Fr.Richard မၩ့အဲၪထံၫ လ့ၩစိၩလၧ သင်္ကန်းအိုင် ဆၧအီၪကီၪ့ ဂံၪ့ဒီၪ့ဖိၪၥံၪလဖၪအအီၪအဂဲး

နံၪ့၂၀၂၂နံၪ့လၩယူၫ ၂၆ၥၫ့နီၪ ဒိၩ့ပၥံၫ့ဆၧအီၪကီၪ့ ဂံၪ့ဒီၪ့ကီၫမၡ့ၫခရၧၫ့ဖိၪလဖၪ လ့ၩဖ့ၪမးၥံၫအ့ၪ သင်္ကန်းအိုင် ဆၧအီၪကီၪ့ ဂံၪ့ဒီၪ့ဖိၪၥံၪ လဖၪနီၪလီၫႉ ဂံၪ့ဒီၪ့ကီၫမၡ့ၫယီၩနီၪဆ့ မွဲလၧကိၫဘံဆၧဆၫခီၫကမံၩ့ႇ မွဲလၧထံၪခးဂဲးခီၫကမံၩ့အကၠီၩ့ လ့ၩစိၩလၧ ဂံၪ့ဒီၪ့ဖိၪၥံၪလဖၪအအီၪ လဘၭ လၫ့ဘၪကအီၪဖိၭဘိၭ၂နံၪ့ယူၭနီၪလီၫႉ

ဘဲၫယီၩနီၪ စၭထၪ့လ့ၩထဲၩ့လၧ ဆၧအီၪကီၪ့လဖၪအဖၧၩ့ ဂံၪ့ဒီၪ့ဖိၪၥံၪအအီၪဂီၩ့ ဖ့ၪမးၥံၫထဲၩ့ဝ့ၫဒၪႇ ဖ့ၪလၫ့ထဲၩ့အ့ၪဝ့ၫ နးၥၭအဂဲးအဘၭ လဖၪ ကဆံၭကဆံၭနီၪလီၫႉ လၧအဖီၩ့ခွံၬလၩယူၫ ၂၆ၥၫ့အိၩ အဝ့ၫၥံၪအခရၧၫ့ယီၩ လ့ၩစိၩလၧသင်္ကန်းအိုင်ဆၧအီၪကီၪ့ဂီၩ့ လ့ၩဖ့ၪလၫ့အ့ၪ ဂံၪ့ဒီၪ့ ဖိၪၥံၪမးၥံၫကဂီၩနီၪလီၫႉ ၦလၧအလ့ၩခိၪလ့ၩနါမးၥံၫနီၪမွဲဝ့ၫ Fr.Richard မၩ့အဲၪထံၫဂီၩ့ ၦလၧအလ့ၩမၩဆၧၩ့အဝ့ၫနီၪ မွဲဝ့ၫလၧ Fr.Paschal , ဆရၫစကၠီၫထ့ၩမ့ၩဒဲ Davidနီၪလီၫႉ

Fr.Richardယီၩ လီၩၥ့ၪယၫအ့ၪ ဂံၪ့ဒီၪ့ဖိၪလဖၪ ဘၪထွ့ၪလၧကြၨၭပၥ့ၪယၫထၬ ဆၧဘိၪ့ဆၧဘၩလၩ့ဖၭဆၧအီၪဎုၬအဂဲးလဖၪႇ ဆၧဘိၪ့ ဆၧဘၩဆၧၥီၪ့ဆၧၥၫ့အနိၪ့လဖၪႇ ကဲၬၥလံၬဆၧၥွၫခိၪအဂဲးလဖၪႇ ကာနန်လောအဂဲးလဖၪႇ ကာဒီနယ်ငုရင်ဗန်သွမ်ကွ့ၭထၬ ဆၧယိလါဖၧၩ့ၥၭ လံၬစီၩ့ဖၧၩ့ အဂဲးလနၩ့နၩ့ဒဲ ဂံၪ့ဒီၪ့လဖၪနီၪ ဘဲၫကကဲၪ့ထၪ့ ဆၧဎူၫဆၧဎၩ့အီၪဝ့ၫဂံၪ့ဒီၪ့လဖၪအဂးႇ ဘဲၫကကဲၪထၪ့ ဂံၪ့ဒီၪ့အအီၪလၧယွၩလူယွၩထၫ အဂးနီၪ အဝ့ၫယီၩ လီၩလၩ့လၬလၩ့ဘၪဝ့ၫအဂဲး Fr.Paschal အဆၧလီၩၥ့ၪယၫအဖၧၩ့ ပၥ့ၪယၫနီၪလီၫႉ

လၧဂံၪ့ဒီၪ့ဖိၪၥံၪမးၥံၫကဘျၩ့ယီၩအဖၧၩ့ ဂံၪ့ဒီၪ့ဖိၪၥံၪထီးလူၬဂဲၫထၪ့ဝ့ၫဒၪ ကအီၪဖိၭဘိၭအဂၩ ၁၀၀အဂဲး ပန့ဘၪဆၧပရၧၫ့ ဘဲၫယီၩအၥိၭ နီၪလီၫႉ

နးအဲၪဖီၫဘွၩ

၂၇ႉ၆ႉ၂၀၂၂

Add new comment

10 + 1 =