RVA Myanmar Service ဝဲထၪ့ထဲၩ့ Studio အၥၫ့အဂဲး

           လၧနံၪ့၂၀၂၂နံၪ့ လၩဒံၫဇဲၩ့ဘၧၫ၇ၥၫ့အဂၫလၩ့၄နၩရံၫခီၫအခံၫ့နီၪ မန္တလေးကၭၥလံၬဆၧအီၪကီၪ့ ၥၫ့ခိၪဒိၪမာကုတင် ဝင်း ဆိၪဂ့ၩဆိၪဘွၩဘၪ RVA Myanmar Service Studio အၥၫ့အဂဲး ပၥ့ၪယၫဘၪနီၪလီၫႉ

          ဂီၩ့လၧ၅နၩရံၫအခံၫ့နီၪ ကနံၪ့အထးဖၧၩ့ RVA Myanmar ခရၧၫ့ဖိၪၥံၪလဖၪ ဂဲၫထဲၩ့ဒိၭန့ထၬဘၪ ဆၧဆိၪဂ့ၩဆိၪဘွၩ လၧကဆါယွၩအအီၪလဖၪအဂး စံၭခိးစံၭတၩထဲၩ့ကဆါယွၩဂီၩ့  ၦလၧအဂဲၫထဲၩ့ဖ့ၪဂဲးဖ့ၪဘၭမၩဆၧၩ့ အဝ့ၫၥံၪလဖၪထီးလူၬအ ဂး အၪ့ကံၩ့ဘၩဆိၪဖၪအ့ၪဝ့ၫလၧ မံဆၩဆၧလုထၪ့နီၪလီၫႉ

         “ပဝ့ၫၥံၪယီၩ မွဲဝ့ၫဒၪၦမၩဆၧဖိၪလၧဆၧအီၪကီၪ့အဂးလဖၪတၭ ၦဎြံၬဖိၪမိဆၧအီၪကီၪ့အလူဒိၪဎွ့ၩဒိၪ လၩ့မါလန့ဘၪ အဂဲးအဖးလဖၪႇ ကဆါယွၩအဂဲးအဖးလဖၪနီၪ မွဲပလီၩလၩ့လါလၩ့န့ဝ့ၫဒၪလီၫႉ  ပဝ့ၫၥံၪယီၩ ကဆါယွၩအဆၧၥၭထိၬပရၧၫ့ဒဲ အဆၧၥၭမၧၫ့အဂဲးအဖးလဖၪနီၪ မွဲပဘၪလီၩဖျီၪထၪ့လၧပနိၭႇ ပခိၪနူၬ ဒဲ ပဆၧအီၪမၧၫ့လ့ၩထဲၩ့ဖၧၩ့အကၠီၩ့ ၦလၧအဂဲၫထဲၩ့ ဖီၪ့ထၪ့ဖံၭထၪ့ဆၧဖံၭဆၧမၩလၧ RVA Myanmar Service ဖၧၩ့လဖၪထီးလူၬဒဲ ၦလၧအဂဲၫထဲၩ့ဖ့ၪဂဲးဖ့ၪဘၭ RVA Myanmar ၦၡၩထီးလူၬနီၪ ယစံၭခိးစံၭတၩဘၪလီၫအဂဲး” ၥၫ့ခိၪဒိၪ Bp.မာကုတင်ဝင်းနီၪ စံၭဝ့ၫဒၪလီၫႉ

