အဖၧၩ့ ဘဲၫကျ့ၭစၨၭခိးဂဲးခိးဘၭကၠၭႇ ကျ့ၭစၨၭမၩၥၫ့ထၪ့ထဲၩ့ နၥံၪအၥၭအဂးဆ့ Mother Annယီၩ စံၭ ဝ့ၫဒၪဘဲၫယီၩအၥိၭနီၪလီၫႉ

မံဆၩဆၧလုထၪ့ဂီၩ့ဝ့ၫကထံၪဎး ၦၡၩဆုးထဲၩ့ မၩလၩမၩဖၩ့ Sisterလၧ အဒိၭန့ဘၪ စ့ၩဘျံၭယူၩဘ လံၫလဖၪနီၪ လၧဆၧထံၪလၩ့ဒီၪလၩ့ကဆံၭကခ့ၭနီၪလီၫႉ မံဆၩဆၧလုထၪ့အဖၧၩ့ ထီးလူၬၦၡၩဂဲၫထၪ့ဝ့ၫဒၪ ကအီၪဖိၭအဂၩ၁၅၀ဆါဆါအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ

နးအဲၪဖီၫဘွၩ