SFX Sisterလဖၪ ဒိၭန့ ဆၧအုၩ့လၩ့အဆိၪထုၬ ဒဲ ဆၧအုၩ့လၩ့လဆိၩယၫအဂဲး

နံၪ့၂၀၂၄နံၪ့ လၩဖ့ၫဘြူအ့ၫရံၫ(၁)ၥၫ့ လဂီၩ၆နၩရံၫအခံၫ့နီၪ SFX Sisterလဖၪဒိၭန့ ဆၧအုၩ့လၩ့ အဆိၪထုၬ ဒဲ ဆၧအုၩ့လၩ့လဆိၩယၫ ဆၧထံၪလၩ့ဒီၪလၩ့အီၪဝ့ၫဒၪလၧ ဒိၩ့ပၥံၫ့ St.Peter ၥရိၬဖၧၩ့နီၪလီၫႉ

ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪလၧ ဒိၩ့ပၥံၫ့ဆၧအီၪကီၪ့ၥၫ့ခိၪဒိၪ Bp.Henry Mahn Eikhlein ဒဲ ၦလၧအလီၩလၩ့လါလၩ့ဆၧၥၭထိၬပရၧၫ့နီၪ မွဲလၧ မော်လမြိုင် ဆၧအီၪကီၪ့ ၥၫ့ခိၪဒိၪ မောရစ်ညွန့်ဝေနီၪလီၫႉ ၦလၧအဒိၭန့ဘၪ ဆၧအုၩ့လၩ့အဆိၪထုၬလဖၪနီၪ  မွဲဝ့ၫဒၪ

Sr.မေရီကလဲနန့်ကြူကြူမွှေး, Sr.ဂျူစတီးနားနော်လဲ့ယဉ်မွန်, Sr.လူစီယားနွမ်လဲဂျာခိုင်, ဒဲ Sr.ဧလိဇဘက်ဂျမန်ခါးရာ လဖၪနီၪလီၫႉ ၦလၧအဒိၭန့ဘၪ ဆၧအုၩ့လၩ့လဆိၩယၫလဖၪနီၪမွဲဝ့ၫဒၪ စစ္စတာရ်ရိုစလင်းခင်မိုးသွင်, စစ္စတာရ်မူပီးယာ, စစ္စတာရ်ရိုဇားလိမာ, စစ္စတာရ်မာရီးယားဂေါ်ရက်တီ, စစ္စတာရ်အယ်နီမင်းမင်းသန့်, စစ္စတာရ်မေရီးအန်းစုလတ်ထွေး, စစ္စတာရ်မာရီစလင်း ကြည်ပြာလင်း ဒဲ စစ္စတာရ်နော်ကလဲ လဖၪနီၪလီၫႉ

ၥၫ့ခိၪဒိၪမောရစ်ညွန့်ဝေနီၪ လီၩလၩ့လါလၩ့ဝ့ၫဒၪ “ပကဆါယွၩနီၪ မွဲလၧအဂ့ၩဒိၪထုၬအကၠီၩ့ ပက ဘၪဖ့ၪဆၧၫ့လၩ့ထဲၩ့ပၥၭလၧအဝ့ၫအဂးနီၪ ကဘၪမွဲဝ့ၫဒၪအဂ့ၩဒိၪထုၬလဖၪနီၪလီၫႉ ၥၫ့မုၥၫ့ခၫဒဲ မံၭထၭမုၪ မံၭထၭခွၫလဖၪနီၪ မွဲပကဘၪလုထၪ့ပၥၭလၧကဆါယွၩအီၪ ပနးခီၫ့ဒဲနးၥၭဆံၫ့ဆံၫ့ဎံၪဎံၪအဖၧၩ့နီၪလီၫႉ အဆံၫ့ဎံၪထုၬကဆါယွၩအဂး    ပဘၪဖ့ၪဆၧၫ့ထဲၩ့အဆံၫ့ဎံၪထုၬနီၪလီၫႉ ဆၧနီၪအကၠီၩ့အဝ့ၫၥံၪယီၩ ဘၪအုၩ့လၩ့ဆၧဆံၫ့ဆၧဎံၪအဆၧအုၩ့လၩ့ လၧယွၩမ့ၬယၪဒဲ ၦၡၩအမ့ၬယၪနီၪလီၫႉ လကၭဘၪအဝ့ၫၥံၪယီၩ ဂၭဎ့ၬခွံၬ ဆၧဒၩ့ဂံၪ့ဒၩ့ဎၫ့ဖၧၩ့ၥၭနီၪဂီၩ့ ဂဲၫရွံထၪ့မံၭထၭမုၪအဆၧၥၭမၧၫ့ လၧၦမုၪနၩ့ၥံၫ့ဆ့ၬဖၧၩ့ၥၭယီၩနီၪလီၫႉ ဆၧဒၩ့ဂံၪ့ဒၩ့ဎၫ့နီၪလဂ့ၩဘၪအကၠီၩ့မွဲအ့ၬ အဝ့ၫၥံၪယီၩအဲၪဆၧလၥ့ၪဘၪဆ့မွဲအ့ၬ အဲၪဆၧၥ့ၪနါလၨၪအကၠီၩ့ ခီၫခီၫကအဲၪၦၡၩလဂၩဎး ဒဲ ဂံၪ့ဒီၪ့ကဖျိၪ့ဎးအလးနီၪ အဝ့ၫၥံၪယီၩ ရွံထၪ့ဝ့ၫဒၪလၧ ကအဲၪဘၪကဆါယွၩဒဲ ယွၩအဖိၪအလံၩလဖၪအဂးနီၪ အဝ့ၫၥံၪဖ့ၪဆၧၫ့လၩ့ကၠၭ အဆၧၥၭမၧၫ့နီၪလီၫႉ ဆၧၥၭမၧၫ့အယီၩနီၪ ဆၧၥၭအုၭလဖၪ ဆၧကၪဆၧဂဲၩလဖၪကအီၪဝ့ၫဒၪတၡါနီၪလီၫႉ ဆၧကၪဆၧဂဲၩဒဲဆၧၥၭအုၭလဖၪယီၩနီၪ မွဲမၩလၧၫ့ဎွ့ၩထၪ့ ပလုထၪ့ထၬပဆၧၥၭမၧၫ့ယီၩနီၪလီၫႉ အ့ၪမွဲပထိးဆၫပၥၭနၧၩ့မၬ ပကန့ဘၪဆၧအဂ့ၩအဘွၩလဖၪတၭ ဘဲၫကဆါယွၩ အဆၧထိးထဲၩ့တၩ့ထဲၩ့ၦၡၩအၥိၭ ၥၫ့မုၥၫ့ခၫ မံၭထၭမုၪ မံၭထၭခွၫလဖၪ အဆၧၥၭမၧၫ့ယီၩနးဆ့ မွဲပကဘၪယိဒီၩ့ကဆါယွၩဂီၩ့ ကဘၪထိးထဲၩ့တၩ့ထဲၩ့ၦၡၩအဂးအဂဲး ၥၫ့ခိၪဒိၪယီၩ လီၩလၩ့လါလၩ့ဆၧၥၭထိၬပရၧၫ့ ဘဲၫယီၩအၥိၭနီၪလီၫႉ”