        မံဆၩဆၧလုထၪ့ဂီၩ့ဝ့ၫဒၪကကၠၪ RVA Myanmar Service ခိၪနါလဂၩမွဲဝ့ၫ Sr.Lucia Thandar Ag နီၪ စံၭဘၪဝ့ၫ ဘဲၫStudioယီၩကအီၪထၪ့အဂး ၦလၧဖ့ၪလၫ့ဆၧမၩဆၧၩ့လဖၪ ဆၧမၩဘိၪ့လဖၪ ဒဲ ၦလၧအဖ့ၪဂဲးဖ့ၪဘၭ ဆၧရၩလၩ့လဖၪ ထီးလူၬနီၪ စံၭခိးစံၭတၩဘၪဝ့ၫအဂဲးႇ ဘဲၫကိၭနံၪ့နံၪ့အိၩအၥိၭ ၦလၧအခိၭနၪယိထွ့ၪ ပဆၧရၩလၩ့လဖၪအဂး ဆၧဒၪလၩ့ဎိၭ လိၬၥၭဘိၪ့မုနံၩနီၪ မွဲလၧထံၪဂဲးခးဂဲးအကၠီၩ့ ပမၩလကဲၪထၪ့လၧၩ့ဘၪနီၪ အွံၪၥၭဆၧၩ့နၪၥ့ၪအ့ၪပၧၩအဂဲးႇ ယိလါဘၪဝ့ၫလၧ ၦခိၭနၪဆၧဖိၪလဖၪကဆုးထဲၩ့ ဖ့ၪဂဲးဖ့ၪဘၭ ဆၧရၩလၩ့လဖၪအဂဲးႇ နံၪ့ထၪ့ၥၫ့ အ့ၪလမွဲဘၪဘိၭ ဎြံၬအီၪဖျဲၪကိ ပခိၭနၪဆၧ အအၪထုၬလဖၪအဂး ကမၩအ့ၪဝ့ၫဒၪ ဝဲထၪ့ဆၧဖၭအဂဲးႇ ၦခိၭနၪယိထွ့ၪဆၧဖိၪၥံၪနီၪ မွဲဒၪ RVA အၥၭလီၫအဂဲး” စံၭဝ့ၫဒၪ နီၪလီၫႉ

         ၦခိၭနၪဆၧဖိၪလဂၩမွဲဝ့ၫ ဒေါ်မေရီသောမတ်နီၪ စံၭဘၪဝ့ၫ “ကိၭနံၩဒ့ၭ RVA ရၩလၩ့ဝ့ၫဒၪ ဆၧပရၧၫ့လဖၪနီၪ ခိၭနၪဝ့ၫ အဂဲးႇ ၥၫ့ဎွၩအဆၧၥီၪ့ဆၧၥၫ့လဖၪနီၪဆ့ အဲၪဒိၭဝ့ၫအၪမၬအဂဲးႇ ဆၧရၩလၩ့ဆၧကိၭနိၫ့ဒ့ၭနီၪ အဝ့ၫဘၪၥၭအဂဲးႇ လၧဆၧရၩ လၩ့လဖၪအဖၧၩ့ မွဲအခိးအတၩန့ဝ့ၫဒၪကိၭမံၩ့အဂဲးႇ အဝ့ၫအဂးဆၧရၩလၩ့လဖၪနီၪ မွဲဘဲၫၥံၪ့ဎွံၪကခွၭအၥိၭအဂဲးႇ အဝ့ၫဝဲလၫ့ ခိၭနၪ ဆၧရၩလၩ့လဖၪအခၫ  ဂံၪ့နဲၩ့ဎၪ့နဲၩ့ ဆၧဘိၪ့ဆၧဘၩဂူၫဂၩလဖၪဆ့ မွဲခိၭနၪဆ့တၭ RVAယီၩ ဖ့ၪလၫ့ၦၡၩခိးတၩန့ဝ့ၫဒၪ အၪမၬအဂဲး” အဝ့ၫယီၩစံၭဝ့ၫဒၪနီၪလီၫႉ

         Radio Veritas Asia ဆၧရၩလၩ့ဆၧဖၧၩ့ ရၩလၩ့ဘၪဝ့ၫ မံဆၩဆၧလုထၪ့လဖၪႇ ဆၧၥၭထိၬပရၧၫ့လဖၪႇ လံၬပရၧၫ့ လၧအန့ခိးန့တၩလဖၪဒဲ ၥၭဘၪ့ဒဲဂံၪ့ဒီၪ့ဖိၪၥံၪအဂဲးအဖးလဖၪအကၠီၩ့တၭ ဘဲၫၦခမျၧးလဖၪအဆၧဆူၩနဲၩကဒိၪထၪ့ အဆၧၥ့ၪ ယၫနၪၥ့ၪကအၪထၪ့အဂးနီၪ ဆုးကျိၭကၠၭလိၬၥၭလၧ RVA လါဆံၭႉ ဆၧပရၧၫ့ယီၩပန့ဘၪလၧ RVA Myanmar ဆၧပရၧၫ့ ဖၧၩ့နီၪလီၫႉ