SFX မံၭထၭမုၪ၅ဂၩ ထိးဆၧၫ့ဒိၭန့ယူၩဘလံၫအဂဲး

နံၪ့၂၀၂၂နံၪ့ လၩအီၭတိၫဘၧၫ၂၄ၥၫ့နီၪ SFX မံၭထၭမုၪလဖၪ ဒိၭန့ထီၫ့ယူၩဘလံၫဒဲ မနံၬဘွၩယူၩဘလံၫ လၧဝံးပၥံၫ့ St.Maryၥရိၬ(အိမ်ြကီး)လးဝၩ့ဖၧၩ့နီၪလီၫႉ
ၦလၧအဒိၭန့ယူၩဘလံၫ မံၭထၭမုၪလဖၪနီၪ မွဲဝ့ၫဒၪ အီၪလၧမီၠၩ့မၠၭဆၧအီၪကီၪ့ ကတက်ကွင်းတဝၫ့ Sr.‌Mary ဂျူဒစ်, အီၪလၧထန်းပင်ကုန်းဆၧအီၪကီၪ့ Sr.Maryဂျိမ်း, အီၪလၧဖျာပုံ ဇလပ်ကုန်းတဝၫ့ Sr.Maryဂျေနိုဘစ်ချို, အီၪလၧ မအူပင် Thapaytanတဝၫ့ Sr.Mary Lylia, ဒဲ အီၪလၧသုံးဆယ်ဆၧအီၪကီၪ့ Sr.ဖီလိုမီနားအိုင်ဒါ လဖၪနီၪ လီၫႉ
“ထိးဆၧၫ့ဒိၭန့ဘၪကဆါယွၩ အဆၧဆိၪဂ့ၩဆိၪဘွၩလဖၪအဂး စံၭခိးစံၭတၩကဆါယွၩအဂဲးႇ မွဲလၧကဆါယွၩ အ ဆၧယိထဲၩ့ခွါထဲၩ့အကၠီၩ့ ထိးဆၧၫ့ဒိၭန့ဘၪ နံၪ့၆၀အီၪထၪ့ဘၭ ယူၩဘလံၫအဂဲးႇ ကဲၪထၪ့မံၭထၭမုၪအနံၪ့၆၀ဖၧၩ့ ဖိၭဘိၭ အနံၪ့၅၀နီၪ ဘၪလီၩ့လၩ့လၧ ဒိၩ့ပၥံၫ့ဆၧအီၪကီၪ့ထၧၫ့ဘံၪ့ယၫဖၧၩ့ လၧဆၧအီၪကီၪ့လဖၪကိၭဒီၪ့ဒ့ၭအကၠီၩ့ လၧဒိၩ့ပၥံၫ့ ဆၧအီၪကီၪ့ဖၭဒိၪဖၧၩ့ အဝ့ၫလလၩ့ယံၩယါဘၪဆၧအီၪကီၪ့ မွဲလအီၪဘၪအဂဲးႇ ဆၧနီၪအကၠီၩ့အဝ့ၫအၥၭဎွံၪဝ့ၫအဂဲးႇ မွဲလၧ ကဆါယွၩ အဆၧဆိၪဂ့ၩဆိၪဘွၩအဖၧၩ့ အၥၭမၧၫ့ဘၪဘိၩ့ဒံၭနီၪ စံၭခိးစံၭတၩဘၪကဆါယွၩအဂဲး” ၦအထိးဆၧၫ့ဒိၭန့ဘၪ မနံၬဘွၩယူၩဘလံၫလဂၩမွဲဝ့ၫ Sr.Mary Lylia နီၪ စံၭဘၪဝ့ၫလီၫႉ
“စၭထၪ့လၧ ယကဲၪထၪ့မံၭထၭမုၪဂီၩ့အထီနီၪ တခၩယကလ့ၩလၧအလးနးစီၪ့ တခၩယကမၩဆၧနးမံၩ့နီၪ ယအီၪ က့ၪထၬ ဆၧဆူနဲၩလၧယွၩ ယဒုၭနဲၩ့ၥၭလၧယွၩ လၧယနဲၩ့နီၪ အီၪဒၪယွၩလီၫႉ ယၧၩဒၪယၧၩနီၪ ယၥ့ၪယၫဆၧနးမံၩ့အ့ၬ ယမၩ ဆၧၥ့ၪနးမံၩ့အ့ၬ ထီးဘဲၫယီၩ ယၥၭအီၪ၈၆နံၪ့ ဆၧကဲၪထၪ့မံၭထၭမုၪအနံၪ့အီၪထၪ့ဘၭ ၆၂နံၪ့ ယဒိၭန့ထၪ့ဘၪ စ့ၩဘျံၭယူၩ ဘလံၫယီၩကကၠၪ ကဆါယွၩယိလၩ့ခွါလၩ့ယၧၩအကၠီၩ့ ယစံၭခိးစံၭတၩဘၪကဆါယွၩဒိၪဒိၪဒ့ၭလီၫႉ စၭထၪ့လၧယဆံၭဆံၭ အထီအိၩ ယမိယဖါမွဲလအီၪလၧၩ့ဘၪအကၠီၩ့ ယဖၪထံဂဲၫဖ့ၪအီၪယၧၩလၧ ဝံးမၠီၩ့မၠၭဘီၫဒၫနီၪလီၫႉ အခံၫ့နီၪဒၪအိၩ ယၧၩယီၩ ယလမွဲဒံၭဘၪ ဎြံၬဖိၪကဂၩဒဲ ယမွဲဒၪၦဘူၭဒၭဖိၪကဂၩဒံၭလီၫႉ နံၪ့၁၉၅၂နံၪ့အထီနီၪမၬ ယထၪ့ဆၧမၩလိၪလၧ မၠီၩ့မၠၭဘီၫ ဒၫအထီမၬ ယဒိၭန့ဆၧၥူၫဝၭဆံၫ့ဎံၫမၬဆံၭႉ ဂီၩ့၁၉၅၅နံၪ့နီၪ ယကဘၪထၪ့၇ဖၨၪအခၫ ယဘၪဂဲၫထၪ့ ဆၧမၩလိၪလၧ ဝံးပၥံၫ့ယီၩနီၪလီၫႉ လၧယအီၪဒၪလၧ မၠီၩ့မၠၭဘီၫဒၫအထီအိၩ ယဒၪဘၪ ထံၪယဲၩ့ခးယဲၩ့မံၭထၭမုၪလဖၪ ဂဲၫၥီၪ့အ့ၪပၧၩလံၬ အခၫ ယမိကဲၪမံၭထၭမုၪယၥၭဂဲၫအီၪထၪ့အကၠီၩ့ ယရွံထၪ့မံၭထၭမုၪ အဆၧၥၭမၧၫ့နီၪလီၫႉ အနီၪအခၫ ယဖၪထံနီၪ ယ၇ဖၨၪဖျီၫ့ဂီၩ့အခၫ မုလါဝ့ၫလၧယစဲၪလၫ့မၩဆၧမၩ လါနၫ့ ယၧၩဝ့ၫယရွံထၪ့ယကကဲၪမံၭထၭမုၪအကၠီၩ့ ယဖၪထံနီၪ ၥၭထၪ့ယၧၩဂီၩ့ ဖ့ၪလၫ့အ့ၪယၧၩ ကျိၪစ့ၩနးဘၭလၧၩ့အ့ၬအဂဲး" Sr.Mary ဂျူဒစ် စံၭဝ့ၫဒၪဘဲၫနီၪလီၫႉ
“ယကဲၪထၪ့ မံၭထၭမုၪအနံၪ့ အီၪထၪ့ဘၭဝ့ၫဒၪ၅၀ဒဲ လၧဆၧလကြၨၭဘၪအဖၧၩ့ ယထိးဆၧၫ့ဒိၭန့ဘၪ ယူၩဘလံၫ အကၠီၩ့ အဆိၪထုၬ ယစံၭခိးစံၭတၩဘၪ ကဆါယွၩ ဒဲ ယစံၭခိးစံၭတၩဘၪ ပခရၧၫ့အခိၪနါလဖၪနီၪလီၫႉ စၭထၪ့လၧယ ကဲၪထၪ့ မံၭထၭမုၪအထီနီၪ ယအုၩ့လၩ့ထၬယၥၭ တခၩကဆါယွၩ ကၥိၫ့ယၧၩလၧဆၧအလးနးစီၪ့ မွဲယကလ့ၩ နီၪလီၫႉ ယကဲၪထၪ့မံၭထၭမုၪဂီၩ့ မွဲလၧၥၫ့ခိၪဒိၪ ဂေးဗြဲလ် မန်းသို‌ေဟး အဆၧကိၭဖံၭၥိၭအဖၧၩ့ ယဘၪဖီၪ့ထၪ့ဖံၭထၪ့ဆၧဖံၭဆၧမၩ လၧ RVAဖျိၩ့ၡၩ့ အဆၧရၩလၩ့ဖၧၩ့ ၂ဘျၩ့နီၪလီၫႉ နံၫဘျၩ့နီၪ ယံၭဝ့ၫဖိၭဘိၭ ၁၄နံၪ့နီၪလီၫႉ ယမၩဆၧမၩလၧ RVA Philippin e အထီအိၩ ၥၫ့ဎွၩJohn Paul 2 နီၪ ဂဲၫစိၩလၧ Philippines အခၫစံၭဝ့ၫ RVA ယီၩနီၪ ကဘၪထဲၩ့အီၪမၧၫ့ၥၭ လဆိၩ ယၫဒဲ ဂၭဂီၩ့ဆိၫ့ခွံၬဘၪအ့ၬအဂဲး အဝ့ၫစံၭထၬဝ့ၫနီၪလီၫႉ ဆၧနီၪအကၠီၩ့ RVA အဆၧဖံၭဆၧမၩလဖၪနီၪ ဘဲၫယီၩယလ ဘၪဖီၪ့ထၪ့ဖံၭထၪ့လၧၩ့ဘၪလါနၫ့ ဘဲၫအဝ့ၫၥံၪအဆၧဖံၭဆၧမၩလဖၪ ကလ့ၩထၪ့လ့ၩထီၫဝ့ၫလဆိၩယၪအဂး ဘဲၫကဆါ ယွၩ ကဆိၪဂ့ၩဆိၪဘွၩလၩ့အဂးနီၪ ယအၪ့ကံၩ့ဘၩဆိၪဖၪအ့ၪကိကၠၪလီၫႉ လၩ့ဆၫ့ဝ့ၫဒၪကမံၩ့နီၪ စၭထၪ့လၧအဝ့ၫကဲၪ ထၪ့ မံၭထၭမုၪဂီၩ့အခၫ အီၪလဆီၪ့ဘၪဘနီၪ အီၪနးကၠၪအ့ၬ လါနၫ့စၭထၪ့လၧအဝ့ၫအၥၭအီၪ ၇၆နံၪ့အထီနီၪမၬ လံၩ အဆၧဆၫယီၩ စၭထၪ့ဘၪအဝ့ၫအဂဲး” Sr. မေရီဂျေနိုဗစ်နီၪ စံၭဘၪRVA ဘဲၫယီၩအၥိၭနီၪလီၫႉ
ၦအလ့ၩခိၪလ့ၩနါမံဆၩဆၧလုထၪ့နီၪ မွဲဝ့ၫဒၪလၧ Fr.Henry အဲၪချံၫ့ဒဲ အဝ့ၫယီၩ စံၭဝ့ၫဒၪ “လၧနၥံၪဂဲၫထဲၩ့ကဲၪ ထၪ့ မံၭထၭမုၪအနံၪ့ ၅၀ႇ၆၀အထးဖၧၩ့ နၥံၪဂဲၫထဲၩ့ ဖ့ၪနဲၪနၥံၪအဆၧအုၩ့လၩ့ဂုးခၧၫ့အဂဲးလၧနၥံၪအဆၧဖံၭဆၧမၩဖၧၩ့ နီၪလီၫႉ ကနံၩယီၩနၥံၪဂဲၫထဲၩ့ စံၭခိးစံၭတၩထဲၩ့ယွၩနီၪလီၫႉ ဆၧစံၭထၪ့အၪ့အူၭယွၩနီၪ ကဘျၩ့ကကၠၪလီၫ ဂီၩ့ခွံၬလမွဲဘၪ တၭ မုကိနံၩဒ့ၭအဖၧၩ့ မွဲပကဘၪ စံၭခိးစံၭတၩ စံၭထၪ့အၪ့အူၭယွၩနီၪလီၫႉ ယူၩဘလံၫနီၪမွဲဝ့ၫလၧ ဆၧၥုၪ့ဎွံၪၥၭယီၫ, ဆၧၥုၪ့ဎွံၪၥၭယီၫနီၪ မွဲလၧဆၧဖီၩ့ဖျ့ၭနီၪလီၫႉ ၦအၥၭအုၭဝ့ၫလဖၪနီၪ မွဲဆၧမုၬလၩၥၭဎွံၪအီၪန့အ့ၬႉ ဆၧနီၪအကၠီၩ့ ၦအအီၪ ဝ့ၫလၧယီၩလဖၪနီၪ ဘဲၫကပၫထဲးဎုၬလၧ ကဆါယွၩအဆၧဖီၩ့ဖျ့ၭထၪ့အဂး မွဲပကဘၪဆုးထဲၩ့ စံၭထၪ့အၪ့အူၭကဆါယွၩ မွဲပကဆုးထဲၩ့ စံၭခိးစံၭတၩကဆါယွၩ ကိၭဒံၩကိၭဂၩဒ့ၭလါဆံၭႉ”
နးအဲၪဖီၫဘွၩ