SFX Sister ခရၧၫ့ခိၪနါ မွဲဝ့ၫ Mother Ann Teresa နီၪစံၭဝ့ၫဒၪ စံၭခိးစံၭတၩဘၪၥၫ့ခိၪလဖၪဒဲ ၥၫ့မုၥၫ့ခၫၥံၪလဖၪႇ မံၭထၭမုၪမံၭထၭခွၫလဖၪ ဒဲ ၦလၧအဂဲၫမၩဆၧၩ့အဝ့ၫၥံၪကိၭဂၩနီၪလီၫႉ ဂီၩ့နီၪ ဆုးထဲၩ့စံၭဘၪဝ့ၫ SFX Sister ခရၧၫ့ယီၩ ဂဲၫထဲၩ့အီၪၥုၪ့လၩ့အၥၭ အနံၪ့အီၪထၪ့ဘၭဝ့ၫဒၪ ၁၂၆နဲၪ့ဘျဲၪယူၭဂီၩ့ လၧဒိၩ့ပၥံၫ့ဆၧအီၪကီၪ့၁၆ဒီၪ့ဖၧၩ့ အဝ့ၫၥံၪအခရၧၫ့ယီၩ လီၩ့ဖီၪ့ထၪ့ဖံၭထၪ့ ယွၩအဆၧဖံၭဆၧမၩအီၪဝ့ၫဒၪ ဆၧအီၪကီၪ့၁၃ဒီၪ့ဖၧၩ့အဂဲးႇ လၧထဲၩ့ထံၪခးႇ အီတလီထံၪခးႇ လၧအမ့ၫရံကၩဒဲ လၧဖံလံပဲၫ့ထံၪခးဖၧၩ့ဆ့ လ့ၩဖီၪ့ထၪ့ဖံၭထၪ့ ယွၩအဆၧဖံၭဆၧမၩအီၪဝ့ၫဒၪအဂဲးႇ ထီးမုဆၫကနံၩယီၩ အဝ့ၫၥံၪ အခရၧၫ့ဖိၪထီးလူၬ အီၪဝ့ၫဒၪ Sister အဂၩ၄၅၀အဂဲး Mother Ann Teresa ယီၩ စံၭဝ့ၫဒၪဘဲၫယီၩအၥိၭနီၪလီၫႉ

ဂီၩ့ ၦလၧအဒိၭန့ထၪ့ ဆၧအုၩ့လၩ့လဆိၩယၫလဂၩမွဲဝ့ၫ စစ္စတာရ် နော်ကလဲ မေပုလဲစိုး နီၪ ဆုးထဲၩ့ချဲၩ့လၩ့ ဆၧစံၭခိးစံၭတၩဆၧချဲၩ့လဖၪနီၪလီၫႉ ဆၧမၩလၩမၩဖၩ့ ဆၧဒိၭန့ဆၧအုၩ့လၩ့လဖၪ မံဆၩဆၧလုထၪ့နီၪ ဂီၩ့ခွံၬဝ့ၫဒၪလၧ လဂီၩ၉နၩရံၫအဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ

1.2.2024